ޓައިވާން މިނިވަން ކުރުމަށް ކުރާ ކޮންމެ މަސައްކަތެއް ފުނޑާލާނެ ކަމުގެ އިންޒާރު ޗައިނާ އިން ދީފި އެވެ.
ސިންގަޕޫރުގައި މިހާރު ކުރިއަށްދާ އޭޝިއަން ސެކިއުރިޓީ ސަމިޓުގެ ހަވާސާގައި ޗައިނާގެ ޑިފެންސް މިނިސްޓަރު ވެއި ފެންގް އަދި އެމެރިކާގެ ޑިފެންސް ސެކްރެޓަރީ ލޮއިޑް އޮސްޓިން ވަނީ ބައްދަލުކުރައްވާފަ އެވެ.
އަމިއްލަ ވެރިކަމެއް އޮންނަ ޓައިވާނަކީ ޗައިނާގެ ބައެއްގެ ގޮތުގައި އެގައުމުން ދެކެ އެވެ. ޗައިނާ އިން ދިފާއުވުމަށް ޓައިވާނަށް ހަތިޔާރު ވިއްކާތީ އެމެރިކާއަށް ޗައިނާގެ ނުރުހުން އަބަދުވެސް އޮވެ އެވެ.
"ޗައިނާ އިން ޓައިވާން ވަކިކުރުމަށް އެއްވެސް މީހަކު މަސައްކަތް ކޮށްފިނަމަ، ޗައިނާގެ އަސްކަރިއްޔާ އަށް އެ މަސައްކަތެއް ފުނޑާލުން ފިޔަވައި އިތުރު ޗޮއިސެއް ނެތް. ގައުމުގެ އިސްތިގުލާލާއި ސަރަހައްދީ މިނިވަންކަން ހިމާޔަތްކުރާނަން،" ވެންގް ފެއި ވިދާޅުވި އެވެ.
އޭނާ މިހެން ވިދާޅުވިއިރު ލޮއިޑް ވަނީ ޗައިނާގެ އަސްކަރިއްޔާ އިން މިހާރު ކުރިއަށްގެންދާ އޮޕަރޭޝަންތަކަކީ ހަމަޖެހުން ނަގާލުމަށް ކުރާ ކަންކަމުގެ ގޮތުގައި ސިފަކޮށްފަ އެވެ. އެގޮތުން، ޗައިނާގެ ޖެޓުތައް މިހާރު ޓައިވާނުގެ ސަރަހައްދާ ކައިރިން ދަތުރުކުރުމަކީ އެ ސަރަހައްދުގެ ސުލްހަ ނަގާލުމަށް ކުރާ ކަމެއްގެ ގޮތުގައި އޭނާ ސިފަކުރެއްވި އެވެ.
އަދި، އެއްވެސް ނުތަނަވަސްކަމެއް ބާރުގެ ބޭނުންކޮށްގެން ހިންދާލުމަށް މަސައްކަތްކޮށްގެން ނުވާނެ ކަމަށް ވެސް އޭނާ ވިދާޅުވި އެވެ.
ދެ ޑިފެންސް މިނިސްޓަރުންގެ ބައްދަލުވުން ގާތްގަނޑަކަށް އެއް ގަޑިއިރަށް ދެމިގެންދިޔައިރު މިއީ މި ދެ ބޭފުޅުން ބައްދަލުވި ފުރަތަމަ ފަހަރެވެ.
