ގއ. ވިލިނގިލީގައި ގެއަކަށް ވަދެ އެ ގޭގެ ތިބި ހަތަރު އަންހެނެއްގެ ގައިގައި ދަތް އަޅައި، އެއިން އެކަކުގެ އިނގިލި ބުރިކޮށްލި މީހާގެ މައްޗަށް ފަސް ދައުވާއެއް އުފުލައިފި އެވެ.
ޕްރޮސެކިއުޓާ ޖެނެރަލްގެ އޮފީހުން މިއަދު ބުނީ މިދިޔަ މަހުގެ ދެ ވަނަ ދުވަހު، ގއ. ވިލިނގިލި، ޝާދީވިލާ ގެއަށް ހުއްދަނުހޯދައި ވަދެ، އެގޭގައި ތިބި ބަޔަކާމެދު މާރާމާރީ ހިންގައި ބޮޑެތި އަނިޔާތަކެއް ދިން މައްސަލައިގައި، ކ. މާލެ، ގ. ޗެރީހައުސް، އަލީ ހަސަންގެ މައްޗަށް ފަސް ދައުވާއެއް ކުރުމަށް ގއ. ވިލިނގިލީ މެޖިސްޓްރޭޓް ކޯޓަށް ހުށަހަޅާފައިވާ ކަމަށެވެ.
އޭނާގެ މައްޗަށް އުފުލާފައިވަނީ އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާއާއި ގައިގާ އަތްލުމުގެ ކުށުގެ ދައުވާއާއި އަނިޔާއެއް ދިނުމުގެ ކުށުގެ ތިން ދައުވާ އެވެ. މި ފަސް ދައުވާ އޭނާގެ މައްޗަށް ސާބިތުވެއްޖެނަމަ، ޖުމްލަ ތިން އަހަރާއި 2 އަހަރާއި 10 މަހާއި 18 ދުވަހުގެ ޖަލު ހުކުމެއް އަންނާނެ އެވެ.
މި މައްސަލައިގައި ފިރިހެން މީހާ ޝަރީއަތް ނިމެންދެން ބަންދުކުރުމަށް ފަހު މިމަހު ކުރީކޮޅު ވިލިނގިލީ ކޯޓުން ވަނީ އޭނާ ދޫކޮށްލައިފަ އެވެ.
ޕީޖީން މިއަދު ބުނީ އޭނާ ޝަރީއަތް ނިމެންދެން ބަންދުކޮށްދިނުމަށް އެދިފައިވާ ކަމަށާއި، ބަންދާ ގުޅޭ އަޑުއެހުމެއް މި މަހުގެ 13 ވަނަ ދުވަހަށް ތާވަލްކޮށްދީފައިވާ ކަމަށެވެ.
ވިލިނގިލީ ކޯޓުން އޭނާ ދޫކޮށްލާފައިވަނީ އޭނާގެ ބަންދާ މެދު މެޖިސްޓްރޭޓް ކޯޓުގައި އޮތް ޝަރީއަތަށް ހާޒިރުކުރުމުން، ކޯޓުގެ ހުރުމަތް ކަނޑާލި މައްސަލައެއްގައި ފަސް މަސް ދުވަހުގެ ޖަލު ހުކުމެއް ވެސް އިއްވާފައި ވަނިކޮށެވެ.
އެނގިފައިވާ ގޮތުގައި އޭނާ ވަދެ، މާރާމާރީ ހިންގާފައިވަނީ އޭނާގެ ކުރީގެ އަނބިމީހާގެ އުޅޭ ގޭގަ އެވެ. އަނިޔާވި މީހުންގެ ތެރޭގައި އަލީ ހަސަންގެ ކުރީގެ އަނބިމީހާ ވެސް ހިމެނޭކަން އެނގިފައިވެ އެވެ.
އަނިޔާ ލިބުނު ހަތަރު އަންހެނުންގެ ތެރެއިން އެކަކުގެ އިނގިލިން އެއް ސެންޓި މީޓަރު ވަރުގެ ތަނެއް ދަތް އަޅައި ކަނޑާލައިފަ އެވެ. އުމުރުން ދުވަސްވީ އަންހެނެއްގެ އަތުގެ އިނގިލި ބިންދާލާފައިވާއިރު، އިތުރު އަންހެނެއްގެ ފަޔާއި އަތުގައި ދަތް އަޅައި އަނިޔާދީފައިވާ ކަން އަމުރުން އެނގެ އެވެ.
މީނާ ޝަރީޢަތް ނިމެންދެން ބަންދުކޮށްދެއްވުން އެދި 07 ޖޫން 2022 ގައި ފޯމް ހުށަހަޅާފައިވީނަމަވެސް، ބަނދާ ގުޅޭގޮތުން ގޮތެއް ކަނޑައެޅުމުގެ އަޑުއެހުމެއް ކޯޓުން މިހާތަނަށް ތާވާލުކޮށްދެއްވާފައި ނުވޭ.
