ޕެރިސް (ޖޫން 10) - ފްރާންސްގެ ޗެމްޕިއަން ޕީއެސްޖީގެ ކޯޗުކަމަށް ޒިނެދިން ޒިދާން ހަމަޖައްސަން މަޝްވަރާތައް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ނިމިދިޔަ ސީޒަނުގައި ޕީއެސްޖީ އަށް ޗެމްޕިއަންސް ލީގުގައި އެކަށީގެންވާ ނަތީޖާއެއް ނުނެރެވި، ދެ ވަނަ ބުރުން ކެޓި ހިސާބުން ޕީއެސްޖީގެ ކޯޗު މައުރީސީއޯ ޕޮޗެޓީނޯ އަށް ޕީއެސްޖީގެ ކޯޗުކަމުގައި ދެމިނުހުރެވޭނެ ކަމަށް މީޑިއާގައި ވަނީ އަޑުފެތުރެން ފަށައިފަ އެވެ.
ޕީއެސްޖީން އެ ކްލަބްގެ ތަރި، ކީލިއަން އެމްބާޕޭ އަށް ގިނަ ބާރުތަކެއް ލިބޭ ގޮތަށް އެ ކްލަބާ އެކު ހަދާފައިވާ ކޮންޓްރެކްޓް އާ ކުރިއިރު، އޭނާ އެދެނީ ޕީއެސްޖީގެ ކޯޗުކަމަށް ޒިދާން ގެންނަން ކަމަށް މީޑިއާ ރިޕޯޓްތައް ބުނެ އެވެ.
ފްރާންސްގެ ލެކިއުޕޭ ނޫހަށް ދާދި ފަހުން، ފްރާންސް ފުޓްބޯޅަ ފެޑެރޭޝަންގެ ރައީސް ނޮއެލް ލަ ގްރައެޓް ދެއްވި އިންޓަވިއުއެއްގައި ވިދާޅުވީ ޕީއެސްޖީގެ ކޯޗެއްގެ ގޮތުގައި ޒިދާން ފެނުމުގެ ފުރުސަތު އެބައޮތް ކަމަށެވެ. އޭނާ އެހެން ވިދާޅުވީ ޑިޑިއޭ ޑެޝޯމްޕްސް އަށް ފަހު ފްރާންސް ގައުމީ ޓީމާ ހަވާލުވާނެ ކޯޗަކީ ޒިދާން ނޫންތޯ މީޑިއާ އިން ކުރި ސުވާލަކަށް ދެއްވި ޖަވާބުގަ އެވެ.
ސްޕެއިނާއި ފްރާންސްގެ ނޫސްތަކުން ރިޕޯޓްކުރާގޮތުގައި ޒިދާން، 49، ވަނީ ދާދި ފަހުން ފްރާންސްގައި ޕީއެސްޖީގެ ބައެއް އޮފިޝަލުންނާ ބައްދަލުވުންތަކެއް ބާއްވައިފަ އެވެ. އަދި ކުރިއަށް އޮތް ދެ ދުވަހެއްގެ ތެރޭގައި ގަތަރަށް ޒިދާން ދާނެ ކަމަށާއި އަދި ދޯހާގައި ޕީއެސްޖީގެ ރައީސް ނާސިރު އަލް-ހެއްލާފީގެ ބައްދަލުވުމެއް ބާއްވަން ނިންމާފައިވާ ކަމަށް އިއްޔެ ސްޕެއިނުގެ ނޫހަކުން ވަނީ ރިޕޯޓްކޮށްފަ އެވެ.
ގަތަރުން އަންނަނީ 2006 ވަނަ އަހަރުގެ ވޯލްޑް ކަޕް ފައިނަލުގައި އިޓަލީގެ މާކޯ މަޓެރާޒީ މޭމަތީގައި ޒިދާން ބޮލުން ޖެހި މަންޒަރު ރަމްޒުކޮށްދޭ ސްޓެޗޫއެއް ބަހައްޓަން މަސައްކަތް ކުރަމުންނެވެ. ރިޕޯޓްތައް ބުނާގޮތުން މިއީ ގަތަރު ވޯލްޑް ކަޕް ކޮމިޓީގައި ހިމެނޭ، ޕީއެސްޖީގެ ރައީސް ހެއްލާފީ ހުށަހެޅުއްވި ކަމެކެވެ.
ޕީއެސްޖީގެ ކޯޗުކަމުގައި ހުރި ޕޮޗެޓީނޯގެ ކޮންޓްރެކްޓްގައި ބާކީ އެއް އަހަރު އޮތް ނަމަވެސް ރިޕޯޓްތައް ބުނާގޮތުން އޭނާ މަގާމުން ވަކިކުރަން ވަނީ ނިންމައިފަ އެވެ. ޕޮޗެޓީނޯގެ އަމިއްލަ އިންސްޓަގްރާމް މެދުވެރިކޮށް ޕީއެސްޖީ ކުޅުންތެރިއެއްގެ ގޮތުގައި މީގެ ކުރިން ކުޅުނު މެޗުތަކުގެ ފޮޓޯތައް ހިއްސާކުރަމުން އަންނައިރު، ރިޕޯޓްތައް ބުނާގޮތުން ޕޮޗެޓީނޯ އެ ޕޯސްޓްތައް ކުރަން ފެށީ ޕީއެސްޖީން އޭނާ ވަކިކުރާނެކަން ޔަގީންވެފައިވާތީ އެވެ.
ޒިދާން އަށް މިދިޔަ ސީޒަނުގައި ޔުވެންޓަސްގެ ކޯޗުކަން ވެސް ހުށަހެޅި އެވެ. އެކަމަކު، އޭނާ އެ ޕްރޮޕޯސަލް ގަބޫލުކުރަން ބޭނުމެއްނުވި އެވެ. ރެއާލް މެޑްރިޑް ކޯޗުކަން ދެ ފަހަރެއްގެ މަތިންކުރި ޒިދާން ދެން ކޯޗިން ވަޒީފާއަކާ ހަވާލުވާނީ ފްރާންސްގައި މަސައްކަތް ކުރެވޭ ގޮތަށް ކަމަށް އޭނާގެ ގާތް ފަރާތްތަކާ ހަވާލާދީ ފްރާންސްގެ ރޭޑިއޯ ވަން ސްޓޭޝަން އިން މި އަހަރުގެ ކުރީކޮޅުގައި ރިޕޯޓްކޮށްފައިވެ އެވެ.
