ވެލެންސިއާ (ޖޫން 10) - ސްޕެނިޝް ލީގުގެ މަޝްހޫރު ކްލަބް، ވެލެންސިއާގެ ކޯޗަކަށް އިޓަލީގެ ލެޖެންޑް، ޖެނާރޯ ގަޓޫސޯ ހަމަޖައްސައިފި އެވެ.
ކުރިން އޭސީ މިލާނަށް ކުޅުނު ގަޓޫސޯ، 44، ނަޕޯލީގެ ކޯޗުކަމުން 2021 ވަނަ އަހަރުގެ މެއި މަހު ވަކިވި ފަހުން، އޭނާ ރަސްމީކޮށް އެއްވެސް ކްލަބަކާ ހަވާލެއް ނުވެ އެވެ. ފިއޮރެންޓީނާގެ ކޯޗުކަން މިދިޔަ އަހަރު ގަޓޫސޯއާ ހަވާލުވި ނަމަވެސް، ކޮންޓުރެކްޓް ރަސްމީކޮށް ފެށުމުގެ ކުރިން ދެ ފަރާތުން އެއްބަސްވެގެން ކޮންޓުރެކްޓް ވަނީ އުވާލައިފަ އެވެ.
ނަޕޯލީގެ ކޯޗުކަމުގައި ހުރިއިރު، އެ ކްލަބާއެކު ގަޓޫސޯ ވަނީ އިޓާލިއަން ކަޕް ކާމިޔާބުކޮށްފަ އެވެ. ވެލެންސިއާގެ ކޯޗުގެ މަގާމުގައި ހުރި ހޯސޭ ބޮރްދަލާސް އެ މަގާމުން ވަކިކުރީ މިދިޔަ ހުކުރު ދުވަހު އެވެ. މިދިޔަ ސީޒަންގެ ސްޕެނިޝް ލީގު ވެލެންސިއާ ނިންމާލީ ނުވަ ވަނައިގަ އެވެ.
ވެލެންސިއާގެ ކޯޗުކަމާ ހަވާލުވުމަށް ފަހު ގަޓޫސޯ ބުނީ އެ ކްލަބުގެ މުއްސަނދި ސަގާފަތެއް އެބައޮތް ކަމަށާއި ތާރީހަށް ބަލާއިރު ވެލެންސިއާ އިން ކާމިޔާބީތަކެއް ހޯދާފައިވާ ކަމަށެވެ. ވެލެންސިއާ ދަނޑުގައި ބޮޑެތި ނަތީޖާތަކެއް އެ ޓީމުން ނެރެފައިވާކަން އެނގޭ ކަމަށާއި މިއީ އެ ސްޓޭޑިއަމަށް 100 އަހަރު ފުރޭ އަހަރު ކަމަށްވާއިރު، ވެލެންސިއާ ސަޕޯޓަރުންނާ އެކު ކުރިއަށް އޮތް ސީޒަނުގައި ރަނގަޅު މެޗުތަކެއް ނިންމާލަން ބޭނުންވާ ކަމަށް ގަޓޫސޯ ވަނީ ބުނެފަ އެވެ.
ވެލެންސިއާ އަށް ގަޓޫސޯ ގެންނަން ބޭނުންވާ ކުޅުންތެރިންގެ ތެރޭގައި އިޓަލީގެ މަޝްހޫރު ފޯވާޑް މާރިއޯ ބަލޮޓެލީ ހިމެނެ އެވެ. ބަލޮޓެލީ ކުޅެމުން އަންނަނީ އަޑާނާ ޑެމިރްސްޕޯރަށެވެ.
