ބާސެލޯނާ (ޖޫން 9) - ބާސެލޯނާ އިން އެ ކްލަބްގެ މާލީ ހާލަތަށް ބަލާފައި، ކުޅުންތެރިންގެ މުސާރަ ކުޑަކުރަން އުޅޭ ވާހަކަ މީޑިއާތަކުން ރިޕޯޓްކުރާއިރު، އެކަންކަން ކްލަބުން ކުޅުންތެރިންނާ ހިއްސާ ނުކުރާތީ ބާސެލޯނާގެ ކެޕްޓަން ސާޖީ ބުސްކެޓްސް ހިތްހަމަނުޖެހުން ފާޅުކޮށްފި އެވެ.
ސްޕެއިނުގެ މީޑިއާތަކުން ރިޕޯޓްކުރާ ގޮތުގައި ބާސެލޯނާ އިން ވަނީ އެ ކްލަބްގެ ބޮޑު މުސާރައިގައި ތިބި ކުޅުންތެރިންގެ މުސާރައިން 30-50 ޕަސެންޓް އުނިކުރަން ނިންމައިފަ އެވެ. އަދި ކުރިއަށް އޮތް ތިން އަހަރު ބާސެލޯނާގައި އެއްވެސް ކުޅުންތެރިއަކަށް 10-12 މިލިއަން ޑޮލަރަށް ވުރެ އިތުރު މުސާރައެއް ނުލިބޭ ގޮތަށް އޮނިގަނޑެއް ހަދަން ވެސް އެ ކްލަބުން މަޝްވަރާ ކުރަމުން އަންނަ ކަމަށް ރިޕޯޓްތައް ބުނެ އެވެ.
ނޭޝަންސް ލީގުގައި ސްޕެއިންގެ މެޗެއްގެ ކުރިން ބޭއްވި ނޫސްވެރިންގެ ބައްދަލުވުމެއްގައި ގިނަ ނޫސްވެރިންތަކެއް ބުސްކެޓްސްއާ ސުވާލުކުރީ ބާސެލޯނާގެ މާލީ ހާލަތުގެ ކަންކަން ކުޅުންތެރިންނަށް ހިއްސާކޮށްފައިވޭތޯ އެވެ.
ބުސްކެޓްސް ބުނީ މި ވަގުތަށް ހުރިހާ މައުލޫމާތެއް ވެސް ލިބެނީ މީޑިއާގައި ހުންނަ ހަބަރުތަކުން ކަމަށެވެ.
"ވަރަށް ގިނަ އެއްޗެހި މީޑިއާތަކުން އެބަފެނޭ. އަހަރެން ޗުއްޓީ އަށް ގޮސްފައި އަންނައިރު، ކްލަބުން ހުށަހަޅާނެ އެއްޗެއް ނޭނގޭ، މީގެ އެންމެ ރަނގަޅު ގޮތަކީ ކްލަބުން ކުޅުންތެރިންނަށް މި ކަން އޮޅުންފިލުވައިދިނުން، އެހެން ދިމާލަކުން މި މައުލޫމާތު ލިބުމަކީ އިންސާފުވެރި ގޮތެއް ނޫން،" ބުސްކެޓްސް، 33، ބުންޏެވެ.
މިދިޔަ ސީޒަނުގައި ބާސެލޯނާ އަށް އެ ޓީމުގެ ތަރި ލިއޮނަލް މެސީ މަޑުނުކުރެވުނީ ވެސް ކްލަބްގެ މާލީ ހާލަތު ގޯސް ފައްތަރެއްގައި އޮތުމުންނެވެ.
މި ފަހަރުގެ ޓްރާންސްފާ މާކެޓްގައި ބާސެލޯނާގެ މާލީ ހާލަތު ރަނގަޅުކުރަން ބައެއް ކުޅުންތެރިން ދޫކޮށްލަން ޖެހޭ ކަމަށް ރިޕޯޓްތައް ބުނެ އެވެ. އޭގެ ތެރޭގައި ޓީމަށް ބޮޑު އަގުގައި ގެނެސްފައި ތިބި ކުޅުންތެރިންގެ ތެރޭގައި ހިމެނޭ ނެދަލެންޑްސްގެ މިޑްފީލްޑަރު ފްރެންކީ ޑި ޔޯން އާއި ފޯވާޑް މެމްފިސް އަކީ ވެސް ވިއްކާ ލިސްޓުގައި ނަން ހިމެނޭ ކުޅުންތެރިން ކަމަށް މީޑިއާތަކުން ރިޕޯޓްކުރެ އެވެ. އެ ކުޅުންތެރިންނަށް ބައެއް ޓީމުތަކުން އަންނަނީ ޝައުގުވެރިކަން ވެސް ފާޅުކުރަމުންނެވެ.
ބާސެލޯނާ އިން ވަނީ ފިލިއްޕޭ ކުޓީނިއޯ، ދާއިމީ ކޮންޓްރެކްޓެއްގައި އެސްޓަން ވިލާ އަށް ވިއްކާލައިފަ އެެވެ. އޮސްމާން ޑެމްބެލޭގެ ކޮންޓްރެކްޓް އާ ނުކުރާއިރު، ޒުވާން ކުޅުންތެރިޔާ، ފެރާން ޖުޓްގުލާ ވަނީ ކްލަބް ބްރޫޖް އަށް ވިއްކާލައިފަ އެވެ. މީގެ އިތުރުން ބާސެލޯނާގެ ޑިފެންޑަރު، ކްލަމެންޓް ލޯންގްލޭ އެ ޓީމު ދޫކޮށްލާނެ ކަމަށް ބެލެވޭއިރު، ޒުވާން ތަރި، ގަވީގެ ކޮންޓްރެކްޓް އާ ކުރުމުގެ ކަންކަމުގައި ވެސް އޮތީ އެއްބަސްވުމަކަށް ނާދެވި އެވެ.
