މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް ކަމަށް އެ ކައުންސިލްގެ މެމްބަރެއްގެ ގޮތުގައި ހުރި މުހައްމަދު ޝަފާއު ހަސަން އިންތިހާބު ކޮށްފި އެވެ.
ޝަފާއު އެ މަގާމަށް އިންތިހާބު ކޮށްފައި ވަނީ ކުރިން އެ މަގާމުގައި ހުންނެވި ޝަހުބާން ފަހުމީ އިސްތިއުފާ ދެއްވުމުން މިއަދު ބޭއްވި ކައުންސިލް ޖަލްސާގަ އެވެ. ރައީސަކު ހޮވުމަށް އެ ޖަލްސާގައި ނެގި ވޯޓުން އޭނާ އަށް ވަނީ ބައިވެރިވި ނުވަ މެމްބަރުންގެ ވޯޓު ލިބިފަ އެވެ.
ޝަފާއު އަކީ މިހާރުވެސް ރީޖަނަލް އެއާޕޯޓްސްގެ ބޯޑާއި ކެއާ ސޮސައިޓީގެ ބޯޑުގައި ހިމެނި ވަޑައިގަންނަވާ ބޭފުޅެކެވެ. ކުރީން އޭނާ ވަނީ އެމްއާރްޑީސީގެ މެނޭޖިން ޑިރެކްޓަރުކަން ވެސް ކުރައްވާފަ އެވެ.
އެމްއެމްސީގެ ހަވަނަ ދައުރުގެ ދެވަނަ ރައީސްކަށް ޝަފާއު ހޮވާފައި ވާއިރު، މިއީ އެއްމްސީގެ ރައީސް ކަމަށް މީޑީއާއަށް ނިސްބަތް ނުވާ ބޭފުޅަކު އިންތިހާބު ކުރި ފުރަތަމަ ފަހަރެވެ.
އެ މަގާމަށް ޝަފާއު އިންތިހާބު ކޮށްފައިވާއިރު، އެމްއެމްސީގެ ކުރީގެ ރައީސް ޝަހުބާން އެ މަގާމުން ދުރު ކުރުމަށް ދެ ފަހަރަށް ވޯޓް ނާގާފައި ވެއެވެ. އެއީ ޝަހުބާން އާއި އޭނާގެ ބޭބެ އަދި ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ ހިއްސާ އޮންނަ ކުންފުންޏަކަށް މަނީ ލޯންޑަގެ ތުހުމަތު ކުރެވިގެންނެވެ.
ސަހުބާނަށް ކުރެވޭ ތުހުމަތު
ސަހުބާނާއި އޭނާގެ އެއްބަނޑު އެއްބަފާ ބޭބެ އަލްހާން ފަހުމީ ވަނީ "ކިންގްސް ފޮރެކްސް ޓްރޭޑިން" ކިޔާ ކުންފުންޏެއް މެދުވެރިކޮށް އާއްމުންގެ އަތުން ފައިސާ ނަގައިގެން އޮންލައިން ޓްރޭޑިން ކުރިޔަށް ގެންގޮސްފަ އެވެ.
މިދިޔަ މާޗް މަހުގެ 10 ވަނަ ދުވަހު، އެމްއެމްއޭ އިން ނުސީދާކޮށް ކިންގްސް ފޮރެކްސްއާ ދެކޮޅަށް ބަޔާން ނެރެ، ބީއެމްއެލްގައި ހުޅުވާފައިވާ ކިންގްސް ކެޕިޓަލް ހޯލްޑިންސްގެ އެކައުންޓްތައް ފްރީޒް ކުރީ، ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށް ބުނެ މީހުންގެ އަތުން ފައިސާ ނަގައިގެން ބޮޑު ފްރޯޑެއް ހިންގަމުން އަންނަ ކަމަށް ތުހުމަތު ކޮށްފަ އެވެ.
އެ މައްސަލަ ފުލުހުން ތަހުގީގު ކުރަމުން އަންނައިރު ސަހުބާނާއި އަލްހާނު ވަނީ ފުލުހަށް ހާޒިރުކޮށް ސުވާލު ކޮށްފަ އެވެ.
