މާލެ އައި ލޯންޗަކުން އެއް ނަމްބަރު ފާލަމަށް ފޭބުމާއެކު އިބްރާހިމް އާގިލް ގަޔަށް ވަޅި ހަރާ މަރާލި މައްސަލާގައި ބައެއް ދިފާއީ ވަކީލުން ތަނާޒުލް ވުމުންނާއި ދައުލަތުން ހުށަހެޅި ބައެއް ހެކިން ހާޒިރުނުވުމުން މިއަދުގެ އަޑުއެހުމަށް ކުރަން ރޭވިފައިވާ މަސައްކަތް ނުކޮށް އަޑުއެހުން ނިންމާލަން ޖެހިއްޖެ އެވެ.
އޮގަސްޓް 2018 ގައި އާގިލްއަށް ހަމަލާދީ މަރާލި ކަމުގެ ދައުވާ އުފުލާފައިވަނީ ލ. ފޮނަދޫ، ހިޔާ، ހަމްދޫން ހަމްޒަތާއި، ސ. ހިތަދޫ، ސްވޭހުހީނާގޭ އަލީ މިޖުވާދު މާލިކްގެ މައްޗަށެވެ. އެކަމުގައި އެހީތެރިވިކަމުގެ ދައުވާ، ހއ. ދިއްދޫ ސްނޯބޯޑް އިބްރާހިމް ވިޝާމްގެ މައްޗަށް ކުރެ އެވެ.
މީގެ ކުރިން ވެސް ހަމްދޫން ހަމްޒަތާއި އަލީ މިޖުވާދުގެ ވަކީލުން މައްސަލައިން ތަނާޒުލްވެ އާ ވަކީލުންތަކަކާއެކު މައްސަލަ ކުރިއަށް ދަނިކޮށް، މިއަދުގެ އަޑުއެހުން ފަށަމުން ވެސް ގާޒީ އަލީ އާދަމް ވިދާޅުވީ ފަހުން އައްޔަންވި ވަކީލުން ވެސް މައްސަލަ ދޫކޮށްލާފައިވާ ކަން ކޯޓަށް އަންގާފައިވާ ކަމަށެވެ.
ވަކީލު ފީ ނުދީގެން އަނެއްކާ ވެސް މި ދެ ފަރާތުގެ ދިފާއީ ވަކީލުން މައްސަލައިން ތަނާޒުލްވުމުން، ވަކީލަކު ހަމަޖައްސަން 10 ދުވަހުގެ މުއްދަތެއް ގާޒީ ދެއްވި އެވެ. އެއީ ގާނޫނުގައި ވެސް އެ ކަމަށް ދޭން ބަޔާން ކޮށްފައި އޮންނަ އެންމެ ދިގު މުއްދަތެވެ.
މީގެ އިތުރަށް މައްސަލާގައި ހާޒިރުނުކުރެވި ތިބި ދެ ސިއްރު ހެކިން މިއަދު ވެސް ހާޒިރެއް ނުކުރެވުނެވެ. ދައުލަތުން ބުނީ މައްސަލަ ސާބިތު ކުރަން އެ ދެ ހެކިން ވެސް މުހިންމު ކަމަށެވެ. އެހެންވެ، ކޯޓުން ޗިޓު ފޮނުވައިގެން ސަލާމަތީ ހިދުމަތުގެ ބެލުމުގެ ދަށުން ވިޔަސް އެ ހެކިން ހާޒިރުކޮށްދޭން ދައުލަތުން އެދުނެވެ.
އެކަމަކު އެ ގޮތަށް ޗިޓު ފޮނުވައިގެން ކޮންމެހެން ހާޒިރު ކުރަން މަސައްކަތް ކޮށްފިނަމަ އެ ހެކިންގެ ސިއްރުކަން ގެއްލިދާނެ ކަމުގެ ފުރުސަތު އޮންނާނެ ކަން ގާޒީ ފާހަގަ ކޮށްދެއްވި އެވެ. ދައުލަތުން ބޭނުންވީ އެ ހާލަތުގައި ވެސް ހެކިން އެ ގޮތަށް ހާޒިރުކޮށްދިނުމަށެވެ. ހާޒިރުކޮށް އެހެން ތަނެއްގައި ބައިތިއްބައިގެން އަޑު ބަދަލުކޮށްގެން ހެކިބަސް ދިނުމުން ސިއްރުކަން ހިފެހެއްޓޭނެ ކަމަށް ދައުލަތުން ދެކެ އެވެ.
ދައުލަތުން އެދުނު ގޮތަށް ކޯޓުން ޗިޓު ފޮނުވައިގެން ސިއްރު ހެކިން ހާޒިކޮށްގެން މައްސަލަ ކުރިއަށް ގެންދަން ގާޒީ އަލީ އާދަމް ނިންމެވި އެވެ.
މި މައްސަލާގައި މީގެ ކުރިން ވަނީ މައްސަލަ ތަހުގީގުކުރި ބައެއް އޮފިސަރުން ހާޒިރުކޮށް ހެކިބަސް ނަގައިފަ އެވެ. މި ގޮތުން އާގިލްގެ ގާތިލް ކަމަށް ތުހުމަތު ކުރާ ހަމްދޫންގެ ހަރަކާތްތައް ފެންނަ ސީސީޓީވީ ފޫޓޭޖްގެ ފޮޓޯތައް ތަފްސީލުކޮށްދީފައިވާއިރު، ހަމްދޫންގެ ހެދުމުގައި ހޭކިފައިވާ ލޭކޮޅުން އާގިލްގެ ޑީއެންއޭ ލިބިފައިވާ ކަމަށް ޑީއެންއޭ ރިޕޯޓް ތައްޔާރު ކުރި އޮފިސަރު ވަނީ ޝަރީއަތުގައި ބުނެފަ އެވެ.
