ހައިކޯޓުގެ ފަނޑިޔާރު ކަމުގެ މަގާމުން އަބްދުﷲ ހަމީދު ވަކި ކުރަން ޖޭއެސްސީން މަޖިލީހަށް ހުށަހެޅީ އިޖުރާތްތަކާ އެއްގޮތަށް ކަމަށާއި ރައްޔިތުންގެ މަޖިލީހުގެ ޖުޑީޝަރީ ކޮމިޓީން ވެސް މަސައްކަތް ކުރަން ޖެހޭނީ ހަމަތަކާއި އިޖުރާއަތްތަކާ އެއްގޮތްވާ ގޮތުގެ މަތީން ކަމަށް، ރައްޔިތުންގެ މަޖިލީހުން ޖުޑީޝަލް ސާވިސް ކޮމިޝަނަށް އައްޔަން ކޮށްފައި ހުންނަވާ މެންބަރު އަދި ތުޅާދޫ ދާއިރާގެ މެންބަރު ހިސާން ހުސެއިން ވިދާޅުވެއްޖެ އެވެ.
ހިސާން މިފަދައިން ވިދާޅުވީ، ހައިކޯޓުގެ ފަނޑިޔާރު ކަމުގެ މަގާމުން އަބްދުﷲ ހަމީދު ވަކި ކުރަން ޖޭއެސްސީން މަޖިލީހަށް ހުށަހެޅި މައްސަލައިގައި ޖުޑީޝަރީ ކޮމިޓީން ނިންމި ގޮތުގެ ރިޕޯޓަށް ބަހުސް ކުރައްވަމުންނެވެ. މި މައްސަލަ ޖުޑީޝަރީ ކޮމިޓީން ދިރާސާކުރުމަށްފަހު ނިންމާފައިވަނީ މައްސަލަ ޖުޑީޝަލް ސާވިސް ކޮމިޝަނުން ކުރިއަށް ގެންގޮސްފައިވަނީ އިޖުރާއަތާ ހިލާފަށް ކަމަށާއި މައްސަލަ އަނބުރާ ފޮނުވާލަން ޖެހޭނެ ކަމަށެވެ.
"ޖުޑީޝަލް ސާވިސް ކޮމިޝަނުން ތަހުގީގުކޮށްފައި ފޮނުވި މި މައްސަލަ އިޖުރާއަތާ ހިލާފަށް ކަމަށް ކަމަށް ޖުޑީޝަރީ ކޮމިޓީން ކަނޑައެޅި ކަނޑައެޅުން ފަހަރުގައި ވެދާނެ ގާނޫނުގައި ހުރި މާއްދާތައް މާނަކުރުމުގައި މިއަދު އައިސްފައި އޮތް ތަފާތަކުން ކަމަށް، އެހެން ކަމަށްވާނަމަ އެހެން މާނަކުރުން އެއްގޮތަށް ކޮށް، ޖޭއެސްސީގެ ގާނޫނަށް އިސްލާހު ގެނައުން މުހިންމު ކަމަށް ދެކެން،" ޖޭއެސްސީގެ ރައީސްކަން ވެސް ކުރައްވާ ހިސާން ވިދާޅުވި އެވެ.
ހިސާން ވިދާޅުވި ގޮތުގައި ޖޭއެސްސީގެ ގާނޫނަށް ދެ ވަނަ އިސްލާހު ގެނެސް، އަމަލު ކުރަން ފެށި ފަހުން، އެ ކޮމިޝަނުން ޖުޑީޝަރީ ކޮމިޓީއަށް މިހާތަނަށް 99 ރިޕޯޓު ފޮނުވާފައިވާ ކަމަށެވެ. މިހުރިހާ މައްސަލައެއް ވެސް ފޮނުވައިފައިވަނީ އެއް އިޖުރާއަތުތަކެއްގެ މައްޗަށް ތަހުގީގުކޮށްގެން ކަމަށް ހިސާން ވިދާޅުވި އެވެ.
އެހެންނަމަވެސް ހައިކޯޓުގެ ދެ ފަނޑިޔާރުން ވަކި ކުރަން ފޮނުވި މައްސަލަ ފިޔަވާ އެހެން މައްސަލައެއްގައި ޖޭއެސްސީން އަމަލުކޮށްފައިވަނީ އިޖުރާއަތްތަކާ ހިލާފަށް ކަމަށް ޖުޑީޝަރީ ކޮމިޓީން ނިންމާފައިނުވާ ކަމަށް ހިސާން ވިދާޅުވި އެވެ.
"ޖުޑީޝަލް ސާވިސް ކޮމިޝަނަށް އިސްލާހު ގެނެވުނު ފަހުން އަމަލު ކުރަމުން އައި އުސޫލާއި އިޖުރާއަތު މި މައްސަލައިގައި ވަކި ތަފާތުކޮށްފައެއް ޖުޑީޝަލް ސާވިސް ކޮމިޝަނުން ވަކި ނެތް، " ހިސާން ވިދާޅުވި އެވެ.
"ގާނޫނުގައި ބަޔާން ކޮށްފައިވާ އިޖުރާއަތްތައް މި މައްސަލައިގައި ވަނީ ފުރިހަމަކޮށްފައި ކަން،"
އެގޮތުން، މައްސަލައިގައި ފަނޑިޔާރުންނަށް ޖަވާބުދާރީވާން ފުރުސަތު ދީ، މައްސަލަ ބިނާ ކޮށްފައި އޮތީ އެ ޖަވާބުގެ މައްޗަށް ކަމަށް ވިދާޅުވި އެވެ.
ހިސާން ވަނީ އިޖުރާއަތްތަކާ އެއްގޮތަށް އަމަލު ކުރަން ޖެހެނީ ވަކި ބައެއް ނޫން ކަަމަށާއި ކޮމިޓީން ވެސް އެގޮތަށް އަމަލު ކުރަން ޖެހޭ ކަމަށް ވިދާޅުވެފަ އެވެ.
