ޗައިނާ އިން ބިނާކުރަން މަސައްކަތް ކުރާ ޖައްވީ ސްޓޭޝަން ޓިއަންގޮންގްގެ މަސައްކަތްތައް ކުރުމަށް ތިން އެސްޓްރޮނޯޓުން އެ ގައުމުން ޖައްވަށް ފޮނުވައިފި އެވެ.
ކުރިއަށް އޮތް ހަ މަސް ދުވަހު އެ ތިން އެސްޓްރޮނޯޓުން މަސައްކަތް ކުރާނީ ޓިއަންގޮންގްގެ މައި މޮޑިއުލް، ޓިއަންހޭގަ އެވެ. އެ މީހުން އަނބުރާ އަންނަނީ އަންނަ ޑިސެމްބަރުގެ ތެރޭގަ އެވެ.
ޗައިނާ މޭންޑް ސްޕޭސް އޭޖެންސީ އިން ހާމަކޮށްފައިވާ ގޮތުގައި މި ދަތުރުކުރީ ޝެންޒައު-14 ޖައްވީ އުޅަނދުގަ އެވެ.
މި ޖައްވީ މިޝަންގެ ކޮމާންޑަރެއްގެ ގޮތުގައި ދިޔައީ ޗެން ޑޮން އެވެ. އޭނާ އަކީ ޖައްވުގައި އެންމެ ގިނަ ވަގުތު ހޭދަކުރި ޗައިނާ މީހާގެ ރެކޯޑު ކުރިން އޮތް މީހާ އެވެ. އޭނާ ވަނީ ޝެންޒަރު-11 ގައި 2016 ގައި ޖައްވަށް ގޮސްފަ އެވެ.
މިއީ ޖައްވީ ސްޓޭޝަންގެ މަސައްކަތަށް އެސްޓްރޮނޯޓުން ހިމެނޭހެން ޗައިނާ އިން ކުރި ތިންވަނަ ދަތުރެވެ. އެ ގައުމުން އަންނަނީ އަންނަ ޑިސެމްބަރަށް އެ ސްޓޭޝަންގެ މަސައްކަތްތައް އެއްކޮށް ނިންމާލުމަށް މަސައްކަތް ކުރަމުންނެވެ.
މިއަހަރު ނިމުމުގެ ކުރިން ޗައިނާ އިން ޖައްވަށް އިތުރު ހަ ދަތުރު ކުރާނެ އެވެ. އޭގެ ތެރެއިން އެސްޓްރޮނޯޓުން ބައިވެރިވާނީ އެއް ދަތުރުގަ އެވެ.
ޗައިނާގެ ޖައްވީ މިޝަން އަށް އެ ގައުމުގެ ސަރުކާރުން ދަނީ ބިލިއަން ޑޮލަރުން އިންވެސްޓު ކުރަމުންނެވެ. އެ ގައުމުން ދަނީ 2035 ގެ ކުރިން ރަޝިއާ އާ ގުޅިގެން ހަނދުގައި ރިސާޗު ސްޓޭޝަނެއް ގާއިމުކުރުމުގެ މަސައްކަތް ކުރަމުންނެވެ.
