އައްޑޫ ސިޓީގައި ހިނގަމުން އަންނަ ސިލްސިލާ މާރާމާރިތަކާ ގުޅިގެން ކަންބޮޑުވުންފާޅުކޮށް، އެ ސިޓީއަކީ އަމާން ތަނަކަށް ހަދައިދިނުމަށް އައްޑޫ ސިޓީ ކައުންސިލުން ގޮވާލައިިފި އެވެ.
އައްޑޫގައި ހިނގި މާރާމާރީއެއްގައި ޒަހަމްވި މީހަކު އިއްޔެ ވަނީ މަރުވެފަ އެވެ. އެކަމާ ގުޅިގެން ކައުންސިލުން ނެރުނު ބަޔާނެއްގައި ބުނީ މީހުންނަށް އަނިޔާވެރިވުމާއި މާރާމާރީގެ އަމަލުތައް ކައުންސިިލުން އެއްވެސް ވަރަކަށް ބަލައި ނުގަންނާނެ ކަމަށެވެ.
"މި ކައުންސިލުން ދެކޭ ގޮތުގައި މީހުންގެ ފުރާއަށް ނުރައްކާވާ މިފަދަ އަމަލުތަކަކީ ވަރަށް ލާއިންސާނީ ދަށު ދަރަޖައިގެ އަމަލުތަކެއް،" ކައުންސިލުން ނެރުނު ބަޔާނުގައި ބުނެފައިވެ އެވެ.
އަދި އިސްލާމް ދީނުގެ އަސާސްތަކާއި ރާއްޖޭގެ ގާނޫނުއަސާސީއާ ގާނޫނުތަކާއި ރާއްޖެ ބައިވެރިވާ މުއާހަދާތަކުން މަނާކުރާ އަދި ހައްގުތަކެއް ކަށަވަރުކޮށްދެވިފައިވާ މުޖުތަމައެއްގައި މިފަދަ ކަންކަން ހިނގުމަކީ ކަންބޮޑުވާން ޖެހޭ ކަމަށް ބުނެފައިވެ އެވެ.
މި މައްސަލައިގައި ކުށްވެރިވާ ފަރާތްތަކަށް ގާނޫނުގައި ކަނޑައެޅިފައިވާ އެންމެ ހަރުކަށި އަދަބުދީ، ރަށު ތެރޭގައި އަމާންކަން ގާއިމްކޮށްދިނުން އަވަސްކުރުމަށް ދައުލަތުގެ މުއައްސަސާތަކާއި ކަމާބެހޭ އިދާރާތަކަށް ސިޓީ ކައުންސިލުން ވަނީ ގޮވާލާފަ އެވެ.
ބުދަ ދުވަހުގެ މެންދަމުގެ ވަގުތެއްގައި ހިނގި މާރާމާރީގައި މަރުވެފައިވަނީ އުމުރުން 21 އަހަރުގެ ޒުވާނެކެވެ. އޭނާ މަރުވެފައިވަނީ އައްޑޫ އީކުއިޓޯރިއަލް ހޮސްޕިޓަލުގައި ފަރުވާ ދެމުން ދަނިކޮށް އިއްޔެ ހެނދުނު އެވެ.
