ދުނިޔޭގެ އިގްތިސޯދަށް ކުރަމުން އަންނަ ނުރަނގަޅު އަސަރުތަކުގެ ސަބަބުން ރާއްޖޭގެ އިގްތިސޯދު ހީނަރުވިޔަ ނުދިނުމަށްޓަކައި ހުރިހާ ރައްޔިތުން ވެސް ހަރަދުތައް ކުޑަ ކުރަން ރައީސް އިބްރާހިމް މުހައްމަދު ސޯލިހު ރޭ ގޮވާލައްވައިފި އެވެ.
ރައީސް އޮފީހުގެ ދުވަސްވީ މުވައްޒަފުންގެ އަގު ވަޒަން ކުރުމުގެ ގޮތުން ރޭ ބޭއްވި ހަފުލާގައި ވާހަކަފުޅު ދައްކަވަމުން ރައީސް ވިދާޅުވީ މުޅި ދުނިޔެއަށް އަންނަ ސްޓްރެޓީޖިކް އަދި އިގްތިސޯދީ ބަދަލުތަކާ ގުޅިގެން އަޅުގަނޑުމެން އެންމެން ވެސް ވަރަށް ބޮޑަށް ސަމާލުވާން ޖެހޭ ކަމަށެވެ. މިކަމަށް ތައްޔާރުވުމަށް ޓަކައި ފަރުދީ ގޮތުން އަދާކުރަން ޖެހޭ ޒިންމާ ބޮޑު ކަމަށް ރައީސް ވިދާޅުވި އެވެ.
"މި ކަންކަމާ ކުރިމަތިލުމުގައި ވެސް، އެދެވޭ ނަތީޖާއެއް ނެރެވޭނީ ފަރުދީ ޒިންމާ އަދާކުރާ މިންވަރަކުން. އެންމެ މުހިންމު ކަމަކީ ހަރަދުތައް ކުޑަކުރުން. ކޮންމެ ކަމެއްގައިވެސް އިގްތިސޯދުކުރުމާއި ފަހަށް ރައްކާކުރުމަށް ސަމާލުކަން ދިނުން. ކަރަންޓު ހަރަދު ކުޑަކުރުން، ހަކަތައިގެ ބާވަތްތައް ބޭނުންކުރާ މިންވަރު ދަށްކުރުން،" ރައީސް ވިދާޅުވި އެވެ.
ރައީސް ވިދާޅުވީ ހަރަދު ކުޑަ ކުރުމާއި އިގްތިސޯދު ކުރުމުގެ ކަންކަން ފަރުދީ ގޮތުން ކުރިއަށް ގެންދިއުމުގެ ހެޔޮ ނަތީޖާ ގައުމީ ފެންވަރުގައި ފެންނާނެ ކަމަށެވެ.
"އެއީ އިގްތިސޯދީ ގޮތުން ގައުމީ ފެންވަރުގައި އުފުލަންޖެހޭ ބުރަ ކުޑަވެގެން ދިއުން. އިގްތިސޯދީ ހީނަރުކަމެއް މެދުވެރި ނުވެ، އިމްޕޯޓް އެކްސްޕޯޓް ނުހުއްޓި ކުރިއަށް ދިއުން. މިއީ އަޅުގަނޑުމެން ހަމަ ކޮންމެ ފަރުދަކު އެދޭނެ ކަންކަން." ރައީސް ވިދާޅުވި އެވެ.
"ގައުމުގެ ކޮންމެ ފަރުދަކުވެސް މި ކަންކަން ޢަމަލީ ގޮތުން ތަންފީޒުކުރެއްވުމަކީ އަޅުގަނޑުގެ ވަރަށް ބޮޑު އިލްތިމާސެއް,"
މީގެ އިތުރުން ރައީސް ވަނީ ސަރުކާރުގެ ތިމާވެށީގެ ސިޔާސަތުތަކަށް މުހިންމު އިސްކަމެއް ދިނުމަށް އެދިވަޑައިގެންފަ އެވެ. އެގޮތުން، އެއްފަހަރު ބޭނުންކުރާ ޒާތުގެ ޕްލާސްޓިކް ބޭނުންކުރުން ހުއްޓައިލުމަށާއި ރައްކާތެރިގޮތުގައި ކުނި ނައްތާލުމަށް ޓަކައި ކުނި ވަކި ކުރުމަކީ ފަރުދީ ޒިންމާއެއްގެ ގޮތުގައި ފާހަގަކުރެއްވި އެވެ.
