ލަންޑަން (ޖޫން 2) - ލިވަޕޫލާ އެކު، އެ ޓީމުގެ ތަރި މުހައްމަދު ސަލާހު އާ ކޮންޓްރެކްޓެއްގައި ސޮއިނުކޮށްފިނަމަ އޭނާ އިނގިރޭސި އެހެން ކްލަބަކުން ފެނުމުގެ ފުރުސަތު އެބައޮތް ކަމަށް މީޑިއާ ރިޕޯޓްތައް ބުނެފި އެވެ.
ސަލާހު، 29، ލިވަޕޫލާ އެކު ހަދާފައިވާ ކޮންޓްރެކްޓް އަންނަ ސީޒަނުގެ ނިޔަލަށް ހަމަވާނެ އެވެ. ސަލާހު ލިވަޕޫލްގައި މަޑުކުރަން ބޭނުންވި ނަމަވެސް އެއްބަސްނުވެވި އޮތީ މުސާރައަކާ މެދުގަ އެވެ. ރިޕޯޓްތައް ބުނާގޮތުން ސަލާހު ލިވަޕޫލްގައި މަޑުކުރަން ކިޔާ މުސާރަ އުޅެނީ ހަފްތާ އަކު 450،000 ޑޮލަރަށް ވުރެ މަތީގަ އެވެ.
ލިވަޕޫލުން ސަލާހު ބޭނުންވާ އެ މުސާރަ ދޭނަަމަ އެ ކްލަބްގެ މުސާރައިގެ އޮނިގަނޑަށް ބޮޑު ބަދަލެއް ގެންނަން ޖެހޭނެ އެވެ. އެހެންވެ، ލިވަޕޫލުން ހުށަހަޅާފައިވަނީ އެ ކްލަބުން ގެންގުޅޭ މުސާރައިގެ އޮނިގަނޑަށް ފެތޭ ގޮތަށް 30 އަހަރުގެ ނުވަތަ އެ އުމުރާ ގާތުގައި ހުރި ކުޅުންތެރިއަކަށް ދެވޭނެ އެންމެ ބޮޑު މުސާރަ ސަލާހު އަށް ދޭށެވެ. އެއީ ހަފްތާ އަކު 380،000 ޑޮލަރު ލިބޭ ގޮތަށެވެ. އެކަމަކު، ސަލާހާއި އޭނާގެ އޭޖެންޓް ރާމީ އައްބާސް އެ ހުށަހެޅުމާ މެދު ވަކި ގޮތެއްނުނިންމަ އެވެ.
ލިވަޕޫލުން ހުށަހަޅާފައި އޮތީ ކުރިން ލިބެމުން އައި މުސާރަ އަށް ވުރެ 15 ޕަސެންޓް އިތުރު އަދަދެކެވެ. އެކަމަކު، ސަލާހުގެ އޭޖެންޓް، އައްބާސް ދެކޭގޮތުގައި މިއީ ސަލާހު ދައްކަމުން އަންނަ ކުޅުމާ އަޅާކިޔާއިރު، ހައްގު މިންވަރެއް ނޫނެވެ. ރިޕޯޓްތައް ބުނާގޮތުން ސަލާހު ވަނީ ލިވަޕޫލާ އެކު ބޮޑު މުސާރަ އަށް ދެ އަހަރަށް ކޮންޓްރެކްޓް އާ ކުރަން ތައްޔާރަށް ހުރި ކަމަށް ބުނެފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުގައި ސަލާހު، ލިވަޕޫލް ދޫކޮށްލަން ޖެހިއްޖެނަމަ އިނގިރޭސި ޕްރިމިއާ ލީގުގެ އެހެން ކްލަބަށް ބަދަލުވުމުގެ ފުރުސަތު އެބައޮތެވެ.
އިޓަލީގެ އޭއެސް ރޯމާ ދޫކޮށް 2017 ވަނަ އަހަރު 40 މިލިއަން ޑޮލަރަށް ލިވަޕޫލަށް ބަދަލުވި ސަލާހަކީ ފާއިތުވި ސީޒަންތަކުގައި ލިވަޕޫލްގެ އެޓޭކްގެ މައި ކުޅުންތެރިޔާ އެވެ. ސަލާހު ވަނީ ޕްރިމިއާ ލީގުގެ ރަން ބޫޓު ތިން ފަހަރެއްގެ މަތިން ހޯދައިފަ އެވެ.
ޕްރިމިއާ ލީގުގައި ސަލާހު އެންމެ ފުރަތަމަ ކުޅުނީ ޗެލްސީ އަށެވެ. ސްވިޒަލެންޑްގެ ކްލަބް، ބަސެލް ދޫކޮށް 2014 ވަނަ އަހަރު ޗެލްސީ އަށް ބަދަލުވެ، ސަލާހަށް އެ ޓީމުގައި ރަނގަޅު ކުޅުމެއް ނުދެއްކި، ޖެހުނީ ލޯން އެއްބަސްވުމެއްގެ ދަށުން އިޓަލީގެ ފިއޮރެންޓީނާ އާއި ރޯމާ އަށް ކުޅޭށެވެ. އިޓާލިއަން ލީގުގައި ކުޅެގެން ކެރިއަރު ހަމަޔަކަށް އަޅުވައި، ސަލާހު ޕްރިމިއާ ލީގަށް ބަދަލުވެ، ލިވަޕޫލް ޖޯޒީގައި އަންނަނީ ތަފާތު މޮޅު ކުޅުމެއް ދައްކަމުންނެވެ.
މި ފަހަރުގެ ޓްރާންސްގާ މާކެޓްގައި ލިވަޕޫލްގެ ސެނެގާލް ފޯވާޑް، ސަޑިއޯ މާނޭ އެ ކްލަބް ދޫކޮށްލާނެ ކަމަށް މީޑިއާ ރިޕޯޓްތައް ބުނެ އެވެ. އަންނަ އަހަރުގެ ޖޫން މަހުގެ ނިޔަލަށް ލިވަޕޫލްގެ ކޮންޓްރެކްޓްގައި ހުރި މާނޭ ގަންނަން އެންމެ ބޮޑަށް މަސައްކަތް ކުރަނީ ޖަރުމަނުގެ ޗެމްޕިއަން، ބަޔާން މިއުނިކް އެވެ. ބަޔާނުން އޮތީ މާނޭގެ ސޮއި ހޯދަން 35 މިލިއަން ޑޮލަރު ދޭން ތައްޔާރަށެވެ.
ހިލޭ ޓްރާންސްފާއެއްގެ ދަށުން ލިވަޕޫލްގެ ބެލްޖިއަމް ފޯވާޑް، ޑިވޮކް އޮރީގީ ވަނީ އިޓަލީގެ ޗެމްޕިއަން، އޭސީ މިލާނާ ގުޅެން ނިންމައިފަ އެވެ. އޮރީގީގެ އިތުރުން މާނޭ ވެސް ލިވަޕޫލް ދޫކޮށްލުމުގެ ފުރުސަތު އޮތްއިރު، ލިވަޕޫލުން ކުރިއަށް އޮތް ޓްރާންސްފާ މާކެޓްގައި ފޯވާޑެއް ގެންނާނެ ކަމަށް ބެލެވެ އެވެ. ލިވަޕޫލުން އެންމެ ބޮޑަށް ފާރަލަނީ ބެންފީކާ އަށް ކުޅޭ އުރުގުއޭގެ ފޯވާޑް، ޑާވިން ނޫނޭޒް އަށެވެ.
