ހަތަރު ސްކޫލަކަށް ޒަމާނީ ތައުލީމު ދިނުމަށް ބޭނުންވާ ވަސީލަތްތަކެއް އެލައިޑުން ހަދިޔާކޮށްފިއެވެ.
އެލައިޑްގެ އިޖްތިމާއީ ޒިންމާގެ ދަށުން 'ސްކޫލް ޑިޖިޓަލައިޒޭޝަން ޕްރޮގްރާމް' މެދުވެރިކޮށް ތަކެތި ހަދިޔާކޮށްފައިވަނީ ފ.އަތޮޅު ސްކޫލާއި ހުރަވީ ސްކޫލާއި އިއްޒުއްދީން ސްކޫލް އަދި ޖަމާލުއްދީން ސްކޫލަށެވެ.
ސްކޫލްތަކަށް ތަކެތި ހަވާލުކޮށްދިނުމަށް މިއަދު އެލައިޑް އޮފީހުގައި ބޭއްވި ރަސްމިއްޔާތުގައި ވާހަކަ ދައްކަވަމުން ޖެނެރަލް މެނޭޖާ އިބްރާހިމް ފިރުޝާން ވިދާޅުވީ، ރާއްޖޭގެ ހުރިހާ ހިސާބެއްގެ ސްކޫލްތަކާއި އެކު އަބަދުވެސް ބަދަހި ގުޅުމެއް ބޭއްވުމަށް އެ ކުންފުނިން މަސައްކަތް ކުރާ ކަމަށެވެ. ކުރިއަށް އޮތްތަނުގައި ވެސް ދަރިވަރުންގެ ތައުލީމީ ހަޔާތް ކާމިޔާބުކަމާ އެކު ނިންމާލުމަށް ބޭނުންވާ ފުރުސަތުތައް ފަހި ކޮށްދީ ވަސީލަތްތައް ހަރުދަނާކުރުމަށް އެލައިޑުގެ އެހީތެރިކަން ދޭނެ ކަމުގެ ޔަގީންކަން ވެސް ދެއްވި އެވެ.
އެލައިޑް ގެ ސީއެސްއާރް ޕްރޮގްރާމް، 'ޕްރިމިއަމް ފޯ ގުޑް' ގެ ދަށުން އިތުރު އެހެން ސްކޫލްތަކަކަށް ވެސް އެހީތެރިކަން ފޯރުކޮށްދިނުމަށް ހަމަޖެހިފައިވެ އެވެ. .
2018 ވަނަ އަހަރު ލޯންޗްކޮށްފައިވާ 'ޕްރިމިއަމް ފޯ ގުޑް' އަކީ އެލައިޑްގެ އިޖްތިމާއީ ޒިންމާއަށް ހާއްސަ އިސްނެގުންތައް ދެމެހެއްޓެނިވި ގޮތެއްގައި ކުރުމަށް އެކުލަވާލާފައިވާ އޮނިގަނޑެކެވެ. އެގޮތުން ޔޫއެންގެ ދެމެހެއްޓެނިވި ތަރައްގީއަށް މަސައްކަތް ކުރުމަށް ކަނޑަޅާފައިވާ ލަނޑުދަނޑިތަކުގެ ތެރެއިން ފެންވަރު ރަނގަޅު ތައުލީމަކީ 'ޕްރިމިއަމް ފޯ ގުޑް' ގެ އެންމެ މުހިންމު އެއް އަސާސެވެ.
