އުމުރުން ހަ އަހަރުގެ ކުޑަ އަންހެން ކުއްޖަކަށް އައްޑޫ ސިޓީގައި ޖިންސީ ގޯނާ ކުރި މައްސަލާގައި ހައްޔަރުކުރި އުމުރުން 59 އަހަރުގެ އަންހެން މީހާގެ ޝަރީއަތް ނިމެންދެން ބަންދު ކުރަން އައްޑޫ ސިޓީ ހިތަދޫ މެޖިސްޓްރޭޓް ކޯޓުން ނެރުނު އަމުރަށް ސުޕްރީމް ކޯޓުން ވެސް ތާއީދުކޮށްފި އެވެ.
މި މައްސަލަ އައިމިނަދިޔެގެ ފަރާތުން ސުޕްރީމް ކޯޓުގައި އިސްތިއުނާފް ކުރީ ހައި ކޯޓުގައި އިސްތިއުނާފް ކުރި ނުކުތާތަކަށެވެ. ހައި ކޯޓުން ވެސް ވަނީ ހިތަދޫ ކޯޓުގެ އަމުރު ދަމަހައްޓައިފަ އެވެ.
މިއަދު ސުޕްރީމް ކޯޓުގައި މި މައްސަލައިގެ ހުކުމް ކުރަން ބޭއްވި އަޑުއެހުމުގައި ރައުޔައެއް އިއްވީ ފަނޑިޔާރު މަހާޒް އަލީ ޒާހިރެވެ. މަހާޒްގެ ރައުޔައަށް ބެންޗުގައި ދެން އިންނެވި ފަނޑިޔާރު ހުސްނުއްސުއޫދާއި، ރިޔާސަތު ބެލެހެއްޓެވި އުއްތަމަ ފަނޑިޔާރު މުއުތަސިމް އަދުނާން ވެސް ތާއީދު ކުރެއްވި އެވެ.
"ޝަރީއަތް ނިމެންދެން ބަންދު ކުރުމުގައި ހިތަދޫ މެޖިސްޓްރޭޓް ކޯޓުން ގޮތެއް ނިންމީ، ކުޑަކުދިންނަށް ޖިންސީ ގޯނާ ކުރާ މީހުންނަށް ހާއްސަ އުސޫލުތަކަކުން އަމަލު ކުރުމުގެ ގާނޫނަށް ރިއާޔަތްކޮށް، އެ ގޮތަށް ބަންދު ކުރުމަށް އެދި ދައުލަތުން ހުށަހެޅި ހެކިތަކަށް ރިއާޔަތްކޮށްފައި،" ފަނޑިޔާރު މަހާޒް ވިދާޅުވި އެވެ.
ދައުލަތުން ދަށު ކޯޓުގައި ތިން ހެއްކެއް ހުށަހަޅާފައިވެ އެވެ. އެއީ ކުއްޖާގެ މަންމައަށް އަނިޔާ ކުރި ގޮތް ކިޔާދީފައިވުމާއި، އަނިޔާ ލިބުނު ކުއްޖާގެ މެޑިކޯ ލީގަލް ރިޕޯޓްއާއި، ސްކޫލްގައި ކުއްޖާގެ ބެލުމާ ހަވާލުވެ ހުރި ފަރާތުގެ ބަޔާނެވެ.
މީގެ އިތުރުން ހެކިބަސް ދޭން ތިބި މީހުންގެ ތެރޭގައި އައިމިނަދިޔެއާއެކު މަސައްކަތް ކުރާ މީހުން ތިބުމުން ހެއްކަށް ނުފޫޒު ފޯރުވުމުގެ ފުރުސަތު އޮންނާނެ ކަން ވެސް ފަނޑިޔާރު ފާހަގަ ކުރެއްވި އެވެ.
މީގެ އިތުރަށް އައިމިނަދިޔެގެ ބެލުމުގެ ދަށުގައި 18 އަހަރު ނުފުރޭ ކުޑަ ތިން ކުދިން ތިބުމާއި، އޭނާ ހުރީ ގިނަ އަދަދެއްގެ ކުޑަކުދިން ކިޔަވާ ސްކޫލެއްގެ ޒިންމާދާރު މަގާމެއްގައި ކަމުން، އެފަދަ ކުށެއްގެ ޝިކާރައަކަށް އިތުރު ކުއްޖަކު ވެދާނެތީ ބަންދު އަމުރު ނެރެން ނިންމި ނިންމުން ރަނގަޅު ކަމަށް ފަނޑިޔާރުންގެ އިއްތިފާގުން ކަނޑައެޅުއްވި އެވެ.
އައިމިނިދިޔެ ޝަރީއަތް ނިމެންދެން ބަންދު ކުރަން ނިންމީ ރަނގަޅަށް ކަމަށް ސުޕްރީމް ކޯޓުން ނިންމިއިރު، ދައުވާ ކުރެވޭ ވަރަށް ހެކި ނެތް ކަމަށް ބުނެ ޕްރޮސެކިއުޓާ ޖެނެރަލްގެ އޮފީހުން ނިންމީ އައިމިނިޔަދެއަށް ދައުވާ ނުކުރުމަށެވެ. އެހެންވެ އޭނާ ވަނީ ބަންދުން ދޫކޮށްލައިފަ އެވެ.
