ސްކައުޓް ހަރަކާތް މިހާރަށްވުރެ ފުޅާކޮށްގެން އިޖުތިމާއީ ގޮތުން ހާއްސަކޮށް ޒުވާނުންނަށް ދިމާވެފައިވާ ގިނަ މައްސަލަތަކަށް ހައްލު ހޯދޭނެ ކަމަށް ގަބޫލުކުރައްވާ ކަމުގައި ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
ރާއްޖޭގެ 66 ވަނަ ގައުމީ ސްކައުޓް ދުވަހުގެ މުނާސަބަތުގައި ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ ސްކައުޓް ހަރަކާތަކީ ހެދިބޮޑުވަމުން އަންނަ ކޮންމެ ކުއްޖަކަށް ވެސް ވަރަށް ބޭނުންތެރި ހަރަކާތެއް ކަމަށެވެ.
"ސްކައުޓް ހަރަކާތްތައް ރޭވިފައި އޮންނަ ގޮތުން، ފަރުދީ މަސްއޫލިއްޔަތުތަކުގެ އިތުރުން، އާއިލީ ޒިންމާތަކާއި، އިޖްތިމާއީ ޒިންމާތަކަށް ކުދިންގެ ސިކުނޑިތައް ވަރަށް ބޮޑަށް ހުޅުވިގެންދޭ،" އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި ގައުމުގެ މުސްތަގުބަލުގެ ޖީލެއް ބިނާކުރުމުގެ މުހިންމު ދައުރެއް އަދާކުރާ ސްކައުޓް ހަރަކާތުގައި ކުދިން އާންމުކޮށް ބައިވެރިވަނީ އެންމެ ގިނަ ވެގެން ގްރޭޑް 12 ނިމެންދެނެވެ.
އެކަމަކު އެމަނިކުފާނު ވިދާޅުވީ އުމުރުން 18 އަހަރަށް ފަހަރު ދެން އަންނަ ދުވަސްތަކަކީ ކުދިންނާމެދު އެންމެ ސަމާލުވާންޖެހޭ އުމުރުފުރާ ކަމަށާއި، ނަމަވެސް އޭގެ ފަހުން ބައެއް ކުދިންނަށް ކުރިމަތިވާ ހުސްކަމެއްގެ ތެރެއިން ނުބައި މަގަކަށް އަނބުރާލާ ހާލަތު އަންނަ ކަމަށެވެ.
"...މި ދެންނެވި ހުސްކަމާ ބައްދަލުވުމުން، އެކުދިންގެ ހަޔާތަށް ވަރަށް ނުރަނގަޅު އަސަރުތަކެއް އެބަ ފޯރާ. މަސްތުވާތަކެތީގެ ވަބާގައި ޖެހުމާއި، ގޭންގު ކުށްތަކަށް ދެވިހިފުންފަދަ، އިޖްތިމާއީ މައްސަލަތަކުގެ ތެރެއަށް ކުދިން ދަމައިގަންނަނީ މިއުމުރު ފުރާގައި،" ރައީސް ފާހަގަކުރެއްވި އެވެ.
މިއީ އެމަނިކުފާނު ވިދާޅުވި ގޮތުގައި ސްކައުޓް ހަރަކާތް ފުޅާކުރަންޖެހޭ މައިގަނޑު ސަބަބެވެ.
ބާކީވެ ހާވިޔާވެގެން އުޅޭ ޒުވާނުންނަށް ސްކައުޓް ހަރަކާތްތައް އަމާޒުކުރެވިިއްޖެނަމަ، ވަރަށް ގިނަ ޒުވާނުން ސަލާމަތުގެ އައްސޭރިއަށް ގެންދެވޭނެ ކަމަށް ރައީސް ގަބޫލުކުރައްވަ އެވެ.
މިގޮތުން، ކަމެއް ނެތި ބާކީވެފައި ތިބޭ ކުދިންގެ އަދަދު މަދުކުރެވުމަކީ ކުށަށް އަރައިގަންނަ ކުދިން ވެސް މަދުކުރެވި އިޖްތިމާއީ ވަރަށް ގިނަ މައްސަލަތަކަށް ލިބޭނެ ހައްލަކަށް ވެސް ވާނެ ކަމަށް އެމަނިކުފާނު ވިދާޅުވި އެވެ.
"...ސްކައުޓް ހަރަކާތް މިހާރަށްވުރެ ފުޅާ ކުރެވިއްޖިއްޔާ، އަޅުގަނޑުމެންގެ ތެރޭގައި ހުރި ވަރަށް ގިނަ އިޖްތިމާއީ މައްސަލަތަކަށް ހައްލުތަކެއް ހޯދޭނެ. މަސްތުވާތަކެތީގެ މައްސަލަތަކާއި، ގޭންގު ކުށްތަކާއި، ގެވެށި އަނިޔާގެ މައްސަލަތަކާއި، ޖިންސީ ގޯނާގެ މައްސަލަތަކަށްވެސް، އެދެވޭ ހައްލެއް ފެންނާނެ ކަމަށް އަޅުގަނޑަށް ގަބޫލުކުރެވޭ،" ރައީސް ވިދާޅުވި އެވެ.
މި ކަންކަމަށް އަމާޒުކޮށްގެން ސްކައުޓް ހަރަކާތްތައް ފުޅާކުރުމަށްޓަކައި، ސަރުކާރުގެ ފަރާތުން ދޭންޖެހޭ ހުރިހާ އެއްބާރުލުމެއް، ސަރުކާރުގެ ހުރިހާ އިދާރާތަކަކުން ދޭނެކަމުގެ ޔަގީންކަންވެސް އެމަނިކުފާނު ރޭ ވަނީ ދެއްވައިފަ އެވެ.
