ފުލޯކު ވާހަކަތައް އާންމުކޮށް ފަށާ އުޅެނީ "އެއް ސަހަރެއްގައި އުޅުނޯ" އިންނެވެ؛ އެ ފެށުމުން ސިފަކޮށްދެނީ މާ ދުރު މާޒީއެކެވެ. ނޫނީ ހިޔާލީ ދުނިޔެއެކެވެ.
އެކަމަކު އެފަދަ ފުލޯކު ވާހަކައެއްގެ ފެށުން ތަފާތުކޮށް ސިފަކުރެވިދާނެ ގޮތެއް ގާނޫނު ހަދާ މަޖިލީހުގައި މިދިޔަ ހަފްތާގެ ތެރޭގައި ވަނީ އިވިގެން ގޮސްފަ އެވެ. އެކި އިންތިހާބުތަކާ ދިމާކޮށް ސިޔާސީ ވެރިން އަމުނާލައި ވައުދު ނާމާއަކީ ފުލޯކު ވާހަކަތަކެއްގެ ގޮތުގައި ގިނަ ރައްޔިތުން ގަބޫލުކުރާތާ އެތައް ޒަމާނެއް ވެއްޖެ އެވެ. ނަމަވެސް، މަޖިލީހުގެ ތަޅުމުގައި ދައުލަތުގެ ވަޒީރަކު ވަނީ އެކަމަށް ޒާތަކަށް އިއުތިރާފުވެވަޑައިގެންފަ އެވެ.
ސަރުކާރުން ވެފައިވާ ވައުދުތައް ނުފެއްދޭ ކަމުގެ ޝަކުވާ އަމާޒުވުމުން، އުމްރާނީ ތަރައްގީއާ ބެހޭ ވަޒީރު މުހައްމަދު އަސްލަމް ވިދާޅުވީ ސަރުކާރާއި ރައީސުލްޖުމްހޫރިއްޔާ ވެވަޑައިގެންނަވާ ކޮންމެ ވައުދަކީ ފުއްދޭނެ ވައުދުތަކެއް ނޫން ކަމަށެވެ.
"މި ޖަލްސާގައި މި ތިއްބެވި ސިޔާސީ ބޭފުޅުން، ހުރިހާ ބޭފުޅުން ވެސް ވައުދުވެވަޑައިގެންފައި ހުންނާނެ، ގިނަ ވައުދުތައް އަޅުގަނޑުމެން ފުއްދަން، ނުފުއްދޭ ވައުދުތައް ވެސް ހުރޭ، އަނެއްހެން ރައީސުލްޖުމްހޫރިއްޔާ ކަމުގައި ވިޔަސް، އަޅުގަނޑު ގަބޫލެއް ނުކުރަން ކުން ފަޔަކޫން ގެ އުސޫލު ހިނގާ ކަމަކަށް،" އަސްލަމް އެ ދުވަހު ވިދާޅުވި އެވެ.
އަސްލަމްގެ އިއުތިރާފާއެކު އާންމު އުސޫލުން ސޯޝަލް މީޑިޔާ ކެކި ބަންޑުންވުމުން، ވަޒީރުގެ އެ ވާހަކަ "ފަހުމް"ކޮށްދޭން ރައީސް އޮފީހުގެ ބޭފުޅަކު ގުޅުއްވައި މަސައްކަތް ކުރެއްވި އެވެ.
ވަޒީރުގެ ދިފާއުގައި އޭނާ މިސާލަކަށް ނެންގެވީ ދެ ރަށެއް ގުޅުވައިލަން ކޯޒްވޭ އަޅަން ވާ ވައުދެވެ. އޭނާ ވިދާޅުވި ގޮތުންނަމަ، ކޯޒްވޭ އަޅައިދޭން ރައީސުލްޖުމްހޫރިއްޔާ ވައުދުވެވަޑައިގަންނަވާ ފަހުން، އެކަން ކުރަން ދިރާސާކުރާއިރު އެކަން ކުރުމަކީ، އޭނާ ބޭނުން ކުރެއްވި ބަހުން ނަމަ "ފީޒިބަލް"ކަމަކަށް ނުވެދާނެ އެވެ.
މިއީ އޭނާ ވިދާޅުވި ގޮތުން ނަމަ، އަސްލަމް ވެސް އިޝާރާތް ކުރެއްވި ނުފެއްދޭ ވައުދެވެ.
އަސްލަމްގެ އިއުތިރާފު ދިފާއު ކުރައްވަން އެ ބޭފުޅާ ކުރެއްވި ސާބަސް ހައްގު މަސައްކަތުން އުފެދުނީ އިތުރު ސުވާލުތަކެވެ. ފުއްދޭނޭ ކަމަށް ބައްލަވައިގެން ރައީސް ވައުދުވެވަޑައިގަންނަވާއިރު، އެމަނިކުފާނަށް ލަފާދެއްވަން ދައުލަތުން ބޮޑެތި މުސާރަތައް ނަންގަވައިގެން ވަރުވަރުން މަގާމު ދީފައި ތިއްބަވާ އެޑްވައިޒަރުން ކުރައްވަނީ ކީއްތޯ މިއީ ފުރަތަމަ ސުވާލެވެ.
އެކަމަކު އެ ސުވާލު އިހަށް އެއްފަރާތުގައި ބާއްވާންޖެހެނީ އަސްލަމް ހަވާލުވެ ހުންނެވި އުމްރާނީ ތަރައްގީއާ ގުޅޭ އެންމެ މުހިންމު ދެ ޕޯޓްފޯލިއޯގެ ސަބަބުންނެވެ. ރައްޔިތުންނާއި ގައުމުގެ އުމްރާނީ ތަރައްގީ އާ ސީދާ ގުޅިފައިވާ ހައުސިން އަދި އިންފްރާސްޓްރަކްޗާގެ ހުރިހާ ވައުދެއް ތަންފީޒުކުރުމުގެ ބިޔަބޮޑު މަސައްކަތް ހަވާލުވެފައި އޮތީ އަސްލަމްގެ މިނިސްޓްރީއާ އެވެ.
އުމްރާނީ ތަރައްގީގެ ވައުދުތަކަކީ އޭގެ މަތީގައި ކޮންމެ ރައީސަކު ވެސް ވެރިކަމަށް ވަޑައިގަންނަވާ ދޫލަ ކަމަށްވާއިރު، އެ ހުރިހާ ވައުދުތަކަކީ ނުފުއްދޭނެ ވައުދުތަކެއްކަމަށް އެކަމާބެހޭ ތަޖުރިބާކާރު ވަޒީރު ވިދާޅުވުމަކީ ވަރުގަދަ ހޭލެވުމެކެވެ.
އަސްލަމްގެ ދިފާއުގައި ގުޅުއްވި ބޭފުޅާ ވިދާޅުވި ގޮތަށް "ފީޒިބަލް" ނޫން ވައުދުވާ ނަމަ، މެނިފެސްޓޯ ނޫނީ ވައުދު ނާމާއެކު ވަކިވަކި ވައުދުތަކުގެ ފީޒިބިލިޓީ ސްޓަޑީސް ވެސް ހިމަނަން ރައްޔިތުން ޑިމާންޑު ކުރަން ފަށަންވީ ހެއްޔެވެ؟ ބޭންކުން ލޯނެއް ހޯދަން މާލީ ހިސާބުތަކާއި މަޝްރޫއުއެއްގެ ހުރިހާ ފޯކާސްޓެއް ހުށަހަޅަންޖެހޭ ގޮތަށް، ސިޔާސީ ޕާޓީތަކާއި ވެރިން ރައްޔިތުންނަށް ވާ ވައުދުތަކުގައި އެކަން ކުރަން ލާޒިމު ކުރަންވީ ހެއްޔެވެ؟
ގަސްތުގައި ދޮގު ވައުދުވުމާއި، ދިމާވާ ކަމެއްގެ ސަބަބުން ވައުދު ނުފުއްދޭ ހާލަތު އައުމާ އެއީ ދެކަމެކެވެ. ފަހުން މިބުނި ހާލަތުގައި ވައުދު ނުފުއްދުނީ ހަމަ ހަގީގަތުގައި ވެސް އެކަން ވާން ނެތިގެން ކަމަށް ރައްޔިތުން ގަބޫލުކުރާނެ އެވެ. އެހެންނަމަވެސް ވައުދު ނުފުއްދޭ ސަބަބަކީ ވައުދުވީމީހާ 'ކޮސްގޮވާފައި އޮތުން' ކަމަށް ދޭހަކުރެވޭ ގޮތަށް ވަޒީރަކު، ރައްޔިތުންގެ މަޖިލީހުގައި، ރައްޔިތުންނަށް ޖަވާބުދާރީވަމުން ވިދާޅުވުމަކީ ދެރަވަރު ވާހަކަ އެކެވެ. ވާ ކޮންމެ ވައުދަކީ ކޮންމެހެން ފުއްދާނޭ ވައުދެއް ނޫންކަމަށް ބެލުމަށް ރައްޔިތުންނަށް ބުނެދިނުމަކީ ސިޔާސީ އަދި އިންތިހާބީ ވައުދުތަކުގެ ސީރިއަސްކަން ކަނޑުވާލި ބަޔާންކުރުމެކެވެ.
ކޮންމެޔަކަސް، "އެއް ސަހަރެއްގައި، އެއްސަހަރެއްގައި އުޅުނޯ.." އޭ ކިޔައިގެން އެ ފަށާ ވާހަކައަކީ ފުލޯކު ވާހަކައެއްކަން ހޭޖެހޭ އެންމެން ދަނެ އެވެ. މިނިސްޓަރު އަސްލަމްގެ އިިންޒާރަށްފަހު، "ވެރިކަމަށް އާދެއްވިޖެނަމަ..." އޭ ކިޔައިގެން ފަށާ ވައުދުނާމާ އަކީވެސް ފުލޯކު ވާހަކައެއްކަމަށް ގަބޫލުކުރެވި އެގޮތަށް ސިއްކަޖެހިގެން ދިއުމަކީ ދުރުކަމެއް ނޫނެވެ.
