ސަރުކާރުގެ ވިޔަފާރި ކުންފުނި، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އަށް މިދިޔަ އަހަރު ލިބުނު ފައިދާއިން ހިއްސާއަކަށް 65ރ. މަގުން 73.2 މިލިއަން ރުފިޔާ ބަހަން މިހާރު ކުރިޔަށްދާ އަހަރީ އާންމު ޖަލްސާގައި ފާސްކޮށްފި އެވެ.
މިދިޔަ އަހަރަކީ ވެސް އެސްޓީއޯގެ އާމްދަނީ ރެކޯޑް އަދަދަކަށް އުފުލުނު އަހަރެކެވެ. އެގޮތުން މުޅި އަހަރުގެ ތެރޭގައި އެ ކުންފުނީގެ ސަބްސިޑަރީ ހިމެނޭގޮތަށް އެސްޓީއޯ ގްރޫޕަށް 11.2 ބިލިއަން ރުފިޔާ ލިބުނެވެ.
މިއީ އޭގެ ކުރީ އަހަރަށް ވުރެ 32 ޕަސެންޓު އިތުރު އަދަދެކެވެ.
މި އާމްދަނީގެ ދެބައިކުޅަ އެއްބަޔަށް ވުރެ ބޮޑު ބަޔެއް ހިއްސާކުރަނީ އެ ކުންފުނިން ވިއްކާ ތެލެވެ. އަދި މިދިޔަ އަހަރު ރެކޯޑް އަދަދަކަށް މަސް ބޭރުކުރުމާ ގުޅިގެން، އެސްޓީއޯގެ ދަށުން އޮންނަ މިފްކޯގެ އާމްދަނީއާއެކީ ފިޝަރީޒް ސެކްޓާއިން ލިބުނު އާމްދަނީ އާއި ކޮންސްޓްރަކްޝަން ސާމާނާއި ބޭހާއި ކާބޯތަކެތި ވިއްކާ ޓްރޭޑިން ސެކްޓާއިން ވެސް ބޮޑު އާމްދަނީއެއް ލިބުނެވެ.
އެސްޓީއޯގެ 2021 ވަނަ އަހަރުގެ މާލީ އުސްއަލިތައް
- ޖުމްލަ ފައިދާ - 1.92 ބިލިއަން ރުފިޔާ
- ހިންގުމުގެ ފައިދާ - 451 މިލިއަން ރުފިޔާ
- ސާފު ފައިދާ - 288 މިލިއަން ރުފިޔާ
- ޓެކުހަށް ކެނޑުމަށް ފަހު ފައިދާ - 186 މިލިއަން ރުފިޔާ
އެސްޓީއޯ ކުންފުނީގެ އާމްދަނީ އާއި ޖުމްލަ ފައިދާ ރެކޯޑް އަދަދުތަކަށް އިތުރުވި ނަމަވެސް، މުޅި ގްރޫޕަށް ލިބުނު ސާފު ފައިދާ އާމްދަނީގެ ނިސްބަތުން ދަށެވެ. މިހެން ދިމާވި މައިގަނޑު ސަބަބަކީ ފިޝަރީޒް ސެކްޓާއިން އަހަރުގެ ކުރީކޮޅު ލިބުނު ގެއްލުންތައް ފޫބައްދަން ޖެހުމުން ކަމަށް ކުންފުނީގެ އަހަރީ ރިޕޯޓުގައި ފާހަގަކޮށްފައިވެ އެވެ.
އެސްޓީއޯއަކީ ދިވެހި ސަރުކާރު 82 ޕަސެންޓު ހިއްސާ އަދި އާންމުންގެ 18 ޕަސެންޓު ހިއްސާވާ ޕަބްލިކް ކުންފުންޏެކެވެ.
- އާންމު ހިއްސާދާރުން - 207،041 ހިއްސާ (18 ޕަސެންޓު)، ހިއްސާގެ ފައިދާ: 13,464,165ރ.
- ސަރުކާރު - 919،869 (82 ޕަސެންޓު)، ހިިއްސާގެ ފައިދާ: 59,791,485ރ
އެސްޓީއޯގެ ސަބްސިޑިއަރީތަކުގެ ގޮތުގައި ނުވަ ކުންފުންޏެއް ދަނީ ހިންގަމުންނެވެ. އެއީ، އެލައިޑު އިންޝުއަރެންސް، ފިއުލް ސަޕްލައި މޯލްޑިވްސް (އެފްއެސްއެމް)، މޯލްޑިވް ގޭސް، މޯލްޑިވްސް ސްޓްރަކްޗަރަލް ޕްރޮޑަކްޓްސް، މިފްކޯ، ރޭސުޓް މޯލްޑިވްސް ސިމެންޓް، މޯލްޑިވްސް ސްޓޭޓް ޝިޕިން އަދި އެސްޓީއޯ ސިންގަޕޯ އެވެ.
މީގެ ތެރެއިން ރޭސުޓް ސިމެންޓް އާއި މޯލްޑިވްސް ސްޓްރަކްޗަރަލް ޕްރޮޑަކްޓްސް ފިޔަވާ އެހެން ހުރިހާ ކުންފުންޏަކީ ސީދާ އެސްޓީއޯ އާއި އެސްޓީއޯގެ ސަބްސިޑަރީތަކުން ހިއްސާވާ ކުންފުނިތަކެކެވެ.
