އެމެރިކާގެ ޓެކްސަސްގެ ޕްރައިމެރީ އުމުރުފުރައިގެ ކުދިންނަށް ހާއްސަ ސްކޫލެއްގައި ބަޑި ޖަހައި 19 ކުދިންނާއި ދެ މީހުން މަރާލައިފި އެވެ.
ހަމަލާ ދިން މީހާ ހުއްޓުވުމަށް ފުލުހުން ބަޑި ޖެހުމުން އޭނާ ވެސް ވަނީ މަރުވެފަ އެވެ.
ފުލުހުން ބުނީ ޓެކްސަސްގެ އުވަލްދޭގައި ހުންނަ ރޮބް އެލެމެންޓްރީ ސްކޫލަށް ބަޑި ހިފައިގެން ހުރި މީހާ ވަނީ ހެނދުނު 11:30 ހާއިރު ކަމަށެވެ. އޭގެ ކުރިން އޭނާ ވަނީ އޭނާގެ މާމަގެ ގަޔަށް ބަޑި ޖަހައި، ދުއްވާފައި ދިޔަ އުޅަނދު ސްކޫލް ކައިރިން އެކްސިޑެންޓްވެފަ އެވެ. އޭނާގެ މާމަގެ ހާލު ސީރިއަސް އެވެ.
ޓެކްސަސް ޑިޕާޓްމަންޓް އޮފް ޕަބްލިކް ސޭފްޓީއިން ބުނީ ސްކޫލް ތެރެއަށް ވަނުމާ އެކު ކައިރިން ފެންނަ ތިބި އެންމެންގެ ގަޔަށް ބަޑި ޖަހަން ފެށި ކަމަށެވެ.
ޓެކްސަސްގެ ގަވަރުނަރު ގްރެގް އެބޮޓް ވިދާޅުވީ ހަމަލާ ދިނީ އުވަލްދޭގައި ދިރިއުޅޭ އުމުރުން 18 އަހަރުގެ ސެލްވޭޑޯ ރާމޯސް ނަމަކަށް ކިޔާ ފިރިހެނެއް ކަމަށެވެ.
އެމެރިކާގެ ރައީސް ޖޯ ބައިޑެން އެ ހަމަލާ ކުށްވެރި ކުރެއްވުމަށް ފަހު ވިދާޅުވީ އެމަނިކުފާނު ރައީސް ކަމަށް ވަޑައިގެންނެވީ މިކަހަލަ ކަމަކާ ކުރިމަތިލާން ނުޖެހޭނެ ކަމުގެ އުއްމީދުގައި ކަމަށެވެ.
ބައެއް ރިޕޯޓުތައް ބުނާ ގޮތުން އެމެރިކާގައި ބަޑި ގެންގުޅުމުގައި ހުރި އުސޫލްތައް ހަރުކަށި ކުރުމަށް ހަރުދަނާ ފިޔަވަޅު އެޅުއްވުމަށް ބައިޑެން ވަނީ ނިންމަވާފަ އެވެ. ނަމަވެސް މީގެ ކުރިން އެކަމާ ގުޅިގެން ކުރި މަސައްކަތްތަކަށް ވެސް ހުރަސް އެޅީ ޕާލިމެންޓު މެމްބަރުންނެވެ.
