ޓޯކިޔޯ، ޖަޕާން (މޭ 24) - ގަދަ ބާރުން ކަންކަން ބަދަލު ކުރުމާ ދެކޮޅު ކަމަށް ޖަޕާން، އޮސްޓްރޭލިއާ، އެމެރިކާ އަދި އިންޑިއާގެ ވެރިން ވިދާޅުވެއްޖެ އެވެ.
އެ ހަތަރު ގައުމު ހިމެނޭ ކުވޮޑް ގްރޫޕުގެ ވެރިންގެ ބައްދަލުވުމަށް ފަހު އަންގާރަ ދުވަހު ނެރުނު ބަޔާނުގައި ބުނީ ވަކިން ހާއްސަކޮށް އިންޑޯ ޕެސިފިކްގައި ގަދަ ބާރުން ކަންކަން ބަދަލު ކުރުން ބަލައިނުގަންނާނެ ކަމަށެވެ.
ގައުމުތަކުން އެހެން ބުނެފައިވާ އިރު، މިދިޔަ ފެބްރުއަރީ މަހު ރަޝިއާއިން ވެސް ޔޫކްރެއިނަށް ސިފައިން ފޮނުވައި ހަނގުރާމަ ފަށާފަ އެވެ. ތަޖުރިބާކާރުން ދެކޭ ގޮތުގައި ޔޫކްރެއިންގައި ކަންކަން ހިނގަމުންދާ ގޮތް ބަލައި، ޓައިވާންއާ މެދު ޗައިނާގެ ސްޓްރެޓެޖީ ބައްޓަން ކުރާނެ އެވެ.
ޖަޕާނުގެ ވެރިރަށް ޓޯކިޔޯގައި އޮތް ބައްދަލުވުމުގައި ބައިވެރިވެވަޑައިގެންނެވީ އެމެރިކާގެ ރައީސް ޖޯ ބައިޑެން، އިންޑިއާގެ ބޮޑު ވަޒީރު ނަރެންދްރަ މޯދީ، އޮސްޓްރޭލިއާގެ ބޮޑު ވަޒީރު އެންތޮނީ އަލްބަނީޒް އަދި ޖަޕާނުގެ ބޮޑު ވަޒީރު ފުމިއޯ ކިޝީޑާ އެވެ.
ގަދަ ބާރުން ކަންކަން ކުރުމާ ދެކޮޅު ކަމަށް ބަޔާނުގައި ބުނި ނަމަވެސް، ޗައިނާ އަދި ރަޝިއާގެ ނަން ފާހަގަކޮށްފައެއް ނުވެ އެވެ. ކުވޮޑް ގައުމުތަކުގެ ތެރެއިން މިހާތަނަށް ރަޝިއާ ކުށްވެރިކޮށްފައި ނުވަނީ ހަމައެކަނު އިންޑިއާއިންނެވެ.
