ޕެރިސް (މެއި 24) - ރެއާލް މެޑްރިޑްގެ ހުށަހެޅުމަށް ފުރަގަސްދީ، ޕީއެސްޖީގެ ކޮންޓުރެކްޓް އާކުރަން ނިންމިއިރު، ފްރާންސްގެ ރައީސް އެމަނުއެލް މެކްރޯންގެ ލަފާ ވެސް ހޯދި ކަމަށް ފްރާންސްގެ ތަރި ކީލިއަން އެމްބާޕޭ ބުނެފި އެވެ.
މި ސީޒަނަށް ފަހު ރެއާލަށް އެމްބާޕޭ ބަދަލުވާނެ ކަމަށް ބެލެވިފައި ވަނިކޮށް، އެމްބާޕޭ ވަނީ އެންމެ ފަހު ވަގުތު ޕީއެސްޖީގައި މަޑުކުރަން ނިންމައިފަ އެވެ. އެމްބާޕޭ، 23، ވަނީ އިތުރު ތިން އަހަރަށް ޕީއެސްޖީގެ ކޮންޓުރެކްޓް އާކުރަން ނިންމައިފަ އެވެ. އެކަން އިއުލާނުކުރީ ފްރެންޗް ލީގުގައި ޕީއެސްޖީން މި ސީޒަނުގައި ކުޅުނު ފަހު މެޗުގެ ކުރިންނެވެ.
ޕީއެސްޖީގައި މަޑުކުރަން ނިންމި ސަބަބު ކިޔައިދޭން އެމްބާޕޭ އިއްޔެ ވަނީ ޕީއެސްޖީގެ ނާސިރު އެލް ހެއްލާފީއާ އެކު ނޫސްވެރިންގެ ބައްދަލުވުމެއް ބާއްވައިފަ އެވެ. އެމްބާޕޭ ބުނީ ޕީއެސްޖީގެ ކޮންޓުރެކްޓް އާކުރުމަށް ނިންމުމުގެ ކުރިން، ފްރާންސްގެ ރައީސް މަކްރޯންއާ ވާހަކަދައްކައި، ލަފާ ހޯދި ކަމަށެވެ. އަދި ރައީސް މެކްރޯން ލަފާ ދެއްވީ ޕީއެސްޖީގައި މަޑުކުރުމަށް ކަމަށް އެމްބާޕޭ ބުންޏެވެ. .
"ރައީސްއާ ވާހަކަ ދައްކާލިން. ވަރަށް ރަނގަޅު ނަސޭހަތެއް ރައީސް ދިނީ. ރައީސް ބޭނުންވީ އަހަރެން ޕީއެސްޖީގައި މަޑުކުރަން،" އެމްބާޕޭ ބުންޏެވެ.
ޕީއެސްޖީގެ ރައީސް ނާސިރު އަލްހެއްލާފީ (ވ) އާއި އެމްބާޕޭ (ކ) ޖޯޒީ ދައްކާލަނީ.
އެމްބާޕޭ ބުނީ ޕީއެސްޖީގައި އޭނާ މަޑުކުރަން ނިންމިއިރު، މެކްރޯންގެ އިތުރުން ވެސް ވަރަށް ގިނަ ބައެއްގެ ލަފާ ހޯދި ކަމަށެވެ. އެމްބާޕޭ ޕީއެސްޖީގައި މަޑުކުރަން ފްރާންސްގެ ރައީސް ވަނީ މުހިންމު ޕްރޮޕޯސަލްތަކެއް ހުށަހަޅައިފަ އެވެ. އެ ގޮތުން އެމްބާޕޭ އަށް ވަނީ 2024 ވަނަ އަހަރު ޕެރިހުގައި ބާއްވާ އޮލިމްޕިކްސްގެ އެމްބަސަޑަރެއްގެ ރޯލު ހުށަހަޅައިފަ އެވެ.
ލަ ލީގާގެ ރައީސް، ޓެބާސް ވިދާޅުވީ ފާއިތުވި ސީޒަންތަކުގައި ބޮޑެތި ގެއްލުންތަކާއެކު ހިންގަމުންދާ ޕީއެސްޖީން، އެމްބާޕޭ އަށް ބޮޑު އަގެއް ހުށަހަޅައި، އޭނާ މަޑުކުރުވުމަކީ ފުޓްބޯޅަ އަށް ލިބުނު ލަދެއް ކަމަށެވެ. ޕީއެސްޖީ ބޮޑު އަގެއްގައި އެމްބާޕޭ ކޮންޓުރެކްޓް އާކުރާތީ، ލަ ލީގާ އިން ވަނީ އެ މައްސަލަ ޔުއޭފާ އަދި ޔޫރަޕިއަން ޔޫނިއަން އަށް ވެސް ހުށަހަޅާނެ ކަމަށް ބުނެފަ އެވެ.
ރިޕޯޓްތަކުން ބުނާ ގޮތުގައި ކޮންޓުރެކްޓް އާކުރަން ނިންމުމާ ގުޅިގެން، ޕީއެސްޖީން "ސައިނިން ފީ"އެއްގެ ގޮތުގައި އެމްބާޕޭ އަށް 150 މިލިއަން ޔޫރޯ ދިނުމަށް މީގެ ކުރިން އޮތީ ހުށަހަޅައިފަ އެވެ. އަދި ސީޒަނަށް 24 މިލިއަން ޔޫރޯ ދިނުމަށް އެ ކްލަބުން ތައްޔާރަށް އޮތް ކަމަށް ރިޕޯޓްތަކުން ބުނެ އެވެ.
ޕީއެސްޖީގެ ރައީސް ހެއްލާފީ ވިދާޅުވީ އެމްބާޕޭ ޕީއެސްޖީގައި މަޑުކުރަން ނިންމީ ފައިސާގެ ބޭނުމުގައި ނޫން ކަމަށާއި އެމްބާޕޭ ޝައުގުވެރިވީ ޕީއެސްޖީގައި އޮތް ސްޕޯޓިން ޕްރޮޖެކްޓަށް ކަމަށެވެ.
އެމްބާޕޭ އާއި ޕީއެސްޖީން ސޮއިކުރި އާ ކޮންޓްރެކްޓްގައިވަނީ ގިނަ ކަންތައްތަކެއް ހިމަނައިފަ އެވެ. އޭގެ ތެރޭގައި އެމްބާޕޭގެ އިމޭޖް ރައިޓްސްގެ 100 ޕަސެންޓް ކޮންޓްރޯލް އޮންނާނީ އަމިއްލަ އަތުގަ އެވެ. މާނަ އަކީ އެމްބާޕޭ އަށް ކްލަބްގެ ހުއްދަ ނެތި ބޭނުން އިސްތިހާރުތަކެއްގައި ބައިވެރިވެ، އޭނާގެ ބްރޭންޑް ވަރުގަދަ ކުރަން ކްލަބާ މަޝްވަރާ ކުރުމެއް ނެތި އަމިއްލަ އަށް ވިޔަފާރިކުރެވޭނެ އެވެ. އަދި ޕީއެސްޖީން ކޯޗަކު ހަމަޖެއްސުމާއި ޓްރާންސްފާ ބާޒާރުގައި ކުޅުންތެރިން ގަތުމުގައި އެމްބާޕޭގެ މަޝްވަރާ ހޯދާނެ ކަމަށް ރިޕޯޓްތައް ބުނެ އެވެ. މިއީ ކްލަބަކުން ކުޅުންތެރިއަކަށް މި ފަދަ ބޮޑެތި ބާރުތަކެއް ލިބޭ ގޮތަށް ހެދި ފުރަތަމަ ކޮންޓްރެކްޓެވެ.
