ޓޯކިޔޯ، ޖަޕާން (މޭ 23) - ޖަޕާނުގެ އެސްޓްރޮނޯޓަކު ހަނދަށް ފޮނުވަން އެމެރިކާއާ ގުޅިގެން މަސައްކަތް ކުރަން ނިންމައިފި އެވެ.
މީގެ ކުރިން ހަނދަށް ގޮސްފައި ވަނީ މުޅިން ވެސް އެމެރިކާގެ ރައްޔިތުންނެވެ. ޖަޕާނުން މީގެ ކުރިން ބުނެފައި ވަނީ 2030 ވަނަ އަހަރުގެ ކުރިން އެ ގައުމުގެ ރައްޔިތަކު ހަނދަށް ފޮނުވަން އުއްމީދު ކުރާ ކަމަށެވެ.
އެމެރިކާގެ ރައީސް ޖޯ ބައިޑެން ޖަޕާނަށް ވަޑައިގެން އެ ގައުމުގެ ބޮޑު ވަޒީރު ފުމިއޯ ކިޝީޑާއާ ބައްދަލުކުރެއްވުމަށް ފަހު ވިދާޅުވީ ހަނދަށާއި މާސްއަށް އިންސާނުން ފޮނުވުމަށް އެމެރިކާއިން ހިންގާ އާޓެމިސް ޕްރޮގްރާމްގައި ޖަޕާނުން ބައިވެރިވާނެ ކަމަށެވެ.
ބައިޑެން ވިދާޅުވީ ދެ ގައުމު ގުޅިގެން ކުރާނެ މަސައްކަތްތަކާ މެދު އުއްމީދު ބޮޑު ކަމަށެވެ. އެގޮތުން ހަނދުގެ އޯބިޓަށް ދަތުރު ކުރާ ގޭޓްވޭ ފެސިލިޓީގެ މަސައްކަތުގައި ޖަޕާނުން ބައިވެރިވާނެ އެވެ. އެއީ މުސްތަގްބަލުގައި ބާއްވާ މިޝަންތަކަށް އެހީވުމަށް ހަނދުގެ އޯބިޓަށް ފޮނުވާ ފެސިލިޓީ އެކެވެ.
"ހަނދު ވަށައި ދަތުރު ކުރާ ގޭޓްވޭ ސްޓޭޝަނުގައި ދެ ގައުމުން އެކުގައި ކުރާނެ މަސައްކަތާ މެދު އުއްމީދު ބޮޑު. އާޓެމިސް ޕްރޮގްރާމްގެ ދަށުން އަޅުގަނޑުމެންނާ އެކު ޖަޕާނުގެ އެސްޓްރޮނޯޓަކު ފުރަތަމަ ފަހަރަށް ހަނދަށް ދަތުރު ކުރަން މަގުފަހިވާނެ،" ބައިޑެން ވިދާޅުވި އެވެ.
ޖަޕާނުގެ ޖައްވީ ޕްރޮގްރާމުގައި ބޮޑަށް އިސްލަން ދެނީ ސެޓެލައިޓާއި ޖައްވީ އުޅަނދުތަކަށެވެ. އެހެންވެ، ޖަޕާނުގެ އެސްޓްރޮނޯޓުން ޖައްވުގައި ހުންނަ އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ދަތުރު ކުރަނީ އެމެރިކާ އާއި ރަޝިއާއާ އެކުގަ އެވެ.
ނަމަވެސް ޖަޕާނުގެ ޖައްވީ އިދާރާއިން މިހާރު މަސައްކަތް ކުރަނީ އޮޕަރޭޝަންތައް ފުޅާ ކުރުމަށެވެ. އެގޮތުން 13 އަހަރުގެ ތެރޭގައި ފުރަތަމަ ފަހަރަށް އާ އެސްޓްރޮނޯޓުންތަކެއް ރެކްރޫޓް ކުރީ މިދިޔަ އަހަރު އެވެ.
