ބަންދުގައި ހުރި ފަރާތެއް ދޫކޮށްލުމުގައި ހުރި ހެކިތަކަށް ބަލާފައި ނުވާތީ، ހުޅުމާލޭ މެޖިސްޓްރޭޓް ކޯޓުގެ އިސްމެޖިސްޓްރޭޓް ސިޔާމާ މުހައްމަދާ މެދު ސުލޫކީ ފިޔަވަޅު އެޅުމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ޖޭއެސްސީން މިއަދު ބުނީ ސިޔާމާއަށް ދެކޮޅަށް ހުށަހެޅުނު މައްސަލައަކީ އެ ކޯޓަށް ހުށަހެޅުނު މައްސަލައަކާ ގުޅިގެން ބަންދުގައި ހުރި ފަރާތެއް ދޫކޮށްލާ ސަބަބެއް ގޮތުގައި "ކުށުގެ ރެކޯޑު ފިޔަވާ އިތުރު ހެއްކެއް ހުށަހަޅާފައި ނުވާތީ" ކަމަށް ކޯޓުގެ އަމުރުގައި ބަޔާން ކޮށްފައި ވަނީއިތުރު އެހެން ހެކި ވެސް ހުއްޓާ ކަމަށް ކޯޓަށް ފުލުހުން ހުށަހެޅި ލިޔެކިޔުމުގައި ފާހަގަ ކޮށްފައި ވަނިކޮށް ކަމަށެވެ.
އެ މައްސަލައިގައި އޭނާ ދޫކޮށްލާފައިވަނީ ހުރި ހެއްކަކީ ކޮބައިތޯ ސާފުކުރުމެއް ނެތި ހަގީގަތާ ހިލާފަށްކަން އެނގޭ ކަމާއި، އަދި ތުހުމަތުކުރެވޭ ފަރާތް ބަންދުން ދޫކޮށްލިކަން ޝަރީއަތުގެ މަޖިލީހުގައި އިއުލާނު ކުރިއިރު، އެފަރާތުގެ ކުށުގެ ރެކޯޑު ފިޔަވާ އިތުރު ހެއްކެއް ނެތް ކަމުގެ މައްޗަށް ރިއާޔަތް ކުރިކަން ފާހަގަކޮށްފައިވާ ނުވާ ކަމަށް ޖޭއެސްސީން ބުންޏެވެ.
ޖޭއެސްސީން ބުނީ ސިޔާމާގެ އަމަލަކީ ފަނޑިޔާރުންގެ ސުލޫކީ މިންގަނޑާ ހިލާފު އަމަލަކަށްވާތީ، ސިޔާމާއަށް ނަސޭހަތް ދިނުމަށް ފަހު ކޮމިޝަނުން ކަނޑައަޅާ ތަމްރީނެއް ފުރިހަމަކުރުމަށް އަންގާ ކަމަށެވެ.
