ބެއިޖިން، ޗައިނާ (މޭ 23) - އެމެރިކާއިން އޭޝިއާއާ މެދު ގެންގުޅޭ ޑިޕްލޮމެޓިކް ސްޓްރެޓެޖީ ފެއިލް ވާނެ ކަމަށް ބުނެ، ޗައިނާއިން ފާޑުކިޔައިފި އެވެ.
އެމެރިކާގެ ރައީސް ޖޯ ބައިޑެން މި ވަގުތު އުޅުއްވަނީ އޭޝިއާއަށް ކުރައްވާ ދަތުރުފުޅެއްގައި ޖަޕާނުގަ އެވެ. ދެކުނު ކޮރެއާއަށް ފަހު ޖަޕާނަށް ވަޑައިގެންނެވި އިރު، މިއީ އެމަނިކުފާނު ރައީސް ކަމަށް ވަޑައިގެންނެވި ފަހުން އޭޝިއާއަށް ކުރައްވާ ފުރަތަމަ ދަތުރުފުޅެވެ.
އެމެރިކާގެ "އިންޑޯ-ޕެސިފިކް ސްޓްރެޓެޖީ" ގެ މަގްސަދަކީ ބައިބައިވުން އުފެއްދައި، ހަމަނުޖެހުމަށް މަގުފަހިކޮށް، ސުލްހައަށް ހުރަސް އެޅުން ކަމަށް ޗައިނާގެ ފޮރިން މިނިސްޓަރު ވާންގް ޔީ ވިދާޅުވި ކަމަށް ދައުލަތުގެ މީޑިއާ ޝިންހުއާއިން ބުންޏެވެ.
"އެ ސްޓްރެޓެޖީ ޕެކޭޖުކޮށް ނުވަތަ ފޮރުވައިގެން އުޅުނަސް، އެންމެ ފަހު ވަގުތު ވާނީ ހަމަ ފެއިލް،" ވާންގް ޔީ ވިދާޅުވި އެވެ.
އިންޑޯ-ޕެސިފިކް ސަރަހައްދުގައި އެމެރިކާގެ ލީޑާޝިޕް ވަރުގަދަ ކުރަން ކުއޯޑް ގްރޫޕްގެ ހާއްސަ ބައްދަލުވުމެއްގައި އަންގާރަ ދުވަހު ބައިޑެން ބައިވެރިވެވަޑައިގަންނަވާނެ އެވެ. އެ ބައްދަލުވުމުގައި އޮސްޓްރޭލިއާ، އިންޑިއާ އަދި ޖަޕާނުގެ ލީޑަރުން ވެސް ބައިވެރިވެ އެވެ.
އިރުމަތީ އަދި ދެކުނު ޗައިނާ ކަނޑުގައި ޗައިނާގެ ހަރަކާތްތަކާ މެދު އެމެރިކާއިން ހިތްހަމަނުޖެހެ އެވެ. ޓައިވާނަކީ ޗައިނާގެ ބައެއްގެ ގޮތުގައި ޗައިނާ ސަރުކާރުން ދެކުނު ނަމަވެސް، އެމެރިކާއިން އެކަމަށް ގޮންޖަހަ އެވެ. އޭގެ އިތުރުން ޗައިނާގެ ޝިންޖިއާންގައި މުސްލިމުންނާ ދެކޮޅަށް ޖަރީމާ ހިންގާ ކަމަށް އެމެރިކާއިން ތުހުމަތު ކުރެ އެވެ.
"ވަކިން ހާއްސަކޮށް އޮތް ނުރައްކަލަކީ ޓައިވާން ކާޑާއި ދެކުނު ޗައިނާ ކަނޑުގެ ކާޑު ބޭނުންކޮށްގެން، މި ސަރަހައްދަށް ހަމަނުޖެހުން ގެންނަން އެމެރިކާއިން މަސައްކަތް ކުރަމުން ދިޔުން،"ވާންގް ޔީ ވިދާޅުވި އެވެ.
