މެޑްރިޑް (މެއި 22) - ރެއާލް މެޑްރިޑްގެ ހުށަހެޅުމަށް ފުރަގަސްދީ، ޕީއެސްޖީގައި މަޑުކުުރުމަށް ފްރާންސްގެ ތަރި ކިލިއަން އެމްބާޕޭ ނިންމުމަކީ، ފުޓްބޯޅަ އަށް ލިބުނު ލަދެއްގެ ގޮތުގައި ލަ ލީގާގެ ރައީސް ހަވިއޭ ޓެބާސް ސިފަކުރައްވައިފި އެވެ.
މި ސީޒަނަށް ފަހު ރެއާލަށް އެމްބާޕޭ ބަދަލުވާނެ ކަމަށް ބެލެވިފައި ވަނިކޮށް، އެމްބާޕޭ ވަނީ އެންމެ ފަހު ވަގުތު ޕީއެސްޖީގައި މަޑުކުރަން ނިންމައިފަ އެވެ. އެމްބާޕޭ ،23، ވަނީ އިތުރު ތިން އަހަރަށް ޕީއެސްޖީގެ ކޮންޓުރެކްޓް އާކުރަން ނިންމައިފަ އެވެ. އެކަން އިއުލާނުކުރީ ރޭ ފްރެންޗް ލީގުގައި ޕީއެސްޖީން މި ސީޒަނުގައި ކުޅުނު ފަހު މެޗުގެ ކުރިންނެވެ.
މި ނިންމުމާ ގުޅިގެން، ލަ ލީގާގެ ރައީސް، ޓެބާސް ވިދާޅުވީ ފާއިތުވި ސީޒަންތަކުގައި ބޮޑެތި ގެއްލުންތަކާއެކު ހިންގަމުންދާ ޕީއެސްޖީން، އެމްބާޕޭ އަށް ބޮޑު އަގެއް ހުށަހަޅައި، އޭނާ މަޑުކުރުވުމަކީ ފުޓްބޯޅަ އަށް ލިބުނު ލަދެއް ކަމަށެވެ.
"ފާއިތުވި ސީޒަންތަކުގައި 700 މިލިއަން ޔޫރޯގެ ގެއްލުމެއް ކުރިމަތިވެ، 600 މިލިއަން ޔޫރޯ މުސާރަ އަށް ހޭދަކުރާ ކްލަބަކުން، އެމްޕާބޭ އަށް ބޮޑު އަގެއް ހުށަހަޅައި އެނާގެ ކޮންޓުރެކްޓް އާކުރުމަކީ، ފުޓްބޯޅަ އަށް ލިބުނު ވަރަށް ބޮޑު ލަދެއް،" ޓެބާސް ވިދާޅުވި އެވެ.
ޓެބާސް ވަނީ ޕީއެސްޖީގެ ރައީސް ނާސިރު އަލް-ހެއްލާފީ އަކީ "ސުޕަ ލީގަށްވުރެ ބޮޑު ނުރައްކަލެއް"ގެ ގޮތުގައި ސިފަކުރައްވައިފަ އެވެ.
ސުޕަ ލީގަކީ ޔޫރަޕްގެ ބައެއް ބޮޑެތި ކްލަބުތަކުން އަމިއްލަ އަށް އުފައްދަން އުޅުނު ލީގަށް ދިން ނަމެކެވެ. އެކަމަކު، ސަޕޯޓަރުންނާއި ފުޓްބޯޅައިގެ އިދާރާތަކުގެ ޕްރެޝަރާ ގުޅިގެން، ސުޕަ ލީގުގެ ޕްރޮޖެކްޓް ވަނީ ފެއިލްވެފަ އެވެ.
ރިޕޯޓްތަކުން ބުނާ ގޮތުގައި ކޮންޓުރެކްޓް އާކުރަން ނިންމުމާ ގުޅިގެން، ޕީއެސްޖީން "ސައިނިން ފީ"އެއްގެ ގޮތުގައި އެމްބާޕޭ އަށް 150 މިލިއަން ޔޫރޯ ދިނުމަށް މީގެ ކުރިން އޮތީ ހުށަހަޅައިފަ އެވެ. އަދި ސީޒަނަށް 24 މިލިއަން ޔޫރޯ ދިނުމަށް އެ ކްލަބުން ތައްޔާރަށް އޮތް ކަމަށް ރިޕޯޓްތަކުން ބުނެ އެވެ.
ޕީއެސްޖީ ބޮޑު އަގެއްގައި އެމްބާޕޭ ކޮންޓުރެކްޓް އާކުރާތީ، ލަ ލީގާ އިން ވަނީ އެ މައްސަލަ ޔުއޭފާ އަދި ޔޫރަޕިއަން ޔޫނިއަން އަށް ވެސް ހުށަހަޅާނެ ކަމަށް ބުނެފަ އެވެ. -- އޭއެފްޕީ
