ޒިއުރިކް، ސްވިޒަލެންޑް (މެއި 19) - މި އަހަރު ފަހުކޮޅުގައި ގަތަރުގައި ހޯސްޓްކުރާ ފީފާ ވޯލްޑް ކަޕްގައި އިންސާފުކުރުމުގެ ފުރުސަތު ތިން އަންހެން ރެފްރީ އަކަށް ދޭން ނިންމައިފި އެވެ. މިއީ ދުނިޔޭގައި ބޭއްވޭ އެންމެ ބޮޑު ފުޓްބޯޅަ މުބާރާތުގައި އަންހެން ރެފްރީންނަށް ފުރުސަތު ދިން ފުރަތަމަ ފަހަރެވެ.
ވޯލްޑް ކަޕަކުން ފެންނާނެ ފުރަތަމަ އަންހެން ތިން ރެފްރީންނަކީ ފްރާންސްގެ ސްޓެފަނީ ފްރަޕާޓް، ރުވާންޑާގެ ސަލީމާ މުކަންސަންގާ އަދި ޖަޕާނުގެ ޔޮޝީމީ ޔަމަޝީޓާ އެވެ. މި ތިން ރެފްރީންނާ އެކު ފީފާ އިން ވަނީ 36 ރެފްރީންގެ ޕޫލެއް ވޯލްޑް ކަޕަށް އެކުލަވާލައިފަ އެވެ. މީގެ އިތުރުން ވޯލްޑް ކަޕަށް ނެގި އެސިސްޓަންޓް ރެފްރީންގެ ޕޫލުގެ ތެރޭގައި ތިން އަންހެން އެސިސްޓަންޓް ރެފްރީން ވަނީ ހިމަނައިފަ އެވެ. އެއީ ބްރެޒިލްގެ ނެއުޒާ ބެކް، މެކްސިކޯގެ ކަރެން ޑިއާޒް މެޑީނާ އަދި އެމެރިކާގެ ކެތަރިން ނެސްބިޓް އެެވެ.
ފީފާގެ ރެފްރީސް ކޮމިޓީގެ ޗެއާމަން ޕެރްލުއީޖީ ކޮލީނާ ބުނީ ފުޓްބޯޅައިގެ ތާރީހުގައި ފުރަތަމަ ފަހަރަށް އަންހެން ރެފްރީންނަށް ފީފާ ވޯލްޑް ކަޕުން ފުރުސަތު ދިނުމަކީ ތާރީހީ ފިޔަވަޅެއް ކަމަށެވެ.
"މީގެއިން މި ސާބިތުކޮށްދެނީ އަހަރެމެންނަށް މުހިންމީ ކޮލިޓީ ރެފްރީންކަން. މީގެ ގޮތެއް ނިންމުމުގައި ޖިންސީ ތަފާތު ކުރުމެއް ނެތްކަން. ކުރިއަށް އޮތްތަނުގައި އަަހަރެންގެ އުންމީދަކީ ފިރިހެނުންގެ ބޮޑު މުބާރާތްތަކުގެ މެޗުތަކަށް އެއްވެސް ޖެހިލުމެއް ނެތި ނެގޭނެވަރުގެ ގިނަ އަދަދެއްގެ އެލީޓް ރެފްރީން ތިބުން،" ދުނިޔޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ، ކޮލީނާ ބުންޏެވެ.
ވޯލްޑް ކަޕްގައި ބައިވެރިވާ ރެފްރީންނަށް ކުރިއަށްގެންދާ ސެމިނާތަކެއް ވަނީ ޝެޑިއުލްކޮށްފަ އެވެ. ސެމިނާތައް ބާއްވާނީ ޕެރަގުއޭގެ އަސުންސިއޯން، ސްޕެއިންގެ މެޑްރިޑް އަދި ގަތަރުގެ ދޯހާގަ އެވެ.
ވޯލްޑް ކަޕުން ފުރުސަތު ލިބުނު ޔޫރަޕްގެ މަޝްހޫރު އަންހެން ރެފްރީ، ފްރަޕާޓް ވެފައިވަނީ ޔޫރޯ ތާރީހުގައި މުބާރާތުގައި މަސައްކަތް ކުރުމުގެ ފުރުސަތު ލިބުނު ފުރަތަމަ އަންހެން ރެފްރީ އަށެވެ. ފްރަޕާޓް ވަނީ ޔޫރަޕްގެ ގިނަ ރެކޯޑްތަކެއް މިހާތަނަށް ވެސް މުގުރާލައިފަ އެވެ.
ފްރަޕާޓަކީ ޔުއެފާ ސުޕަ ކަޕާއި ޔުއެފާ ޗެމްޕިއަންސް ލީގު އަދި ޔޫރޮޕާ ލީގުގެ މެޗެއްގައި އިންސާފުކުރި ފުރަތަމަ އަންހެން ރެފްރީ އެވެ. ފްރާންސް ފުރަތަމަ ޑިވިޝަން މެޗުތަކުގައި ވެސް ރެފްރީކަން ކުރަމުން އަންނަ ފްރަޕާޓް ފިރިހެން ގައުމީ ޓީމެއްގެ މެޗެއްގައި ފުރަތަމަ ފަހަރަށް ރެފްރީކަން ކުރީ މިދިޔަ އަހަރުގެ މާޗް މަހު ވޯލްޑް ކަޕް ކޮލިފައިންގައި ލެޓްވިއާ އަތުން 2-0 އިން ނެދަލެންޑްސް މޮޅުވި މެޗުގަ އެވެ.
އުމުރުން 35 އަހަރުގެ މުކަންސަންގާ އަކީ އެފްރިކާގެ އެންމެ މޮޅު ފުޓްބޯޅަ މުބާރާތް، އެފްރިކަން ކަޕް އޮފް ނޭޝަންސްގައި ރެފްރީކަން ކުރަން މިހާތަނަށް ފުރުސަތު ލިބުނު ހަމައެކަނި އަންހެން ރެފްރީ އެވެ. އޭނާ އަށް ފުރުސަތު ލިބުނީ މި އަހަރުގެ ޖެނުއަރީ މަހު ކެމަރޫންގައި ބޭއްވި އެފްރިކަން ކަޕުންނެވެ. މީގެ ކުރިން މުކަންސަންގާ ވަނީ އަންހެން ފުޓްބޯޅައިގެ ބޮޑެތި މުބާރާތްތަކެއްގައި ވެސް އިންސާފުކޮށްފަ އެވެ. އެ ގޮތުން 2019 ވަނަ އަހަރުގެ ފީފާ ވިމެންސް ވޯލްޑް ކަޕާއި އެފްރިކާގެ އަންހެން ފުޓްބޯޅަ މުބާރާތުގެ އިތުރުން އަންހެން ކްލަބް ޗެމްޕިއަންޝިޕްގައި މުކަންސަންގާ ވަނީ ރެފްރީކަން ކޮށްފަ އެވެ.
ޖަޕާނުގެ އަންހެން ފުޓްބޯޅައިގެ ގިނަ މުބާރާތްތަކާއި އޭޝިއާގެ ގިނަ މެޗުތަކެއްގައި ރެފްރީކަން ކުރި ޔޮޝީމާ ވަނީ 2019 ވަނަ އަހަރު ބޭއްވި އަންހެން ވޯލްޑް ކަޕާއި މިދިޔަ އަހަރުގެ އޮލިމްޕިކްސްގައި ރެފްރީކަން ކޮށްފަ އެވެ. ޔޮޝިމާ ވަނީ މިދިޔަ މަހު އޭއެފްސީ ޗެމްޕިއަންސް ލީގުގެ މެޗެއްގައި ވެސް ރެފްރީކަން ކޮށް އެ މުބާރާތުގެ ތާރީހުގައި މެޗެއްގެ ރެފްރީކަން ކުރި ފުރަތަމަ އަންހެން ރެފްރީގެ ޝަރަފް ހޯދައިފަ އެވެ.
