ކުރީގެ ނައިބު ރައީސް އަހްމަދު އަދީބު އިސްވެ އުފެއްދެވި މޯލްޑިވްސް ޓާޑްވޭ ޕާޓީ (އެމްޓީޑީ) ގެ އިސް މަގާމަކާ ރައީސް އޮފީހުގެ ކުރީގެ ތަރުޖަމާނު އިބްރާހީމް މުއާޒު އަލީ ހަމަޖައްސަން އުޅޭ ކަން އެނގިއްޖެ އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ތަރުޖަމާނަކަށް އޭރު ހުންނެވި މުއާޒު މިއަދު އެމްޓީޑީއަށް ސޮއިކުރެއްވީ މިއަދު އެވެ. އެކަން ހާމަކުރައްވަން އޭނާ ކުރެއްވި ޓްވީޓެއްގައި ވިދާޅުވީ ސިޔާސީ ދާއިރާގެ ކުރިމަގު އޮތީ އެމްޓީޑީގައި ކަމަށާއި ހާއްސަކޮށް ޒުވާނުންނާ އެންމެ ގާތުން މަސައްކަތް ކުރެވެން އޮތީ އެޕާޓީގައި ކަމަށް ގަބޫލު ކުރައްވާ ކަމަށެވެ.
"ޒުވާން މޫނުތަކެއް، އާ ހިޔާލުތަކެއް، އެކުވެރި މެންބަރުން، ބަދަހި ޓީމެއް،" އެމްޓީޑީއާ ވީހާ ވެސް ގިނަ ޒުވާނުން ބައިވެރިވާން ގޮވާލައްވައި މުއާޒު ލިޔުއްވާފައިވެ އެވެ.
"އަދަަދު"އަށް އެނގިފައިވާ ގޮތުގައި މުއާޒަށް ޕާޓީގެ އިސް މަގާމަކަށް ހަމަޖައްސަން ވަރަށް އަވަހަށް ޕާޓީގެ ކައުންސިލަށް ހުށަހަޅާނެ އެވެ. އެކަން ހަމަޖެހޭނީ ކައުންސިލުން އެ ގޮތަށް ފާސްކުރުމުންނެވެ.
ދެހާސްއަށާރަވަނަ އަހަރުގެ ރިޔާސީ އިންތިހާބަށް ފަހު ވެސް، އެ އިންތިހާބު އޮޅުވާލީ ކަމުގައި ޔާމީން ދެއްކެވި ވާހަކަތައް އެންމެ ބޮޑަށް ދިފާއު ކުރެއްވީ އެމަނިކުފާނުގެ ތަރުޖަމާނެއްގެ ގޮތުގައި އޭރު ހުންނެވި މުއާޒެވެ.
އެކަމަކު އެ އަހަރުގެ ފަހުކޮޅު އޭނާ ޔާމީނަށް ފާޑުވިދާޅުވެ އެކި ވާހަކަތައް ދައްކަވަން ފެއްޓެވީ ކުއްލިއަކަށެވެ.
