ލާމަރުކަޒީ ގާނޫނަށް ގެނައި އިސްލާހުތަކުގެ ދަށުން ކައުންސިލުތަކަށް ލިބޭ އާމްދަނީ އިތުރުކުރަން ކުންފުނި އުފައްދައިގެން ކުރެވޭ ވިޔަފާރިތަކުގެ ތެރޭގައި ގެސްޓް ހައުސް އާއި އަސާސީ ތަކެތި ވިއްކާ ފިހާރަތައް ވެސް ހިމަނައި ގަވައިދު އިސްލާހުކޮށްފި އެވެ.
އަތޮޅު އަދި ރަށު ކައުންސިލުތަކަށް މާލީ ބާރުވެރިކަންދީ ލާމަރުކަޒީ ނިޒާމު ހަރުދަނާ ކުރުމަށް މި ސަރުކާރުން ގާނޫނަށް ގެނައި ބޮޑެތި އިސްލާހުތަކުގެ ތެރޭގައި ކުންފުންޏާއި ކޯޕަރޭޓިވްސް އުފައްދައިގެން ވިޔަފާރި ކުރުމާއި އާމްދަނީ ހޯދުމުގެ މަގު ވަނީ ތަނަވަސްކޮށްދީފަ އެވެ.
ލާމާރުކަޒީ ގާނޫނުގައި ލޯކަލް އޮތޯރިޓީ ކުންފުނިތަކުން ކުރެވޭނެ ވިޔަފާރިތަކުގައި އަމަލު ކުރަންޖެހޭ އުސޫލުތައް ރެޖިސްޓްރާ އޮފް ކޮމްޕެނީސް ހަދާ ގަވާއިދުގައި ބަޔާން ކުރަންވާނެ ކަމަށް ބުނެފައިވާއިރު، އެ ގަވައިދު އިސްލާހުކޮށް އިކޮނޮމިކް މިނިސްޓްރީން މިއަދު ވަނީ އާންމުކޮށްފަ އެވެ.
އެ ގަވައިދު އިސްލާހުކޮށްފައިވަނީ ކުންފުނީގެ މަގުސަދުތައް ހާސިލުކުރުމަށްޓަކައި ހިންގާ ވިޔަފާރި ހަރަކާތްތައް ދެ ބާވަތަކަށް ބެހޭ ގޮތަށެވެ.
މިގޮތުން، ގަވާއިދުގައި އަލަށް ހިމަނާފައިވާ ޖަދުވަލުގައި ބަޔާންކޮށްފައިވާ ގޮތުގެ މަތީން ހުއްދަ ވިޔަފާރި ހަރަކާތްތައް ކައުންސިލުތަކަށް ހިންގޭނެ އެވެ.
އެ ޖަދުވަލުގައި ހިމަނާފައިވަނީ ސިޓީއެއްގައި ނުވަތަ ރަށެއްގައި ނުވަތަ އެ އަތޮޅެއްގައި އަމިއްލަ ފަރާތްތަކުން ވިޔަފާރިނުކުރާ ދާއިރާތަކެވެ.
އެ ޖަދުވަލުގައި ޖުމްލަ 15 ހަރަކާތެއް ކަނޑައަޅާފައިވާއިރު، އޭގެ ތެރޭގައި ގެސްޓް ހައުސް އަދި ޓޫރިސްޓު ހޮޓަލުން ފެށިގެން ތައުލީމު ދޭ ތަންތަނާއި ދަނޑުވެރިކަން، މަސް ޕްރޮސެސްކުރުން، އެއާޕޯޓު ހިންގުމާއި އަސާސީ ތަކެތި ވިއްކާ ފިހާރަތައް ވެސް ވަނީ ހިމަނައިފަ އެވެ.
titledesc
އެ ވިޔަފާރި ހަރަކާތްތައް ހިންގަން އުފައްދާ ކުންފުންޏެއްގައި ކައުންސިލުތަކުގެ 100 ޕަސަންޓް ހިއްސާ ވެވޭނެ ކަމަށް ވެސް ގަވައިދުގައި ބަޔާންކޮށްފައިވެ އެވެ.
ކުންފުނި އުފައްދައިގެން ކައުންސިލުތަކުން ހިންގޭ ދެވަނަ ބާވަތުގެ ވިޔަފާރި ހަރަކާތަކީ އަމިއްލަ ފަރާތްތަކުން ވިޔަފާރިކުރި ނަމަވެސް، އެކަށީގެންވާ މިންވަރަށް މުދާ ނުވަތަ ހިދުމަތް ފޯރުކޮށްނުދެވޭ ދާއިރާތަކެވެ.
އެ ދާއިރާތަކުގެ ތެރޭގައި ކޮންވެންޝަން ސެންޓަރު، ތައުލީމު ދޭ ތަންތަން، ހޮސްޕިޓަލު، ކްނިލިކް، ރިނިއުބަލް އެނާޖީ، ކުނި މެނޭޖް ކުރުން، ދަނޑުވެރިކަން، މަސް ޕްރޮސެސްކުރުން، އައިސް ޕްލާންޓް ގާއިމުކުރުން އަދި ބޯޓު ޔާޑު ގާއިމުކުރުން ހިމެނެ އެވެ.
ނަމަވެސް ވިޔަފާރި ކުރުމުގެ ހުއްދަ ދެވޭނީ ވިޔަފާރި ހަރަކާތްތަކެއް ހިންގާ މިންވަރަށް ރިއާޔަތްކޮށް، ވިޔަފާރީގެ ވާދަވެރިކަމަށް ކުރާނެ އަސަރާއި، ރައްޔިތުންނަށް ލިބޭނެ ފައިދާ މިންކުރުމަށްފަހުގައި ކަމަށް އެ ގަވައިދުގައި ބުނެފައިވެ އެވެ.
މީގެ އިތުރުން އެ ޖަދުވަލުގައި ނުހިމެނޭ ވިޔަފާރިއެއް ކުރަން ކައުންސިލުން ހުށަހަޅައިފިނަމަ، އިކޮނޮމިކް މިނިސްޓްރީން ހުއްދަ ދޭންވާނީ ލޯކަލް ގަވަމަންޓް އޮތޯރިޓީ (އެލްޖީއޭ)ގެ ލަފާ ހޯދައިގެން ކަމަށް ވެސް ގަވައިދުގައިވެ އެވެ.
މި ގަވާއިދުގެ ދަށުން ހުއްދަކޮށްފައިވާ ވިޔަފާރި ހަރަކާތް ފިޔަވައި، އެހެން ވިޔަފާރި ހަރަކާތެއް ހިންގާނަމަ، 10،000ރ.އިން ޖޫރިމަނާ ކުރެވޭ ގޮތަށް ގަވައިދު ވަނީ އިސްލާހުކޮށްފަ އެވެ.
އިކޮނޮމިކް މިނިސްޓްރީން ގަވައިދަށް ގެނައި އިސްލާހުތަކުގެ ތެރޭގައި ކުންފުނިތަކަށް ބޯޑު ޑިރެކްޓަރުން އައްޔަނުކުރުމާއި އެކައުންޓް ހުޅުވުން ފަދަ ކަންކަން ވެސް ވަނީ ހިމަނައިފަ އެވެ.
