ސޯލް، ދެކުނު ކޮރެއާ (މޭ 18) - އުތުރު ކޮރެއާގައި ކޮވިޑް ފެތުރުން ކޮންޓްރޯލް ނުކުރެވުނީ ދައުލަތުގެ އޮފިޝަލުންގެ ކަންނެތް ކަމާއި އިހުމާލާ ހެދި ކަމަށް ލީޑަރު ކިމް ޖޮންގް އުން ވިދާޅުވެއްޖެ އެވެ.
އުތުރު ކޮރެއާގައި ކޮވިޑް ފެތުރެމުންދާކަން ރަސްމީކޮށް އިއުލާނު ކުރީ މިދިޔަ ބުރާސްފަތި ދުވަހު އެވެ. ރިޕޯޓުތައް ބުނާ ގޮތުން ކޭސްތަކުގެ އަދަދު މިހާރު ވަނީ 1.7 މިލިއަނަށް އަރާފަ އެވެ.
ވެރިކަން ކުރާ ޕާޓީގެ ޕޮލިޓްބިޔުރޯގެ ބައްދަލުވުމެއްގައި އަންގާރަ ދުވަހު ކިމް ވިދާޅުވީ އޮފިޝަލުންގެ ކަންނެތް ކަމާއި އިހުމާލާ ހެދި ބަލީގެ ކޮންޓްރޯލް ދޫވެފައިވާ ކަމަށެވެ.
އަންގާރަ ދުވަހު އެކަނިވެސް ހުން އައިސްގެން 232،880 މީހުން ރިޕޯޓު ކުރި ކަމަށް ދައުލަތުގެ ނިއުސް އެޖެންސީ ކޭސީއެންއޭއިން ބުންޏެވެ. އެއާ އެކު ޖުމްލަ ކޭސްތައް 1.72 މިލިއަނަށް ވަނީ އަރާފަ އެވެ. މިހާތަނަށް މަރުވީ 62 މީހުންނެވެ.
ޕޮލިޓްބިޔުރޯ ބައްދަލުވުމުގައި ކިމް ވިދާޅުވީ "ބޮޑު އަލިފާން ފަރުބަދައެއްހެން ޕާޓީ ތެދުކޮށް" ވައިރަސް ފެތުރުން ކޮންޓްރޯލް ކުރައްވާނެ ކަމަށެވެ.
ކިމްގެ އާއިލާއިން ހަދިޔާ ކުރި ބޭސްތައް އުތުރު ކޮރެއާގެ ބައެއް ހިސާބުތަކުގައި ބަހާފައިވާ ކަމަށް ދައުލަތުގެ މީޑިއާއިން ބުނެ އެވެ. ބޭށް ސަޕްލައި ކުރުމުގައި 3000 އަށް ވުރެ ގިނަ ސިފައިން ބައިވެރިވެ އެވެ.
ކިމް ކުރިން ވިދާޅުވީ ބަލި ފެތުރެމުން ދާތީ ބޮޑެތި ތަކުލީފުތަކެއް ކުރިމަތިވާ ކަމަށެވެ. އުތުރު ކޮރެއާއަކީ އެންމެ ގޯސް ސިއްހީ ނިޒާމު އޮންނަ އެއް ގައުމެވެ.
އެ ގައުމުގައި އެއްވެސް ކޮވިޑް ވެކްސިނެއް، ބޭހެއް ވެސް އަދި އެއް ފަހަރާ ގިނަ ބަޔަކު ޓެސްޓު ކުރެވޭނެ ކެޕޭސިޓީއެއް ވެސް ނެތެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ އުތުރު ކޮރެއާގެ ހާލަތާ މެދު ކަންބޮޑުވުން ފާޅުކޮށްފަ އެވެ. އެ ގައުމުގައި އެއްވެސް މީހަކު ކޮވިޑް ވެކްސިން ޖަހާފައެއް ނުވެ އެވެ.
ކޮވިޑް ބަލިމަޑުކަން މުޅި ދުނިޔެއަށް ފެތުރުމުން، އުތުރު ކޮރެއާއިން ވަރަށް ހަރުކަށިކޮށް ބޯޑަރު ބަންދު ކުރި އެވެ. ތަޖުރިބާކާރުން ބުނީ އަވައްޓެރި ގައުމުތަކުގައި ބަލި ފެތުރޭ ނަމަ، ބޯޑަރު ބަންދު ކުރިޔަސް އުތުރު ކޮރެއާއާ ހަމައަށް ބަލި ފޯރާނެ ކަމަށެވެ.
ކިމް ވިދާޅުވެފައި ވަނީ އެ ގައުމުން އަމަލު ކުރާނީ ޗައިނާގެ މެނޭޖްމަންޓް ސްޓްރެޓެޖީ ބަލައި، އޭގެން ލިބޭ ފިލާވަޅުތަކުގެ އަލީގައި ކަމަށެވެ.
ޗައިނާގައި ގެންގުޅެނީ ޒީރޯ ކޮވިޑްގެ ސިޔާސަތެކެވެ. ބައެއް ބޮޑެތި ސިޓީތައް ލޮކްޑައުންކޮށްފައިވާ އިރު، އެއީ ދެމެހެއްޓެނިވި ސިޔާސަތެއް ނޫން ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ބުނެފަ އެވެ.
ޗައިނާ އާއި ޑަބްލިއުއެޗްއޯގެ ކޯވެކްސް ސްކީމުން ކޮވިޑް ވެކްސިން ހަދިޔާ ކުރަން އުޅުމުން، އުތުރު ކޮރެއާއިން ކުރިން ބުނީ ބޭނުން ނުވާ ކަމަށެވެ. ނަމަވެސް ބަލި ފެތުރޭކަން އިއުލާނު ކުރުމާ އެކު، ޗައިނާ އާއި ދެކުނު ކޮރެއާއިން ވަނީ ވެކްސިން ހަދިޔާ ކުރަން ތައްޔާރަށް ތިބި ކަމަށް ބުނެފަ އެވެ.
