ވޮޝިންޓަން، އެމެރިކާ (މޭ 18) - ފާއިތުވި 20 އަހަރު "އަންއައިޑެންޓިފައިޑް ފްލައިން އޮބްޖެކްޓް" (ޔޫއެފްއޯ) ނުވަތަ ކޯއްޗެއްކަން ނޭނގޭ ވައިގެ އުޅަނދު ފެނުން އިތުރުވި ކަމަށް އެމެރިކާގެ އިސް ދިފާއީ އޮފިޝަލަކު ވިދާޅުވެއްޖެ އެވެ.
ޔޫއެފްއޯއާ ގުޅޭ ގޮތުން ޕާލިމެންޓް މެމްބަރުންނަށް މައުލޫމާތު ދިނުމަށް ހުޅުވާލައިގެން ބޭއްވި ބައްދަލުވުމެއް މިދިޔަ އަންގާރަ ދުވަހު ކުރިއަށް ދިޔަ އެވެ. އެއީ ގާތްގަނޑަކަށް 50 އަހަރުގެ ތެރޭގައި ޔޫއެފްއޯއާ ގުޅޭ ގޮތުން އާއްމުކޮށް ހުޅުވާލައިގެން އެމެރިކާގައި ބޭއްވި ފުރަތަމަ ބައްދަލުވުމެވެ.
"ހުއްދަ ނެތް ނުވަތަ ކޯއްޗެއްކަން ނޭނގޭ ވައިގެ އުޅަނދު ނުވަތަ އުދުހޭ ތަކެތި، އަސްކަރިއްޔާއިން ކޮންޓްރޯލް ކުރާ ތަމްރީން ސަރަހައްދުތަކާއި އެހެން ވައިގެ ސަރަހައްދުތަކުން ފެނުން އިތުރު ވާން ފެށީ 2000 ވަނަ އަހަރަށް ފަހު،" ނޭވަލް އިންޓެލިޖެންސްގެ ޑެޕިއުޓީ ޑިރެކްޓަރު ސްކޮޓް ބްރޭ ވިދާޅުވި އެވެ.
ބްރޭ ވިދާޅުވީ ޔޫއެފްއޯ ފެނުން އިތުރުވީ އެ ތަކެތި ފެނިގެން ރިޕޯޓު ކުރުމަކީ މައްސަލައެއް ނޫން ކަމަށް ނިންމައި ހޭލުންތެރިކަން އިތުރު ކުރުމާއި ޓެކްނޮލޮޖީގެ ގޮތުން ހޯދިފައިވާ ކުރިއެރުންތަކުގެ ސަބަބުން ކަމަށެވެ.
ނަމަވެސް ފެނުނު ތަކެއްޗަކީ "އެކްސްޓްރާ ޓެރެސްޓްރިއަލް" އޭލިއެން ނުވަތަ އިންސާނުންނާ ތަފާތު އެހެން ދިރުމަކާ ގުޅުން ހުރި ތަކެތީގެ ގޮތުގައި ބެލެވޭނެ އެއްވެސް ސަބަބެއް ޕެންޓެގަންއަށް ހޯދިފައި ނުވާ ކަމަށެވެ.
އެކަމަކު އެއީ، އެފަދަ ތަކެއްޗަށް ވުމުގެ ފުރުސަތު އެބަ އޮތް ކަމަށް އޭނާ އެއްބަސްވެވަޑައިގެންނެވި އެވެ.
"މިއީ ކޮން ތަކެއްޗެއްކަން ޔަގީންކޮށް ބުނަން އަޅުގަނޑުމެން ބޭނުމެއް ނޫން،" ބްރޭ ވިދާޅުވި އެވެ.
ވިހި އެކާވީސް ވަނަ އަހަރު އެމެރިކާގެ ޖާސޫސީ އިދާރާއިން ނެރުނު ރިޕޯޓެއްގައި ބުނީ "އެކްސްޓްރާ ޓެރެސްޓިރަލް" ނުވަތަ އިންސާނުން ފަދަ އެހެން ދިރުމެއް ދުނިޔެއިން ބޭރުގައިވާ ކަމަށް ފެންނާނެ ހެއްކެއް ނެތް ކަމަށެވެ.
އެހެން ނަމަވެސް، ގިނަ އަދަދެއްގެ އަސްކަރީ ޕައިލެޓުންނާއި ބައެއް އާއްމުންނަށް ފެނިފައިވާ ޔޫއެފްއޯތަކަކީ ކޮން އެއްޗެއްކަން ބުނެދޭން ނޭނގޭ ކަމަށް ވެސް އެ ރިޕޯޓުގައިވެ އެވެ.
އޭގެ ތެރެއިން ބައެއް ތަކެއްޗަކީ ދޫނި ނުވަތަ ޑްރޯންގެ ސަބަބުން އެމެރިކާގެ އަސްކަރިއްޔާގެ ރޭޑާ ނިޒާމަށް އޮޅުން އަރައިގެން ފެންނަ ތަކެއްޗަށް ވުން އެކަށީގެންވާ ކަމަށް ރިޕޯޓުގައި ފާހަގަކުރި އެވެ.
ރިޕޯޓުގައި އިތުރަށް ބުނީ ދުނިޔޭގެ ގަދަ ބާރުތައް ކަމުގައިވާ ޗައިނާ އަދި ރަޝިއާއިން ހިންގާ އަސްކަރީ ޓެސްޓުތަކާއި އާ ޓެކްނޮލޮޖީތަކުގެ ސަބަބުން ރޭޑަރަށް ޔޫއެފްއޯގެ ގޮތުގައި ތަކެތި ފެނުން އެކަށީގެންވާ ކަމަށެވެ.
އެމެރިކާ ސިފައިންނާއި ޖާސޫސީ އިދާރާގެ އަމާޒަކީ ޔޫއެފްއޯގެ ސަބަބުން އެމެރިކާގެ ސަލާމަތަށް ނުރައްކަލެއް އޮތްތޯ ބަލައި ވަޒަން ކުރުމެވެ.
