މެޑްރިޑް (މެއި 17) - މަޝްހޫރު ފުޓްބޯޅަ ލެޖެންޑް ޑޭވިޑް ބެކަމްގެ ހިއްސާ އޮންނަ އެމެރިކާގެ ކްލަބް, އިންޓަ މިއާމީ އެފްސީގެ ހިއްސާ ގަތުމަށް ފަހު ލިއޮނަލް މެސީ އަންނަ އަހަރު އެ ޓީމަށް ބަދަލުވާން އުޅޭ ކަމަށް މީޑިއާ ރިޕޯޓްތައް ބުނެފި އެވެ.
އެމެރިކާގެ ޑިރެކްޓީވީ އާއި ސްޕެއިނުގެ މީޑިއާތަކުން ރިޕޯޓްކުރާ ގޮތުގައި ޕީއެސްޖީއާ އެކު މެސީ ހެދި ދެ އަަހަރުގެ ކޮންޓްރެކްޓް ހަމަވުމުން އަންނަ އަހަރު އޭނާ އިންޓަ މިއާމީއާ ގުޅެން ވަނީ ނިންމައިފަ އެވެ. އަދި އިންޓަ މިއާމީ އަށް ބަދަލުވުމުގެ ކުރިން މެސީ، އެ ކްލަބްގެ ހިއްސާދާރަކަށް ވާނެ ކަމަށް ވެސް ވަނީ ރިޕޯޓްކޮށްފަ އެވެ.
ޑިރެކްޓީވީގެ ނޫސްވެރިޔާ، އަލެކްސް ކާންޑާލް ރިޕޯޓްކުރާގޮތުގައި މެސީ ވަނީ އިންޓަ މިއާމީގެ 35 ޕަސެންޓް ހިއްސާ ގަންނަން ޝައުގުވެރިކަން ފާޅުކޮށްފަ އެވެ.
މީގެ ކުރިން ދިން މީޑިއާ އިންޓަވިއުއެއްގައި އުމުރުން 34 އަހަރުގެ މެސީ ވަނީ ކުޅުން ހުއްޓާލުމުގެ ކުރިން އެމެރިކާ ލީގުގައި ކުޅުމުގެ ޝައުގުވެރިކަން އެބަހުރި ކަމަށް ބުނެފަ އެވެ. އަދި ކެރިއަރުގައި ކުޅޭ އެންމެ ފަހު ކްލަބަކަށް ހަދަން ބޭނުންވަނީ އާޖެންޓީނާގެ ނެވެލް އޯލްޑް ބޯއީސް ކަމަށް ވިޔަސް، އޭގެ ކުރިން އެމެރިކާގެ ކްލަބަކާ ގުޅެން ވަރަށް ބޮޑަށް މެސީ އަންނަނީ ވިސްނަމުންނެވެ.
އިންޓަ މިއާމީ އަށް މިހާތަނަށް ކުޅެފައިވާ ޔޫރަޕްގެ ނަން މަޝްހޫރު ކުޅުންތެރިންނަށް ބަލާއިރު، ޔުވެންޓަސް އާއި ޕީއެސްޖީ އަށް ކުޅުނު ބްލައިސް މަޓުއީޑީ އާއި ރެއާލް މެޑްރިޑް، ޔުވެންޓަސް، ނަޕޯލީ އަދި ޗެލްސީ އަށް ކުޅުނު އާޖެންޓީނާގެ ފޯވާޑް ގޮންޒާލޯ ހިގުއައިން ވެސް ވަނީ އިންޓަ މިއާމީ އަށް ކުޅެފަ އެވެ.
ރިޕޯޓްތައް ބުނާގޮތުން އިންޓަ މިއާމީ ހިންގަމުން އަންނަ އިންވެސްޓަރުންގެ ތެރޭގައި ހިމެނެނީ ބެކަމް އާއި ކިއުބާގެ ވިޔަފާރިވެރިންގެ އިިތުރުން އެމެރިކާގެ ދެ ކުންފުންޏެކެވެ.
