ޕެރިސް (މެއި 17) - ޕީއެސްޖީ އަށް ކުޅެމުން އަންނަ ފްރާންސްގެ ތަރި ކީލިއަން އެމްބާޕޭ އަންނަ ސީޒަނުގައި ފެންނާނީ ރެއާލް މެޑްރިޑުން ކަމަށް ސްޕެއިނާއި އިނގިރޭސި މީޑިއާ ރިޕޯޓްތައް ބުނެފި އެވެ.
ދާދި ފަހުން ފްރެންޗް ލީގުގެ މޮޅު ކުޅުންތެރިޔާގެ މަގާމު ތިން ވަނަ ފަހަރަށް ހޯދި އެމްބާޕޭ، 23، ޕީއެސްޖީގެ ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ޕީއެސްޖީން އެމްބާޕޭ ލައްވައި އާ ކޮންޓްރެކްޓެއްގައި ސޮއިކުރުވަން ކުރި ހުރިހާ މަސައްކަތެއް މިހާތަނަށް ވަނީ ނާކާމިޔާބުވެފަ އެވެ.
ސްޕެއިނާއި އިނގިރޭސި މީޑިއާތަކުގެ ރިޕޯޓްތައް ބުނާ ގޮތުގައި އެމްބާޕޭ ވަނީ މިދިޔަ އޭޕްރީލް މަހު ރެއާލާ އެކު އެއްބަސްވުމަކަށް އަތުވެފަ އެވެ. އެކަމަކު، ފްރާންސްގެ ނޫހަކަށް ދާދި ފަހުން ދިން އިންޓަވިއުއެއްގައި އެމްބާޕޭ ބުނީ މުސްތަގުބަލާ ބެހޭގޮތުން ގޮތެއް ނިންމައި އަންނަ ސީޒަނުގައި ކުޅޭނެ ވަކި ކްލަބެއް އަދި ނުނިންމާ ކަމަށެވެ.
ފްރާންސް މީޑިއާ ރިޕޯޓްތައް ބުނާގޮތުން އެމްބާޕޭ މުސްތަގުބަލާ މެދު ނިންމި ގޮތެއް އިއުލާނުކުރާނީ ފްރެންޗް ލީގުގައި ޕީއެސްޖީ ކުޅޭ ފަހު މެޗަށް ފަހު އެވެ. އެއީ އަންނަ އާދިއްތަ ދުވަހު އަމިއްލަ ދަނޑުގައި މެޓްޒާ ދެކޮޅަށް ޕީއެސްޖީ ކުޅޭ މެޗަށް ފަހު އެވެ.
އެމްބާޕޭ މަޑުކުރުވަން ޕީއެސްޖީން މިހާރު ވަނީ އާ ކޮންޓްރެކްޓަކާ އެކު ބޮޑު ބޯނަހެއް ދޭން ނިންމައިފަ އެވެ. އެ ގޮތުން އެ ބޯނަހުގެ ޖުމްލަ ޕެކޭޖްގެ އަގު 195 މިލިއަން ޑޮލަރަށް އަރާނެ ކަމަށް ރިޕޯޓްތައް ބުނެ އެވެ.
ޕީއެސްޖީން އެމްބާޕޭ މަޑުކުރުވަން ކުރާ މަސައްކަތުގައި އެ ޓީމުގެ ކޯޗަކަށް ޒިނެދިން ޒިދާން ގެނެވޭތޯ ވެސް އަންނަނީ ބަލަމުންނެވެ. އެކަމަކު، ޒިދާން ހުރީ މި ފަހަރުގެ ވޯލްޑް ކަޕަށް ފަހު ފްރާންސް ގައުމީ ޓީމާ ހަވާލުވުމުގެ އުންމީދުގައި ކަމަށް އޭނާގެ ގާތް ފަރާތްތަކާ ހަވާލާދީ ފްރާންސް ނޫސްތަކުން ރިޕޯޓްކޮށްފައިވެ އެވެ.
ފްރެންޗް ލީގުގައި މި ސީޒަނުގައި 25 ގޯލު ޖެހި އެމްބާޕޭގެ މުޅި ސީޒަންގެ ޖުމްލަ އަދަދަކީ 36 އެވެ. މިއީ އެމްބާޕޭގެ ކެރިއަރުގައި ގޯލު ޖެހުމަށް ބަލާއިރު، ރަނގަޅު ސީޒަނަކެވެ.
