އިސްތަންބޫލް، ތުރުކީ (މޭ 16) - ފިންލޭންޑާއި ސްވިޑަންއަށް ނޭޓޯގެ މެމްބަރުކަން ދިނުމަށް ތުރުކީއިން އެއްބަސް ނުވާނެ ކަމަށް އެ ގައުމުގެ ރައީސް ތައްޔިބް އުރުދުގާން ހޯމަ ދުވަހު ވިދާޅުވެއްޖެ އެވެ.
"ތުރުކީއަށް ދަތިކޮށް، ފިޔަވަޅު އަޅާ ގައުމުތަކުން ސަލާމަތާ ގުޅޭ ޖަމިއްޔާ ނޭޓޯއާ ގުޅުމަށް އަޅުގަނޑުމެންގެ އާނ ބަހެއް ނުލިބޭނެ،" އުރުދުގާން ވިދާޅުވި އެވެ.
ތުރުކީގެ ހިތްހަމަނުޖެހުންތަކާ ގުޅޭ މަޝްވަރާ ކުރުމަށް ސްވިޑަން އާއި ފިންލޭންޑް ސަރުކާރުގެ އޮފިޝަލުން ވަރަށް އަވަހަށް ތުރުކީއަށް ދަތުރު ކުރައްވާނެ ކަމަށް ސްވިޑަންގެ ފޮރިން މިނިސްޓްރީން ބުނެފައިވެ އެވެ.
ނަމަވެސް އުރުދުގާން ވިދާޅުވީ އެ ދެ ގައުމުގެ ޑިޕްލޮމެޓުން ތުރުކީއަށް ދަތުރު ކުރުމުގެ ބޭނުމެއް ނެތް ކަމަށާއި ތުރުކީގެ ވިސްނުން މިކަމުގައި ބަދަލު ނުކުރެވޭނެ ކަމަށެވެ.
މިދިޔަ ހަފްތާގައި ފިންލޭންޑާއި ސްވިޑަންގެ ސަރުކާރުން ރަސްމީކޮށް ބުނީ ނޭޓޯގެ މެމްބަރު ކަމަށް އެދި ހުށަހަޅާނެ ކަމަށެވެ. މީގެ ކުރިން މި ދެ ގައުމަކީ އަސްކަރީ ގޮތުން ވަކި އަތަކަށް ނުޖެހޭ ދެ ގައުމެވެ.
ނަމަވެސް ޔޫރަޕްގެ އެންމެ އުތުރުގައި އޮންނަ ދެ ގައުމުގެ ޒަމާންވީ ވިސްނުން ބަދަލުވީ ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުންނެވެ.
ތުރުކީގައި ކުރުދީ ހަނގުރާމަވެރިންނާ ދެކޮޅަށް ބޮޑެތި އޮޕަރޭޝަންތައް ހިންގާ އިރު، ތުރުކީ ސަރުކާރުން ތުހުމަތު ކުރަނީ ފިންލޭންޑާއި ސްވިޑަންއިން ކުރުދީންނަށް އެއްބާރުލުންދޭ ކަމަށެވެ.
އާދީއްތަ ދުވަހު ތުރުކީގެ ފޮރިން މިނިސްޓަރު މެވްލުތް ކަވުސޮގްލޫ ވެސް ވިދާޅުވީ "ޓެރަރިޒަމަށް ތާއީދު ކުރާ ގައުމުތަކުން ނޭޓޯގައި ހިމެނިގެން ނުވާނެ" ކަމަށެވެ.
