ސޯލް، ދެކުނު ކޮރެއާ (މޭ 16) - ހަލުވިކަމާ އެކު ކޮވިޑް ފެތުރެމުންދާ އުތުރު ކޮރެއާގައި ބޭސް ސަޕްލައި ކުރުމުގައި ދިމާވަމުންދާ މައްސަލަތައް ހައްލު ކުރަން ސިފައިން ނެރެފި އެވެ.
ދައުލަތުގެ މީޑިއާ ކޭސީއެންއޭއިން ބުނީ ސިފައިން ކޮމިޝަނުން ވަގުތުން ފިޔަވަޅު އަޅައި، ޕިޔޯންގްޔޭންގް ސިޓީގެ ބޭސް ސަޕްލައި އެއް ވަރެއްގައި ހިފެހެއްޓުމަށް ލީޑަރު ކިމް ޖޮންގް އުން އަމުރު ކުރެއްވި ކަމަށެވެ.
ކިމް ކުރިން ވިދާޅުވީ ބަލި ފެތުރެމުން ދާތީ ބޮޑެތި ތަކުލީފުތަކެއް ކުރިމަތިވާ ކަމަށެވެ. އުތުރު ކޮރެއާއަކީ އެންމެ ގޯސް ސިއްހީ ނިޒާމު އޮންނަ އެއް ގައުމެވެ.
އެ ގައުމުގައި އެއްވެސް ކޮވިޑް ވެކްސިނެއް، ބޭހެއް ވެސް އަދި އެއް ފަހަރާ ގިނަ ބަޔަކު ޓެސްޓު ކުރެވޭނެ ކެޕޭސިޓީއެއް ވެސް ނެތެވެ.
އާދީއްތަ ދުވަހު އޮތް ޕޮލިޓްބިޔުރޯގެ ކުއްލި ބައްދަލުވުމުގައި ކިމް ވިދާޅުވީ އޯޑަރުތައް ރަނގަޅަށް ޕްރޮސެސް ކުރަމުން ނުދާތީ ބޭށް ފިހާރަތަކުގެ ސްޓޮކް ހުސްވަމުންދާ ކަމަށެވެ.
އުތުރު ކޮރެއާގައި ކޮވިޑް ފެތުރޭކަން ރަސްމީކޮށް އިއުލާނު ކުރީ މިދިޔަ ބުރާސްފަތި ދުވަހު އެވެ. ދައުލަތުގެ މީޑިއާއިން ބުނީ 50 މީހުން މަރުވެފައިވާ އިރު، 1،213،550 މީހުން ހުން އައިސްފައިވާ ކަމަށާއި 564،860 މީހުންނަށް ފަރުވާދެމުންދާ ކަމަށެވެ.
ކޮވިޑް ބަލިމަޑުކަން މުޅި ދުނިޔެއަށް ފެތުރުމުން، އުތުރު ކޮރެއާއިން ވަރަށް ހަރުކަށިކޮށް ބޯޑަރު ބަންދު ކުރި އެވެ. ތަޖުރިބާކާރުން ބުނީ އަވައްޓެރި ގައުމުތަކުގައި ބަލި ފެތުރޭ ނަމަ، ބޯޑަރު ބަންދު ކުރިޔަސް އުތުރު ކޮރެއާއާ ހަމައަށް ބަލި ފޯރާނެ ކަމަށެވެ.
ކިމް ވިދާޅުވެފައި ވަނީ އެ ގައުމުން އަމަލު ކުރާނީ ޗައިނާގެ މެނޭޖްމަންޓް ސްޓްރެޓެޖީ ބަލައި، އޭގެން ލިބޭ ފިލާވަޅުތަކުގެ އަލީގައި ކަމަށެވެ.
ޗައިނާގައި ގެންގުޅެނީ ޒީރޯ ކޮވިޑްގެ ސިޔާސަތެކެވެ. ބައެއް ބޮޑެތި ސިޓީތައް ލޮކްޑައުންކޮށްފައިވާ އިރު، އެއީ ދެމެހެއްޓެނިވި ސިޔާސަތެއް ނޫން ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ބުނެފަ އެވެ.
ޗައިނާ އާއި ޑަބްލިއުއެޗްއޯގެ ކޯވެކްސް ސްކީމުން ކޮވިޑް ވެކްސިން ހަދިޔާ ކުރަން އުޅުމުން، އުތުރު ކޮރެއާއިން ކުރިން ބުނީ ބޭނުން ނުވާ ކަމަށެވެ. ނަމަވެސް ބަލި ފެތުރޭކަން އިއުލާނު ކުރުމާ އެކު، ޗައިނާ އާއި ދެކުނު ކޮރެއާއިން ވަނީ ވެކްސިން ހަދިޔާ ކުރަން ތައްޔާރަށް ތިބި ކަމަށް ބުނެފަ އެވެ.
