ސޯލް، ދެކުނު ކޮރެއާ (މޭ 15) - އުތުރު ކޮރެއާގައި ކޮވިޑް ފެތުރެމުންދާކަން ރަސްމީކޮށް އިއުލާނު ކުރިތާ ތިން ދުވަސް ތެރޭގައި ބަލި ޖެހިގެން މަރުވި މީހުންގެ އަދަދު 42 އަށް އަރައިފި އެވެ.
އެ ގައުމުގެ އާދީއްތަ ދުވަހު ބުނީ "ހުން އައިސްގެން" އިތުރު 15 މީހުން މަރުވެފައިވާ ކަމަށެވެ. މިހާރު އުތުރު ކޮރެއާގެ އެކި ހިސާބުތައް ވަނީ އެއްކޮށް ލޮކްޑައުންކޮށްފަ އެވެ.
ލީޑަރު ކިމް ޖޮންގް އުން ވިދާޅުވީ ބަލި ފެތުރެމުން ދާތީ ބޮޑެތި ތަކުލީފުތަކެއް ކުރިމަތިވާ ކަމަށެވެ. އުތުރު ކޮރެއާއަކީ އެންމެ ގޯސް ސިއްހީ ނިޒާމު އޮންނަ އެއް ގައުމެވެ.
އެ ގައުމުގައި އެއްވެސް ކޮވިޑް ވެކްސިނެއް، ބޭހެއް ވެސް އަދި ޓެސްޓު ކުރެވޭނެ ކެޕޭސިޓީއެއް ވެސް ނެތެވެ.
ކޮވިޑް ބަލިމަޑުކަން މުޅި ދުނިޔެއަށް ފެތުރުމުން، އުތުރު ކޮރެއާއިން ވަރަށް ހަރުކަށިކޮށް ބޯޑަރު ބަންދު ކުރި އެވެ. ތަޖުރިބާކާރުން ބުނީ އަވައްޓެރި ގައުމުތަކުގައި ބަލި ފެތުރޭ ނަމަ، ބޯޑަރު ބަންދު ކުރިޔަސް އުތުރު ކޮރެއާއާ ހަމައަށް ބަލި ފޯރާނެ ކަމަށެވެ.
ދައުލަތުގެ މީޑިއާ ކޭސީއެންއޭއިން ބުނީ ބުރާސްފަތި ދުވަހުން ފެށިގެން ޖުމްލަ 42 މީހުން މަރުވެފައިވާ އިރު، ޖުމްލަ 820،620 ކޭސް ރިޕޯޓުކޮށްފައިވާ ކަމަށެވެ. އޭގެ ތެރެއިން 324،550 މީހުންނަށް ދަނީ ފަރުވާ ކުރަމުންނެވެ.
ކިމް ވިދާޅުވެފައި ވަނީ އެ ގައުމުން އަމަލު ކުރާނީ ޗައިނާގެ މެނޭޖްމަންޓް ސްޓްރެޓެޖީ ބަލައި، އޭގެން ލިބޭ ފިލާވަޅުތަކުގެ އަލީގައި ކަމަށެވެ.
ޗައިނާގައި ގެންގުޅެނީ ޒީރޯ ކޮވިޑްގެ ސިޔާސަތެކެވެ. ބައެއް ބޮޑެތި ސިޓީތައް ލޮކްޑައުންކޮށްފައިވާ އިރު، އެއީ ދެމެހެއްޓެނިވި ސިޔާސަތެއް ނޫން ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ ބުނެފަ އެވެ.
ޗައިނާ އާއި ޑަބްލިއުއެޗްއޯގެ ކޯވެކްސް ސްކީމުން ކޮވިޑް ވެކްސިން ހަދިޔާ ކުރަން އުޅުމުން، އުތުރު ކޮރެއާއިން ކުރިން ބުނީ ބޭނުން ނުވާ ކަމަށެވެ. ނަމަވެސް ބަލި ފެތުރޭކަން އިއުލާނު ކުރުމާ އެކު، ޗައިނާ އާއި ދެކުނު ކޮރެއާއިން ވަނީ ވެކްސިން ހަދިޔާ ކުރަން ތައްޔާރަށް ތިބި ކަމަށް ބުނެފަ އެވެ.
