އެމެރިކާގެ ބަފަލޯ ސިޓީގައި ކަޅު ނަސްލުގެ މީހުން ދިރިއުޅޭ ނެއިބާހުޑެއްގެ ފިހާރައެއްގެ ތެރޭގައި ބަޑި ޖަހައި 10 މީހުން މަރާލައިފި އެވެ.
ހަމަލާ ދިނީ އުމުރުން 18 އަހަރުގެ ދޮން ނަސްލުގެ ފިރިހެނެކެވެ. ކަމާ ބެހޭ އިދާރާތަކުން ބުނީ މިއީ "ނަސްލީ ގޮތުން ދިން އަނިޔާވެރި ހަމަލާއެއް" ކަމަށެވެ.
ހޮނިހިރު ދުވަހު ޓޮޕްސް ފްރެންޑްލީ މާކެޓުގައި ދިން ހަމަލާގައި އިތުރު ތިން މީހުންނަށް އަނިޔާވި އެވެ.
ހަމަލާ ދިން މީހާ ހުރީ ބޮޑީ އާމާ އަޅައިގެން، ރައިފަލް ބަޑި ހިފައިގެންނެވެ. ހަމަލާ ދިންތާ ކުޑަ އިރުކޮޅެއްގެ ތެރޭގައި އޭނާ ހައްޔަރު ކުރި އެވެ.
އޮފިޝަލުން ބުނީ ބަފަލޯ ސިޓީގެ ފިހާރައަށް އޭނާ ދިޔައީ ނިއު ޔޯކް ސްޓޭޓުގެ ކައުންޓީއެއްގައި އޭނާ ދިރިއުޅޭ ގެއިން ނުކުމެ، ކާރެއްގައި ކަމަށެވެ. އޭނާ ވަނީ ހަމަލާ ވަގުތުން އިންޓަނެޓު މެދުވެރިކޮށް ބްރޯޑްކާސްޓްކޮށްފަ އެވެ.
ފުލުހުން ބުނީ ހަމަލާގައި މަރުވީ ނުވަ ކަސްޓަމަރުންނާއި ސެކިއުރިޓީ ގާޑެއްގެ ގޮތުގައި މަސައްކަތް ކުރަމުން ދިޔަ ކުރީގެ ފުލުހަކު ކަމަށެވެ.
ސެކިއުރިޓީ ގާޑު ވަނީ ހަމަލާ ހުއްޓުވުމަށް ބަޑި ވެސް ޖަހާފަ އެވެ. ނަމަވެސް ހަމަލާ ދިން މީހާ ވަނީ ގާޑުގެ ގަޔަށް ބަޑި ޖަހައި މަރާލާފަ އެވެ.
ފުލުހުން އައުމުން އޭނާ މަސައްކަތް ކުރީ ކަރުގައި ބަޑި ޖައްސައި އަމިއްލައަށް މަރުވާށެވެ. އެކަމަކު ފުލުހުން ވާހަކަ ދެއްކުމުން އޭނާ ވަނީ ބަޑި ބިންމަތީގައި ބާއްވައި، އަމިއްލައަށް ފުލުހުންނާ ހަވާލުވެފަ އެވެ.
ހަމަލާ ދިން މީހާއަކީ ނިއު ޔޯކްގެ ކޮންކްލިން ކައުންޓީއަށް ނިސްބަތްވާ ޕެއިޓަން ގެންޑްރޮން ނަމަކަށް ކިޔާ މީހެއް ކަމަށް އޮފިޝަލުން ބުނެ އެވެ.
މިދިޔަ އަހަރުގެ މާޗް މަހު ވެސް އެމެރިކާގެ ފިހާރައެއްގައި ބަޑި ޖަހައި ބަޔަކު މަރާލި އެވެ. އެ ފަހަރު ކޮލޮރާޑޯގެ ބޯލްޑާ ސިޓީގެ ކިންގް ސޫޕާޒް ފިހާރައިގައި ދިން ހަމަލާގައި 10 މީހުން މަރުވި އެވެ.
ވިހިވިހި ވަނަ އަހަރު ބަޑީގެ ހަމަލާތަކުގައި އެމެރިކާއިން 19،350 މީހުން މަރުވި އެވެ. އެއީ 2019 ވަނަ އަހަރާ އަޅާ ބަލާއިރު، 35 ޕަސެންޓް އިތުރެވެ.
