މިއުނިކް (މެއި 14) - ނޯވޭގެ ފޯވާޑް އާލިން ބްރައުޓް ހާލަންޑް، ބޮރޫޝިއާ ޑޯޓްމަންޑަށް ކުޅެދިން ވަދާއީ މެޗުގައި ޖެހި ގޯލާ އެކު 2-1 އިން ޑޯޓްމަންޑުން ހާތާ ބާލިން ބަލިކޮށްފި އެވެ.
ހާލަންޑް، 21، މި ސީޒަނަށް ފަހު އިންގްލެންޑްގެ މެންޗެސްޓާ ސިޓީ އަށް 65 މިލިއަން ޑޮލަރުގެ ފީ އަކަށް ބަދަލުވާން ނިންމާފައިވާކަން ދާދި ފަހުން ވަނީ އިއުލާނުކޮށްފަ އެވެ. މިރޭ ހާތާ ބާލިންއާ ދެކޮޅަށް ކުޅުނު މެޗު ފެށުމުގެ ކުރިން ޑޯޓްމަންޑްގެ ދަަނޑު، ސިގްނަލް އިޑޫނާ ޕާކުގެ މަޝްހޫރު "ޔެލޯ ވޯލް"ގައި ތިބި ސަޕޯޓަރުން ވަނީ ހާލަންޑް ކްލަބަށް ކޮށްދިން ހިދުމަތުގެ އަގުވަޒަންކޮށްފަ އެވެ.
މެޗުގެ 18 ވަނަ މިނިޓްގައި ހާތާ ބާލިން އަށް ލީޑުނަގައިދިިނީ އިޝާކް ބެލްޑޮފިލް އެވެ. މިއީ ޕެނަލްޓީ އަކުން އޭނާ ޖެހި ގޯލެކެވެ. މެޗުގެ 68 ވަނަ މިނިޓްގައި ޑޯޓްމަންޑަށް އެއްވަރުކޮށްދިނީ ހާލަންޑް ވައްދާލި ޕެނަލްޓީންނެވެ. އަދި މެޗުގެ 84 ވަނަ މިނިޓްގައި ޑޯޓްމަންޑް މޮޅުކޮށްދިން ގޯލު ޖެހީ ޔޫސެފާ މޫކޯކޯ އެވެ. މި ގޯލު ޖަހަން ފުރުސަތު ތަނަވަސްކޮށްދިނީ ޑޯޓްމަންޑްގައި މަޑުކުރަން ނިންމި އިނގިރޭސި މިޑްފީލްޑަރު ޖޫޑް ބެލިންހަމް އެވެ.
ހާލަންޑް ވަނީ މި ސީޒަނުގައި 30 މެޗުން 29 ގޯލު ޖަހައިފަ އެވެ. ޑޯޓްމަންޑް ޖޯޒީގައި އޭނާގެ ޖުމްލަ ގޯލު ރެކޯޑަށް ބަލާއިރު، 89 މެޗުން 86 ގޯލު ޖަހައި، 23 ގޯލު ޖަހަން ވަނީ ފުރުސަތު ތަނަވަސްކޮށްދީފަ އެވެ.
ޑޯޓްމަންޑް ލީގު ނިންމާލީ ދެ ވަނައިގަ އެވެ. އެއް ވަނައިގައި އޮތް ބަޔާން މިއުނިކުން ވަނީ ޖެހިޖެހިގެން 10 ވަނަ ފަހަރަށް ލީގުގެ ޗެމްޕިއަންކަން ހޯދައިފަ އެވެ. ބަޔާނަށް 34 މެޗުން 77 ޕޮއިންޓް ލިބުނުއިރު، ޑޯޓްމަންޑްގެ އޮތީ 34 މެޗުން 69 ޕޮއިންޓެވެ.
ލަނޑު ޖެހުމަށް ފަހު ބަޔާންގެ ލެވަންޑޯސްކީ އުފާފާޅުކުރަނީ: ކްލަބް ބަދަލުކުރަން ލެވަންޑޯސްކީ ވެސް ބޭނުންވޭ.
ލެވަންޑޯސްކީ ބަޔާން ޖޯޒީގައި ކުޅުނު ފަހު މެޗު؟
ލީގުގެ ފަހު މެޗުގައި ބަޔާން މިރޭ ވަނީ ރަށުންބޭރުގައި ވުލްފްސްބާގާ 2-2 އިން އެއްވަރުވެފަ އެވެ. މެޗުގެ 40 މިނިޓް ތެރޭ ޖޯސިފް ސްޓަނިސިޗާއި ރޮބަޓް ލެވަންޑޯސްކީ ޖެހި ގޯލުތަކުން ބަޔާން ވަނީ ދެ ގޯލުގެ ލީޑެއް ނަގައިފަ އެވެ. ވުލްފްސްބާގުން އެއްވަރުކުރީ ފަހަތުން އަރައި ދެ ގޯލު ޖަހައިގެންނެވެ. އެ ޓީމުގެ ގޯލުތައް ޖެހީ ޖޮނަސް ވިންޑް އާއި މެކްސް ކްރޫސާ އެވެ.
މި ސީޒަނުގައި ބަޔާނަށް ޖުމްލަ 50 ގޯލު ޖަހައިދިން ލެވަންޑޯސްކީ އެ ކްލަބްގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. ބަޔާނުން ލެވަންޑޯސްކީ އަށް ދިން އާ ކޮންޓްރެކްޓްގައި ސޮއިނުކުރާނެކަން އޭނާ ވަނީ ކްލަބަށް އަންގައިފަ އެވެ. އެކަން ބަޔާންގެ ސްޕޯޓިން ޑިރެކްޓަރު ހަަސަން ސަލިހަމްދްޒިޗް ވަނީ މިރޭގެ މެޗުގެ ކުރިން މީޑިއާ އަށް ކަށަވަރުކޮށްދީފަ އެވެ.
ސަލިހަމްދްޒިޗް ބުނީ ބަޔާނުން އަދިވެސް ނިންމައިގެން ހުރީ ލެވަންޑޯސްކީ ކޮންޓްރެކްޓް އާ ކުރުވުމަށް ކަމަށާއި އިތުރު މަޝްވަރާ ބައްދަލުވުންތަކެއް ކުރިއަށް އޮތް ދުވަސްތަކުގެ ތެރޭގައި ބާއްވާނެ ކަމަށެވެ.
ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 373 މެޗުން 343 ގޯލު ޖަހައިފަ އެވެ. ބަޔާނާ އެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު ޖަރުމަނު ލީގު އަށް ފަހަރު ހިމެނެ އެވެ. މީޑިއާ ރިޕޯޓްތައް ބުނާގޮތުން ލެވަންޑޯސްކީ ބޭނުންވަނީ ތިން އަހަރުގެ ކޮންޓްރެކްޓެއްގައި ބާސެލޯނާ އަށް ބަދަލުވުމަށެވެ.
