ރާއްޖޭގެ ޖަލުތަކުގައި ތިބި، ހަރުކަށި ފިކުރާއި ޓެރަރިޒަމްގެ މައްސަލަތަކުގައި ހައްޔަރުކޮށްފައިވާ މީހުންނާ ބައްދަލުކޮށް، އިންޓަވިއު ކުރަން އދ.ގެ ހިއުމަން ރައިޓްސް ކައުންސިލުން ނިންމައިފި އެވެ.
މި ބައްދަލުވުންތައް ކުރިއަށްދާނީ މި މަހުގެ 15 އިން 24 އަށް އެ ކައުންސިލްގެ ސްޕެޝަލް ރެޕަޓުއާ، ފިއޮނިއުލާ ނީ އައޮލައިން ކުރައްވާ ދަތުރުފުޅުގަ އެވެ.
އދ.ގެ ހިއުމަން ރައިޓްސް ކައުންސިލުން ބުނީ އެ ކަމަނާގެ މި ދަތުރުފުޅުގައި ޓެރަރިޒަމްގެ ކުށްތަކުގެ ތުހުމަތުގައި ޖަލުތަކާއި ޑިޓެންޝަން ސެންޓަރުތަކުގައި ހައްޔަރުކޮށްފައި ތިބި މީހުންނާ ބައްދަލުކޮށް، އިންޓަވިއު ކުރާނެ ކަމަށެވެ.
މި ދަތުރުފުޅުގައި ސަރުކާރުގެ އިސް ބޭފުޅުންނާއި، މަޖިލިސް މެންބަރުންގެ އިތުރުން ރާއްޖޭގައި ގާއިމްވެފައިވާ ބައިނައިލްއަގްވާމީ ޖަމިއްޔާތަކުގެ އިސް ބޭފުޅުންނާ ވެސް ފިއޮނިއުލާ ނީ ބައްދަލުކުރައްވާނެ އެވެ.
މީގެ އިތުރުން ރާއްޖެއިން ބޭރުގައި ހިނގާ ހަނގުރާމަތަކަށް ދަތުރުކޮށްފައިވާ ދިވެހި ފިރިހެނުންނާއެކު ދަތުރުކުރި އެމީހުންގެ އަނބިންނާއި ދަރިން، އަނބުރާ ރާއްޖެއަށް ގެނައުމުގެ ކަންކަން ކުރިއަށް ދާ ގޮތާ ގުޅޭ ކަންކަން ވެސް މި ދަތުރުގައި އދ.ގެ ސްޕެޝަލް ރެޕަޓުއާ ބައްލަވާނެ އެވެ.
މި ދަތުރުގައި ފާހަގަވާ ކަންކަމާއި އެ ޖަމިއްޔާގެ ރެކޮމެންޑޭޝަންތައް އެކުލެވޭހެން އދ. ގެ ހިއުމަން ރައިޓްސް ކައުންސިލުން ރިޕޯޓެއް އަންނަ އަހަރު އާންމު ކުރާނެ ކަމަށް އެ ކައުންސިލުން ވަނީ ބުނެފަ އެވެ.
