ބާމިންހަމް (މެއި 12) - ބާސެލޯނާ އިން ފިލިއްޕޭ ކުޓީނިއޯ، 21 މިލިއަން ޑޮލަރަށް އެސްޓަން ވިލާ އަށް ވިއްކާލައިފި އެވެ.
ކުޓީނިއޯ، 29، 2018 ވަނަ އަހަރުގެ ޖެނުއަރީ މަހު ބާސެލޯނާ އަށް ގެންދިޔައީ 178 މިލިއަން ޑޮލަރަށެވެ. ކުޓީނިއޯ ވަނީ ލޯން އެއްބަސްވުމެއްގެ ދަށުން ބަޔާން މިއުނިކަށް އެއް ސީޒަނުގައި ކުޅެފަ އެވެ. މިދިޔަ ޖެނުއަރީ މަހު ލޯން އެއްބަސްވުމެއްގެ ދަށުން ވިލާ އިން ކުޓީނިއޯ ގެނައިރު، އެ ކޮންޓްރެކްޓް ދާއިމީ ކުރީ 21 މިލިއަން ޑޮލަރަށެވެ. މިއީ އަގަށް ބަލާއިރު، 157 މިލިއަން ޑޮލަރުގެ ވެއްޓުމެކެވެ.
ވިލާއާ އެކު ކުޓީނިއޯ ކޮންޓްރެކްޓް ހެދީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެ މުއްދަތުގެ ކުރިން ވިލާ އިން ކުޓީނިއޯ އެހެން ކްލަބަަކަށް ވިއްކާލަނަމަ ލިބޭ ފީގެ 50 ޕަސެންޓް ބާސެލޯނާ އަށް ދައްކަން ޖެހޭނެ އެވެ.
ބާސެލޯނާއާ އެކު ދެ ފަަހަރު ސްޕެނިޝް ލީގާއި ސްޕެނިޝް ކަޕް (ކޮޕަ ޑެލް ރޭ) ކާމިޔާބުކުރި ނަމަވެސް ކުޓީނިއޯ އަށް އެ ޓީމުގައި އޭނާގެ އެންމެ މޮޅު ކުޅުން ނުދެއްކެ އެވެ. ބާސެލޯނާ އަށް ކުޅެދިން 106 މެޗުން ކުޓީނިއޯ ވަނީ 26 ގޯލު ޖަހައިފަ އެވެ. ކުޓީނިއޯ ވަނީ ލޯނަކަށް ބަޔާނަށް ކުޅުނުއިރު، ޖަރުމަނު ލީގާއި ޖަރުމަނު ކަޕް އަދި ޗެމްޕިއަންސް ލީގު ކާމިޔާބުކޮށްފަ އެވެ. ޗެމްޕިއަންސް ލީގު ކާމިޔާބުކުރިއިރު، ކުޓީނިއޯ ވަނީ ބަޔާނުން 8-2 އިން ބާސެލޯނާ ބަލިކުރި މެޗުގައި ދެ ގޯލު ޖަހައިފަ އެވެ.
ވިލާ އަށް ބަދަލުވި ފަހުން ކުޅުނު 16 މެޗުގައި ކުޓީނިއޯ ވަނީ ހަތަރު ގޯލު ޖަހައި، ތިން ގޯލު ޖަހަން ފުރުސަތު ތަނަވަސްކޮށްދީފަ އެވެ. ކުޓީނިއޯ، ވިލާއާ ގުޅުނީ އެ ޓީމުގެ ކޯޗަކަށް ހުރި ސްޓީވެން ޖެރާޑާ އެކު މަސައްކަތްކުރުމުގެ ޝައުގުވެރިކަން ހުރުމުންނެވެ. ޖެރާޑް ވަނީ ކުޓީނިއޯ ކޮންޓްރެކްޓް ދާއިމީ ކުރުމަކީ ވިލާ އަށް ވަރަށް އުފާވެރި ހަބަރެއް ކަމަށް ބުނެފަ އެވެ.
