ވެރި ރަށް މާލޭގެ މަގުތަކަށް "އިންޑިއާ އައުޓް" ޖަހާފައި ހުރި ކަރުދާސް އަޅައި، ފާރުތަކުގައި އިންޑިއާ އައުޓް ލިޔާ ބައެއްގެ މައްސަލަ ބަލަމުންދާ ކަމަށް ފުލުހުން މިރޭ ބުނެފި އެވެ.
ފުލުހުން ނެރުނު ކުރު ބަޔާނެއްގައި ބުނެފައި އޮތީ އިންޑިއާ އައުޓް ގްރެފިޓީ ލިޔެ ކަރުދާސް މަގުތަކަށް އަޅަމުންދާ ހަތަރު މީހަކު ދަނެގަނެ، އެމީހުންގެ މައްސަތައް ތަހުގީގު ކުރަމުންދާ ކަމަށެވެ.
"މާލޭގެ އެކި ސަރަހައްދުތަކުގައި "އިންޑިއާ އައުޓް" ކުރަހައި، ލިޔުންތައް އަޅަމުންދާ މައްސަލައާ ގުޅިގެން މީހުން ދެނެގަނެ، އެމީހުންގެ މައްސަލަތައް ތަހުގީގު ކުރުމުގެ މަސައްކަތް ފުލުހުން ދަނީ ކުރަމުން. އެގޮތުން ހަތަރު މީހަކު ދެނެގަނެވި އެމީހުންގެ މައްސަލަތައް ފުލުހުން މިހާރު ދަނީ ތަހުގީގު ކުރަމުން،" ފުލުހުން ބުނެފައިވެ އެވެ.
އެމީހުންގެ މައްސަލަ ބަލަމުންދާއިރު އިންޑިއާ އައުޓް ކެމްޕެއިނު ރާއްޖޭގައި މަނާކޮށްފައި ވަނީ ރައީސް އިބްރާހިމް މުހައްމަދު ސޯލިހު އޭޕްރީލް، 27، ގައި ނެރުއްވި ރިޔާސީ ގަރާރަކުންނެވެ. އޭގެ ފަހުން ފުލުހުން ދިޔައީ އިންޑިއާ އައުޓް ބެނާއެއް މާލޭގައި ދެމިޔަސް އެތަކެތި އަތުލަމުންނެވެ.
އޭގެ އިތުރުން، މި މަހުގެ 3 ވަނަ ދުވަހު "މޯލްޑިވްސް ޔޫތް ފޯސް" ނަމުގައި ބަޔަކު ވަނީ އިންޑިއާ އައުޓު ހަރަކާތް ހިންގުމާ ދެކޮޅަށްވެސް ނިކުމެފަ އެވެ. އެ މީހުން ވަނީ ޔާމީން އަލުން އަނބުރާ ޖަލަށް ގެންދިއުމަށް ގޮވާލައި ޔާމީން ދިރިއުޅުއްވާ ގެކޮޅު ކައިރި އަށް އެއްވެ އިހުތިޖާޖު ވެސް ކޮށްފަ އެވެ.
