ވޮޝިންޓަން، އެމެރިކާ (މޭ 12) - އެމެރިކާގައި ކޮވިޑް ޖެހިގެން މަރުވި މީހުންގެ ޖުމްލަ އަދަދު މިލިއަނަކަށް ވުރެ މައްޗަށް އަރާފައިވާ ކަމަށް ވައިޓް ހައުސްއިން ބުނެފި އެވެ.
"މިއަދު އަޅުގަނޑުމެން މި ފާހަގަކުރަނީ ހިތާމަވެރި ކަމެއް. އެއް މިލިއަން އެމެރިކާ ރައްޔިތުން ކޮވިޑްގައި މަރުވެއްޖެ،" ރައީސް ޖޯ ބައިޑެން ނެރުއްވި ބަޔާނުގައި ވިދާޅުވި އެވެ.
ބައިޑެން ގޮވާލެއްވީ "ބަލިމަޑުކަމާ ދެކޮޅަށް ސަމާލުވެ ތިބުމަށް" އަދި ޓެސްޓު ކުރުމާއި ވެކްސިނާއި ފަރުވާއަށް ކޮންގްރެސްއިން ފަންޑު ކުރުން އިތުރު ކުރުމަށެވެ.
އެމެރިކާގައި ހަލުވިކަމާ އެކު ކޮވިޑް ފެތުރެން ފެށީ އެޕްރީލް 2020 ގަ އެވެ. އޭރު ވައިރަހުގެ އެޕިސެންޓަރަކީ ނިއު ޔޯކް އެވެ. ހޮސްޕިޓަލްތަކާއި މޯގްތައް ފުރި ބާރުވި އެވެ.
އޭގެ ދެ އަހަރު ފަހުން، އެމެރިކާގެ ގިނަ ހިސާބުތަކުގައި ގިނަ ފިޔަވަޅުތައް އުވާލައި، އާއްމު ދިރިއުޅުމަށް ކަންކަން ވަނީ ރުޖޫއަވެފަ އެވެ.
ނިއު ޔޯކްގައި ވެސް ފިޔަވަޅުތައް އުވާލައި، އާއްމު ދިރިއުޅުން ކުރިއަށް ގެންދާ އިރު، އެ ތަނުގެ 88 ޕަސެންޓު މީހުން ވަނީ ކޮވިޑް ވެކްސިންގެ ދެ ޑޯޒް ފުރިހަމަކޮށްފަ އެވެ.
