އުރީދޫ ދިވެހި ޕްރިމިއާ ލީގުގައި މިއަދު ހަވީރު ދަ ގްރާންޑޭ ސްޕޯޓްސް ކްލަބް އަތުން 4-1 އިން މޮޅުވެ، ކްލަބް ވެލެންސިއާ އިން ހަމަޖެހުމެއް ހޯދައިފި އެވެ.
މިއަދުގެ މެޗާ ކުރިމަތިލިއިރު، ލީގުގައި އެންމެ ފަހުން ކުޅުނު ހަ މެޗުގެ ތެރެއިން ވެލެންސިއާ އޮތީ ފަސް މެޗުން ބަލިވެފަ އެވެ. ދަ ގްރާންޑޭ އަތުން ހޯދި މޮޅާ އެކު ވެެލެންސިއާ ވަނީ ލީގުގެ ހަތަރު ވަނަ އަށް ޖެހިލައިފަ އެވެ. އެއީ 12 މެޗުން 16 ޕޮއިންޓް ހޯދައިގެންނެވެ. މިރޭ ޔުނައިޓެޑް ވިކްޓްރީ އަށް ކްލަބް އީގަލްސް އަތުން މޮޅެއް ނުލިބިއްޖެނަމަ ލީގު ބްރޭކަށްދާއިރު، ވެލެންސިއާ އޮންނާނީ ހަތަރު ވަނައިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި ވެލެންސިއާ އިން ލީޑުނެގީ 28 ވަނަ މިނިޓްގައި އަބްދުﷲ ޔާމީން (ޔާނު) ޖެހި ގޯލުންނެވެ. ފުރަތަމަ ހާފު ނިމުމުގެ ކުރިން ދަ ގްރާންޑޭ އިން އެއްވަރުކުރީ ވެލެންސިއާ ކީޕަރު މުހައްމަދު ފައިސަލް އަތުން ހެދުނު ގޯހަކުން ބައިކޮޅަށް ވަން ގޯލަކުންނެވެ.
ދެ ވަނަ ހާފްގެ ކުޅުން ފެށިގެން ހަ މިނިޓް ތެރޭ ވެލެންސިއާ އިން އަލުން ލީޑުނެގި އެވެ. މި ގޯލު ޖެހީ ވެލެންސިއާގެ ސްޕެއިން ފޯވާޑް ބޯހާސް މާޓިންނެވެ. ވެލެންސިއާ އިން ފަހު ދެ ގޯލު ޖެހީ މެޗުގެ ފަހު ކޮޅުގަ އެވެ. އެ ގޮތުން 89 ވަނަ މިނިޓްގައި ބޯހާސް ވަނީ ވެލެންސިއާގެ ތިން ވަނަ ގޯލު ޖަހައިފަ އެވެ. އަދި މެޗުގެ އިތުރު ވަގުތުގައި ވެލެންސިއާގެ ފަހު ގޯލު ޖެހީ ޓީމުގެ ކެޕްޓަން އަލީ ފާސިރު (ސެންޓޭ) އެވެ.
ސެންޓޭ ކުޅެން އެރީ ބަދަލެއްގެ ގޮތުގަ އެވެ. މިދިޔަ ޖެނުއަރީ މަހު 23 ވަނަ ދުވަހު ކުޅުނު ޕްރެޒިޑެންޓްސް ކަޕް ފައިނަލް މެޗުގައި މާޒިޔާއާ ދެކޮޅަށް ކުޅެނިކޮށް، ސެންޓޭ ކަކުލަށް އަނިޔާވެގެން ހުރީ ކުޅުމާ ދުރުގަ އެވެ. މިއަދުގެ މެޗުގައި ސެންޓޭ ކުޅުނުއިރު، މިއީ މި ފަހަރު ލީގުގައި އޭނާ ކުޅުނު ފުރަތަަމަ މެޗެވެ.
ލީގުގައި މިރޭ އީގަލްސް އާއި ޔުނައިޓެޑް ވިކްޓްރީގެ މެޗަށް ފަހު އަންނަ މަހުގެ 21 ވަނަ ދުވަހާ ހަމައަށް ބްރޭކެއް ނަގާނެ އެވެ. އެއީ މި މަހު 18-24 އަށް މާޒިޔާ އިން ކުޅޭ އޭއެފްސީ ކަޕް ދެކުނު އޭޝިއާ ގްރޫޕްގެ މެޗުތަކާއި އަންނަ މަހު އުޒްބެކިސްތާންގައި ސެންޓްރަލައިޒްކޮށް ބާއްވާ އޭޝިއަން ކަޕް ކޮލިފައިން ގްރޫޕް ސްޓޭޖުގެ މެޗުތަކަށެެވެ.
