ރާއްޖެއަށް ކޮވިޑް ވެކްސިން ގެނައި ގޮތާއި ވެކްސިން ދިނުމުގައި އަމަލުކުރި ގޮތުގެ އޮޑިޓެއް ހަދަމުންދާ ކަމަށް ޓްރާންސްޕޭރެންސީން މޯލްޑިވްސްއިން ހާމަކޮށްފި އެވެ.
ރާއްޖޭގެ ވެކްސިނޭޝަން ޕްރޮގްރާމް މިދިޔަ އަހަރުގެ ފެބުރުއަރީ މަހު އެވެ. އެއީ އިންޑިއާއިން ރާއްޖެއަށް ހަދިޔާކުރީ 200،000 ޑޯޒުންނެވެ. ޗައިނާ އިން ވެސް 200،000 ޑޯޒާއި ހެޔޮއެދޭ އެހެން ފަރާތްތަކުން ވެސް ވެކްސިން ލިބުނެވެ.
އޭގެ އިތުރަށް ރާއްޖެ އިން 1،000،000 ޑޯޒަށްވާ ފައިސާ ދައްކާފައިވާ ސިންގަޕޫރުގެ އެސްޓްރާ ޒެނިކާ އަށް 700،000 ޑޯޒާއި އިންޑިއާގެ ސިރަމް އިންސްޓިޓިއުޓަށް 300،000 ޑޯޒްވެސް ފަހުން ގެނަ އެވެ.
ޓްރާންސްޕޭރެންސީ މޯލްޑިވްސް، ސީނިއާ ލީގަލް ކޯޑިނޭޓާ ޝައިފާ ޝާހިދު "އަދަދު" އަށް ވިދާޅުވީ ކޮވިޑް ވެކްސިނާ ގުޅޭ ގޮތުން މައުލޫމާތު އެއްކުރަމުންދާތާ މިހާރު ދުވަސްކޮޅެއް ވެފައިވާ ކަމަށެވެ.
މީގެ މަގްސަދަކީ ކޮވިޑާ ގުޅޭ ގޮތުން ވީހާވެސް ގިނަ މައުލޫމާތު އެއްކޮށް އެއްތަނެއްގައި ރައްކާކުރުން ކަމަށް އޭނާ ވިދާޅުވި އެވެ.
އެ އޮޑިޓްގައި ބޮޑަށް ހިމަނާފައި ވަނީ ރާއްޖެ ގެނެސްފައި ވަނީ ކިހާ އަދަދެއްގެ ވެކްސިނެއް ކަމާއި އެ ވެކްސިން ގެނެސް ސެންޓަރުތަކަށް ފޮނުވި އަދަދުގެ އިތުރުން ހަދިޔާ ކޮށްފައި ވަނީ ކިހާ އަދަދެއްގެ ވެކްސިނެއް ކަމަށެވެ.
މީގެ އިތުރުން އެ އޮޑިޓްގައި ވެކްސިން ޖެހި މީހުންގެ ތަޖުރިބާ އާއި ވެކްސިންގެ އެއްވެސް ޑޯޒެއް ނުޖަހާ މީހުން ނުޖަހަނީ ކީއްވެތޯވެސް ހިމަނާފައިވާނެ ކަމަށް ޝައިފާ ވިދާޅުވި އެވެ.
ވެކްސިނާ ގުޅޭގޮތުން ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ނެރެފައިވާ ރިޕޯޓު ތަކަށް ބަލާ އޭގެ މައުލޫމާތުވެސް އޮޑިޓްގައި ހިމަނާފައިވާނެ ކަމަށް ޝައިފާ ވިދާޅުވި އެވެ.
މިހާރު އެ މަސައްކަތް ކުރާތާ ދެ މަސް ވެފައިވާއިރު އެއްކޮށް ނިންމާ ޖޫންގައި އޮޑިޓް އާންމުކުރެވޭތޯ މަސައްކަތް ކުރަމުންދާ ކަމަށް ވެސް އޭނާ ވިދާޅުވި އެވެ.
ރާއްޖޭގައި މިހާރު ވެކްސިން ގެ ބޫސްޓާ ޑޯޒުވެސް ޖަހަން ފަށާފައިވާއިރު، ވެކްސިންގެ ފުރަތަމަ ޑޯޒު ޖަހައިފައި ވަނީ 398،597 މީހުންނެވެ. ދެ ވަނަ ޑޯޒު ޖެހީ 383،980 މީހުންނެވެ. އަދި ތިން ވަނަ ޑޯޒު ނުވަތަ ބޫސްޓާ ޑޯޒް މިހާތަނަށް 159,008 މީހުން ވަނީ ޖަހާފަ އެވެ.
އެޗްޕީއޭގެ ފަރާތުން އެންމެ ފަހުން އާންމު ކުރި ބަލިޖެހުނު މީހުންގެ ތަފާސްހިސާބަށް ބަލާއިރު މުޅި ރާއްޖެއިން 179،483 މީހުންނަށް ވަނީ ކޮވިޑް ބަލި ޖެހިފަ އެވެ. އެގޮތުން މިދިޔަ ހަފްތާގައި 312 މީހުންނަށް ވަނީ ކޮވިޑު ޖެހިފަ އެވެ.
ރާއްޖޭން ކޮވިޑު ފެނި، ސިއްހީ ކުއްލި ނުރައްކަލުގެ ހާލަތު އެންމެ ފުރަތަމަ އިއުލާނު ކޮށްފައިވަނީ މީގެ ދެ އަހަރު ކުރިން މާޗު 12ގަ އެވެ. އޭގެ ފަހުން ކޮންމެ މަހަކު ކުއްލި ހާލަތުގެ މުއްދަތު އިތުރުކުރަމުން އައިސް ކުއްލި ހާލަތު އުވާލާފައިވަނީ އޭގެ ދެ އަހަރު ފަހުން މިދިޔަ މާޗު 13ގަ އެވެ.
