ބާސެލޯނާ (މެއި 11) - ސްޕެނިޝް ލީގުގައި ރޭ ސެލްޓަ ވީގޯ އަތުން 3-1 އިން ބާސެލޯނާ މޮޅުވިއިރު، އެ ޓީމުގެ އުރުގުއޭ ޑިފެންޑަރު ރޮނާލްޑް އަރައުހޯ ބޮލަށް ލިބުނު އަނިޔާއަކާ ގުޅިގެން ހޮސްޕިޓަލަށް ގެންގޮސްފި އެވެ.
ރޭގެ މެޗުގެ 29 ވަނަ މިނިޓްގައި އޮސްމާން ޑެމްބެލޭ ދިން ބޯޅައަކުން ބާސެލޯނާ އަށް ލީޑުނަގައިދިނީ މެމްފިސް ޑިޕާއި އެވެ. އޭގެ 10 މިނިޓް ފަހުން ސެލްޓަ އަށް އެއްވަރުކޮށްދޭން ތިއާގޯ ގަލާޑޯ ޖެހި ބޯޅަ ބާސެލޯނާ ކީޕަރު އަންދްރޭ ސްޓެގެން ވަނީ މަތަކޮށްފަ އެވެ.
މެޗުގެ 41 ވަނަ މިނިޓްގައި ސެލްޓަ އޭރިއާތެރެއިން ލިބުނު ފުރުސަތަކުން ޕިއޭ އެމެރިކް އޮބާމަޔަން ވަނީ ބާސެލޯނާގެ ލީޑުފުޅާކޮށްދީފަ އެވެ. އަދި ދެ ވަނަ ހާފްގެ ކުޅުން ފެށިގެން ތިން ވަނަ މިނިޓްގައި، މެޗުގެ 48 ވަނަ މިނިޓްގައި ޑެމްބެލޭ ހުސްކޮށްލާފައި ދިން ބޯޅައަކުން އޮބާމަޔަން ވަނީ ބާސެލޯނާގެ ތިން ވަަނަ ގޯލު ޖަހައިފަ އެވެ. އަދި އޭގެ މިނިޓެއް ފަހުން ބާސެލޯނާ ފަހަތުން ހެދި ގޯހެއްގެ ފައިދާނަގައި ސެލްޓަގެ ކެޕްޓަން އިއާގޯ އަސްޕާސް ވަނީ ގޯލެއް ޖަހައިފަ އެވެ.
ސެލްޓަ އަށް މައްސަލަ ދިމާވީ މެޗުގެ 57 ވަނަ މިނިޓްގައި އެ ޓީމުގެ ޖޭސަން މުރީއޯ އަށް ރަތް ކާޑު ދެއްކުމުންނެވެ. އޭނާ އަށް ރަތް ކާޑު ދެއްކީ އެންމެ ފަހަތުގައި ހުރެފައި ބާސެލޯނާގެ ޑިޕާއި އަށް ހުރަސް އެޅުމުންނެވެ.
މެޗުގެ 59 ވަނަ މިނިޓްގައި ގަވީ އާއި އަަރައުހޯ ބޯޅައިގައި ބޮލުން ޖަހަން އެރި ބޯޅައެއްގައި ދެ ކުޅުންތެރިންގެ ބޯ ޖެހި، އަރައުހޯ ވެއްޓުނީ ދުއްވައިގަތް ތަނުންނެވެ. ދަނޑަށް އެމްބިއުލަންސް އަރުވައި، ވަގުތުން އަރައުހޯ ގެންދިޔައީ ހޮސްޕިޓަލަށެވެ.
މެޗަށް ފަހު ބާސެލޯނާގެ ކޯޗު ޒަވީ ހެނާންޑޭޒް ބުނީ އަރައުހޯގެ ހާލު އަންނަނީ ރަނގަޅުވަމުން ކަމަށާއި ހޮސްޕިޓަލަށް ގެންދިޔަ ފަހުން ފަރުވާދިނުމުން ގޯސް ހާލަތަކަށް ދިއުމުގެ ކުރިން ހުރިހާ ކަމެއް ކޮންޓްރޯލް ކުރެވިފައިވާ ކަމަށެވެ.
ރޭގެ މޮޅާ އެކު ބާސެލޯނާ ލީގުގެ ދެ ވަނައިގައި އޮތީ 36 މެޗުން 72 ޕޮއިންޓާ އެކު އެވެ. ޗެމްޕިއަންކަން ހޯދާފައިވާ ރެއާލް މެޑްރިޑް އެއް ވަަނައިގައި އޮތީ 35 މެޗުން 81 ޕޮއިންޓް ހޯދައިގެންނެވެ.
