ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕު 2022ގެ ޖޫނިއާ އަދި ކެޑޭޓް ކެޓަގަރީގެ ޑަބަލްސް އިވެންޓުން ރާއްޖޭގެ އަންހެން ދެ ޕެއާ ސެމީ ފައިނަލުން ޖާގަ ހޯދައިފި އެވެ.
ސަރަހައްދީ މުބާރާތުގެ ޓީމު އިވެންޓްގެ ގްރޫޕް ސްޓޭޖުގެ މެޗުތައް ނިމިފައިވާއިރު، ޑަބަލްސް އިވެންޓްގެ މެޗުތައް ވަނީ ފަށައިފަ އެވެ. ޑަބަލްސް އިވެންޓުގެ ޖޫނިއާ ބައިގައި ރާއްޖޭގެ ފާތިމަތު ދީމާ އަލީ އާއި އައިޝަތު ރަފާ ނާޒިމްގެ ޕެއާ ވަނީ ސެމީ ފައިނަލުން ޖާގަ ހޯދާފަ އެވެ. އަދި ކެޑޭޓް ބައިގައި ދީމާ އާއި މިޝްކާ މުހައްމަދު އިބްރާހިމްގެ ޕެއާ ވެސް ވަނީ ޑަބަލްސް ސެމީ ފައިނަލުން ޖާގަ ހޯދާފަ އެވެ. ފިރިހެން ޑަބަލްސް އަށް ބަލާއިރު ރާއްޖޭގެ ދެ ޕެއާ ވެސް ވަނީ ގްރޫޕް ސްޓޭޖުގައި ކުޅުނު ދެ މެޗުން ވެސް ބަލިވެފަ އެވެ.
ޖޫނިއާ ބައިގެ އަންހެން ޑަބަލްސް ސެމީ ފައިނަލްގައި ރާއްޖެ ނުކުންނާނީ އިންޑިއާގެ ޕެއާ އާއި ދެކޮޅަށެވެ. އަދި ކެޑޭޓް ބައިގެ ސެމީ ފައިނަލުގައި ރާއްޖެ ނުކުންނާނީ ޕާކިސްތާންގެ ޕެއާ އާއި ދެކޮޅަށެވެ.
ޑަބަލްސް އިވެންޓުން އަންހެން ޓީމު ސެމީ ފައިނަލަށް ދިޔައިރު، ރާއްޖޭގެ ޖޫނިއާ އަންހެން ޓީމު އަދި ކެޑޭޓް އަންހެން ޓީމު ވެސް ވަނީ ޓީމު އިވެންޓްގެ ސެމީ ފައިނަލުން ޖާގަ ހޯދައިފަ އެވެ.
ޖޫނިއާ ބައިގެ އަންހެން ޑަބަލްސްގެ ސެމީ ފައިނަލުން ރަފާ އާއި ދީމާގެ ޕެއާ ޖާގަ ހޯދީ ގްރޫޕް ސްޓޭޖުގައި ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށްގެންނެވެ. ރާއްޖެ މޮޅުވީ ބަންގްލަދޭޝް ތިން ސެޓު އެއް ސެޓުންނެވެ. ބަލިވީ ސްރީ ލަންކާ އަތުން ތިން ސެޓު އެއް ސެޓުންނެވެ.
ފުރަތަމަ މެޗުގައި ބަންގަލްދޭޝް އަތުން މޮޅުވީ އެ ޓީމުން ސެޓެއް ހޯދާފައިވަނިކޮށް ފަހަތުން އަރައި ތިން ސެޓު ހޯދައިގެންނެވެ. ފުރަތަމަ ސެޓު ބަންގްލަދޭޝްގެ ސާދިއާ އަދި ރޭޝްމީ ކާމިޔާބުކުރީ 7-11 އިންނެވެ. ހިތްވަރާ އެކު ކުޅެ ރާއްޖޭގެ ޕެއާ އިން ފަހު ތިން ސެޓު ކާމިޔާބުކުރީ 11-6، 11-7 އަދި 11-8 އިންނެވެ.
ދެ ވަނަ މެޗުގައި ސްރީ ލަންކާއާ ދެކޮޅަށް ރާއްޖެއިން ރަނގަޅު ވާދައެއް ކުރި އެވެ. ފުރަތަމަ ސެޓު ވާދަވެރިކޮށް ގޮސް ފަހު ވަގުތު 10-12 އިން ކާމިޔާބުކުރީ ލަންކާގެ ސްވަރްޔާ އަައިލަސްގެ ޕެއާ އެވެ. ޖެހިގެން އައި ސެޓުގައި މޮޅު ކުޅުމެއް ދައްކައި ދީމާ އާއި ރަފާ ދެވަނަ ސެޓު 11-3 އިން ހޯދި އެވެ. ޖެހިގެން އައި ދެ ސެޓުން ރާއްޖެ ބަލިވީ 8-11 އަދި 5-11 އިންނެވެ.
ކެޑޭޓް ބައިގެ ޑަބަލްސްގައި ދީމާ އާއި މިޝްކާ ކުޅުނު މެޗެއްގެ ތެރެއިން.-- ފޮޓޯ: މުހައްމަދު ޝާބިން/ އަދަދު
ކެޑޭޓް ޑަބަލްސްގެ ފުރަތަމަ މެޗުގައި ރާއްޖޭގެ ދީމާ އާއި މިޝްކާ ވަނީ ސީދާ ތިން ސެޓުން ނޭޕަލްގެ އެވާނާ އާއި ބިޔަންކާގެ ޕެއާ ބަލިކޮށްފަ އެވެ. މި މެޗުގެ ސެޓުތައް ރާއްޖެއިން ގެންދިޔައީ 11-2، 11-5، 11-9 އިންނެވެ.
ދެ ވަނަ މެޗުގައި ވަރުގަދަ އިންޑިއާއާ ވާދަކޮށް ފޯރިގަދަ ކުޅުމަކަށް ފަހު ރާއްޖޭގެ ޕެއާ ބަލިވީ 3-2 ސެޓުންނެވެ. ފުރަތަމަ ސެޓު އިންޑިއާ އިން 9-11 އިން ކާމިޔާބުކުރި ނަމަވެސް ދެ ވަނަ ސެޓު 11-7 އިން ރާއްޖެ ހޯދި އެވެ. ތިން ވަނަ ސެޓުގައި އިންޑިއާ އިން މޮޅަށް ކުޅެ 5-11 އިން ސެޓު ކާމިޔާބުކުރިއިރު، ހިތްވަރާ އެކު ކުޅެ ދިމާ އާއި މިޝްކާ ވަނީ ހަތަރު ވަނަ ސެޓު 11-6 އިން ހޯދައިފަ އެވެ. ފަހު ސެޓު ފޯރިގަދަ ގަދަކޮށް ގޮސް ފަހު ވަގުތު 9-11 އިން ކާމިޔާބުކުރީ އިންޑިއާ އިންނެވެ.
މުބާރާތުގެ ޖޫނިއާ ބައިގެ ފިރިހެން ޑަބަލްސްގައި ކުޅުނު ދެ މެޗުންވެސް ބަލިވެ ރާއްޖެ ޕެއާ ވަނީ ކަޓައިފަ އެވެ. މުހައްމަދު ތާބިން ސުޖާއު އާއި އިބްރާހިމް އައުޒަމް އަޒީމްގެ ޕެއާ ފުރަތަމަ މެޗުގައި އިންޑިއާގެ އަންކޫރު އާއި ދީޕިތް އަތުން ބަލިވީ 5-11، 1-11 އަދި 5-11 އިންނެވެ. ދެ ވަނަ މެޗުގައި ސްރީ ލަންކާގެ ކުލައްޕުވަން އާއި ވިޖެސިންގަން އަތުން ބަލިވީ 5-11، 7-11 އަދި 3-11 އިންނެވެ.
ކެޑޭޓް ބައިގައިވެސް ފިރިހެން ޑަބަލްސް ގްރޫޕް ސްޓޭޖު ދެ މެޗުން ވެސް ރާއްޖެ ވަނީ ބަލިވެފަ އެވެ. ފުރަތަމަ މެޗުގައި ރާއްޖޭގެ ޒީކު އާއި އުމީރު އަތުން އިންޑިއާގެ ބަލަހުގަން އާއި ނަންދޫ މޮޅުވީ 3-11، 11-2، އަދި 9-11 އިންނެވެ. ދެ ވަނަ މެޗުގައި ނޭޕާލްގެ ޕްރަނޭ ތާޕާ އާއި އުޖްވަލް މަނާންދާރު އަތުން ބަލިވީ 7-11، 9-11، އަދި 7-11 އިންނެވެ.
މުބާރާތުގެ ސިންގަލްސް އިވެންޓްގެ މެޗުތައް މިއަދު ފަށާނެ އެވެ.
