ފޮރިން ސާވިސްގެ މުވައްޒަފުންގެ މުސާރައާއި އިނާޔަތްތައް ރައީސް އޮފީހުން ކަނޑައަޅާ ގޮތަށް، އޮތް އޮތުން ބަދަލުކޮށް، ފޮރިން ސާވިސްގެ ގާނޫނަށް ރައްޔިތުންގެ މަޖިލީހުން އެންމެ ފަހުން ގެނައި އިސްލާހު ރައީސް އިބްރާހީމް މުހައްމަދު ސޯލިހު މިއަދު ތަސްދީގުކުރައްވައިފި އެވެ.
ސަރުކާރުގެ ގެޒެޓްގައި މިއަދު ޝާއިއުކުރި އިސްލާހުގައިވާ ގޮތުން ފޮރިން ސާވިސްގެ މުވައްޒަފުންނާއި ފޮރިން ސާވިސްގައި ވަޒީފާ އަދާކުރާ، އެ ސާވިސް އިން ބޭރުގެ މުވައްޒަފުންގެ މުސާރަ ކަނއަޅާނީ ދައުލަތުގެ މުސާރައިގެ ސިޔާސަތުގެ ގާނޫނުގެ ދަށުން، ފިނޭންސް މިނިސްޓްރީންނެވެ. ފޮރިން ސާވިސްގެ ގާނޫގެ 56 ވަނަ މާއްދާގެ (ނ) ކުރިން އޮތް ގޮތުން ފޮރިން ސާވިސްގައި މަސައްކަތްކުރާ މީހުންގެ މުސާރަ ކަނޑައަޅަނީ ނެޝަނަލް ޕޭކޮމިޝަނާއި ފިނޭންސް މިނިސްޓްރީގެ ލަފާގެ މަތިން ރައީސް އޮފީހުންނެވެ.
މިއަދު ތަސްދީގުކުރި އިސްލާހުގައިވާ މައިގަނޑު ބަދަލަކީ މުސާރައާއި އިނާޔަތްތައް ކަނޑައެޅުން، ދައުލަތުގެ މުސާރައިގެ ގާނޫނާ އެއްގޮތް ކުރުމެވެ. ފޮރިން ސާވިސްގެ ގާނޫނުގެ އެ ބައިތައް ކުރިން އޮތީ ދައުލަތުގެ މުސާރައިގެ ސިޔާސަތުގެ ގާނޫނަށް ހަވާލާ ނުދީ އެވެ.
ފާސްކޮށް އަމަލުކުރަން ފެށިތާ އަދި މާ ގިނަ ދުވަހެއް ނުވާ ފޮރިން ސާވިސްގެ ގާނޫނަށް އެ އިސްލާހުތައް ގެންނަން ރައްޔިތުންގެ މަޖިލީހަށް ހުށަހެޅި ބިލު ފާސްކުރީ ސަރުކާރުން އެ ބިލު ހުށަހެޅި އިރު އޮތް ގޮތަށެވެ.
