ވޮޝިންޓަން، އެމެރިކާ (މޭ 10) - ޔޫކްރެއިން ރައްޔިތުން ގަދަކަމުން ރަޝިއާއަށް ގެންދާ ކަމުގެ ހެކިތައް ފެންނަން އެބަ ހުރި ކަމަށް ޕެންޓެގަންއިން ބުނެފި އެވެ.
"ރަޝިއާގައި ޔޫކްރެއިން މީހުން ބައިތިއްބަނީ ކޮން ކަހަލަ ކިހާ އަދަދެއްގެ ކޭމްޕެއްގައި ކަމެއް ނޭނގޭ،" ޕެންޓެގަންގެ ތަރުޖަމާން ޖޯން ކާބޯ ހޯމަ ދުވަހު ވިދާޅުވި އެވެ.
ޔޫކްރެއިން ސަރުކާރުން ވެސް ބުނާ ގޮތުގައި ގާތްގަނޑަކަށް 1.2 މިލިއަން ޔޫކްރެއިން ރައްޔިތުން ވަނީ ގަދަކަމުން ރަޝިއާއަށް ގެންގޮސް، ކޭމްޕުތަކުގައި ބަންދުކޮށްފަ އެވެ.
އެކަމާ ގުޅޭ ގޮތުން ކާބީ ވިދާޅުވީ ޔޫކްރެއިން ރައްޔިތުން ގަދަކަމުން ރަޝިއާއަށް ގެންދާ ކަމުގެ ހެކި ފެންނަން އެބަހުރި ކަމަށާއި މިއީ ޔޫކްރެއިންގެ އިސްތިގްލާލަށް ރަޝިއާއިން އިހްތިރާމް ނުކުރާ ކަމުގެ ނިޝާނެއް ކަމަށެވެ.
ޔޫކްރެއިން ރައްޔިތުން ގަދަކަމުން ރަޝިއާއަށް ގެންދާ ކަމަށް ރައީސް ވޮލޮޑިމިރް ޒެނެލްސްކީ އެންމެ ފުރަތަމަ ތުހުމަތު ކުރެއްވީ މާޗް މަހު އެވެ.
އެގޮތަށް ގެންދާ މީހުންގެ އަދަދު މިހާރު ވަރަށް ބޮޑަށް އިތުރުވެފައިވާ ކަމަށް ޔޫކްރެއިނުން ބުނެ އެވެ. އެގޮތުން 200،000 އަށް ވުރެ ގިނަ ކުދިން ކޭމްޕުތަކުގައި ތިބި ކަމަށް ބެލެވެ އެވެ.
