ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕުގެ ޖޫނިއާ ބައިގެ ސެމީ ފައިނަލުން ރާއްޖޭގެ ގައުމީ އަންހެން ޖޫނިއާ ޓީމު ޖާގަ ހޯދައިފި އެވެ.
ސަރަހައްދީ ހަ ގައުމަކުން ވާދަކުރާ މި މުބާރާތުގެ ކުޅުން މިއަދު ފަށާފައިވަނީ ޓީމި އިވެންޓުގެ މެޗުތަކާ އެކުގަ އެވެ. ޖޫނިއާ އަންހެން ބައިގައި ކުޅުނު ދެ މެޗު ވެސް ކާމިޔާބުކޮށް ރާއްޖެ ގްރޫޕްގެ އެއް ވަނަ ހޯދިއިރު، މި ގްރޫޕުން ދެ ވަނަ އަށް ދިޔައީ ޕާކިސްތާނެވެ. ސެމީ ފައިނަލްގައި ދިވެ ހިރާއްޖެ މާދަމާ ނުކުންނާނީ ގްރޫޕް އޭގެ ދެ ވަނަ އަށް ދިޔަ ސް ރީލަންކާއާ ދެކޮޅަށެވެ. ގްރޫޕް އޭ އިން އެއް ވަނަ ހޯދީ އިންޑިއާ އެވެ.
ޖޫނިއާ ކެޓަގަރީގެ އަންހެން ބައިގައި ރާއްޖެ ކުޅުނު ފުރަތަމަ މެޗުގައި ނުކުތީ ޕާކިސްތާނާއި ދެކޮޅަށެވެ. މެޗުގެ ފުރަތަމަ ގޭމުގައި ޕާކިސްތާނުގެ ހަގީގާގެ މައްޗަށް ރާއްޖޭގެ އައިޝަތު ރަފާ ނާޒިމް ކާމިޔާބު ހޯދީ ސީދާ ތިން ސެޓުންނެވެ. ވާދަވެރި މި ގޭމުގެ ސެޓުތައް ރަފާ ގެންދިޔައީ 11-9، 11-8 އަދި 11-9 އިންނެވެ.
ދެ ވަނަ ގޭމަށް ރާއްޖެ އިން ނުކުތީ ފާތިމަތު ދީމާ އަލީ އެވެ. ދީމާ ވަނީ ޕާކިސްތާނުގެ ޕެންރިޔާ އަތުން ފަސޭހަކަމާ އެކު މޮޅުވެފަ އެވެ. ތިން ސެޓު ދީމާ ކާމިޔާބު ކުރީ 11-5، 11-9 އަދި 11-1 އިންނެވެ.
ރާއްޖެ ޓީމުގެ ކޯޗު ކޮސްޓޯ (ކ) ޓީމުގެ ރަފާ (ކ) އާއި ދީމާ އަށް ބުނެދެނީ.--- ފޮޓޯ: މުހައްމަދު ޝާބިން/ އަދަދު
ތިން ވަނަ ގޭމުގައި ރާއްޖޭގެ މިޝްކާ މުހައްމަދު އިބްރާހިމް އަތުން ޕާކިސްތާނުގެ ކަލްސޫމް ވަނީ މޮޅުވެފަ އެވެ. ވާދަވެރި އަދި ފޯރިގަދަ ކުޅުމެއް ފެނުނު މި މެޗުގެ ފުރަތަމަ ދެ ސެޓު މިޝްކާ ކާމިޔާބުކުރީ 11-6، 11-5 އިންނެވެ. ބައިނަލްއަގްވާމީ މި ފަަދަ މުބާރާތެއްގައި ފުރަތަމަ ފަހަރަށް ކުޅޭ މިޝްކާ އަތުން ފަހަތުން އަރައި ކަލްސޫމް ވަނީ މޮޅުވެފަ އެވެ. ފަހު ތިން ސެޓު ޕާކިސްތާން ކުޅުންތެރިޔާ ގެންދިޔައީ 6-11، 11-13 އަދި 3-11 އިންނެވެ.
ތިން ވަނަ ގޭމުގައި މިޝްކާ ބަލިވި ނަމަވެސް ހަތަރު ވަނަ ގޭމުގައި ދީމާ ވަނީ ރާއްޖެ އަށް ފަސޭހަ މޮޅެއް ހޯދައިދީފަ އެވެ. މި ގޭމުގެ ސެޓުތައް ދިމާ ގެންދިޔައި، 11-7، 11-5 އަދި 11-3 އިންނެވެ. މިއާ އެކު ޕާކިސްތާން ބަލިކޮށް ރާއްޖެ ހަމަޖެހިލި އެވެ.
ޖޫނިއާ އަންހެން ބައިގެ ގްރޫޕް ސްޓޭޖުގައި ކުޅުނު ދެ ވަނަ މެޗު ނޭޕާލާ ވާދަކޮށް ރާއްޖެ އިން ކާމިޔާބުކުރީ ސީދާ ތިން ގޭމުންނެވެ. ފުރަތަމަ ގޭމުގައި ވާދަވެރި ކުޅުމަކަށް ފަހު ރާއްޖޭގެ ދީމަ ވަނީ ނޭޕާލްގެ ބިއަންކާ ބަލިކޮށްފަ އެވެ. މި ގޭމުގެ ފުރަތަމަ ސެޓު 11-09 އިން ދީމާ ކާމިޔާބުކުރި ދެ ވަނަ ސެޓު ބިއަންކާ ގެންދިޔައީ 10-12 އިންނެވެ. ފަހު ދެ ސެޓު ދީމާ ކާމިޔާބުކުރީ 11-08 އަދި 12-10 އިންނެވެ.
މި މެޗުގެ ދެ ވަނަ ގޭމު ރާއްޖޭގެ ރަފާ ކާމިޔާބުކުރީ ނޭޕާލްގެ އިވާނާއާ ވާދަކޮށް ސީދާ ތިން ސެޓުންނެވެ. މެޗުގެ ސެޓުތައް ރާފާ ގެންދިޔައީ 11-08، 11-04 އަދި 11-08 އިންނެެވެ.
ނޭޕާލްގެ ކުޅުންތެރިއާ އަތުން ޕޮއިންޓެއް ހޯދުމަށް ފަހު މިޝްކާ އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
ތިން ވަނަ ގޭމުގައި ރާއްޖޭގެ މިޝްކާ ފެނުނީ ތަފާތު ފޯމެއްގައި ކުޅެލިތަނެވެ. ކުރިން ޕްރެޝަރަށް ހޭނެން ކުރިމަތިވި ގޮންޖެހުންތަކުގެ ތެރެއިން ކުރިއަށް ޖެހިލައި، އަމިއްލަ ހުނަރަށް އޮތް އިތުބާރާ އެކު ކުޅެލައި ރާއްޖެ މޮޅުކޮށްދޭން އެހީތެރިވެދިނެވެ. މިޝްކާ ވަނީ ފަހަތުން އަރައި ނޭޕާލްގެ ސުބަޝްރީ ބަލިކޮށްފަ އެވެ. ފުރަތަމަ ސެޓު 09-1 އިން ސުބަޝްރީ ކާމިޔާބުކުރި ނަމަވެސް މިޝްކާ ވަނީ ތަފާތު ހިތްވަރެއް ދައްކައި ޖެހިގެން އައި ތިން ސެޓު 13-11، 11-05 އަދި 11-06 އިން ކާމިޔާބުކޮށްފަ އެވެ.
ޖޫނިއާ ބައިގެން އަންހެން ޓީމް އިވެންޓް ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ މާދަމާ އެވެ. މިހާރު ކުރިއަށްދަނީ މުބާރާތުގެ ޑަބަލްސް އިވެންޓްގެ މެޗުތަކެވެ.
މުބާރާތުގެ މެޗުތައް ބައްލަވައިލެއްވުމަށް މިއަދު ހެނދުނު ރައީސް އިބްރާހިމް މުހައްމަދު ސޯލިހާއި އަނބިކަނބަލުން ފަޒްނާ އަހްމަދު ސޯޝަލް ސެންޓަރު އިންޑޯ އަށް ވަޑައިގެންނެވި އެވެ. މީގެ އިތުރުން ކުޅިވަރާބެހޭ ވަޒީރު އަހުމަދު މަހުލޫފާއި ކޮމިޝަނާ އޮފް ސްޕޯޓްސް ހީނާ އަހުމަދު ސަލީމްގެ އިތުރުން މޯލްޑިވްސް އޮލިމްޕިކް ކޮމިޓީގެ އިސް ވެރިންނާއި ކުޅިވަރު އެސޯސިއޭޝަންތަކުގެ އިސް މަގާމުތަކުގައި ތިއްބެވި ބޭފުޅުން ވަނީ ގައުމީ ޓީމަށް ހިތްވަރުދިނުމުގައި ބައިވެރިވެފަ އެވެ.
