މާދަމާ ފެށުމަށް ތައްޔާރުވަމުން އަންނަ ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ ޑިޖިޓަލް ޕާޓްނަރެއްގެ ގޮތުގައި ދިރާގު ހަމަޖައްސައިފި އެވެ.
ހަ ގައުމުން 85 އަށް ވުރެ ގިނަ ކުޅުންތެރިން ވާދަކުރާ މި މުބާރާތުގެ މެޗުތައް މާދަމާ ހެނދުނު މާފަންނު ސޯޝަލް ސެންޓަރު އިންޑޯ ހޯލުގައި ފަށާނެ އެވެ. މުބާރާތުގައި ވާދަކުރާ ހަތް ގައުމަކީ ދިވެހި ރާއްޖެ، ސްރީ ލަންކާ، އިންޑިއާ، ޕާކިސްތާން، ނޭޕާލް އަދި ބަންގްލަދޭޝް އެވެ. މުބާރާތުގައި ވާދަކުރާ ހުރިހާ ޓީމްތަކެއް މިހާރު މާލެ އައިސްފައިވާއިރު، މުބާރާތަށް ތައްޔާރުވާ ދިވެހި ގައުމީ ޓީމު ވެސް ވަނީ ބީހައިވް ހޮޓެލްގައި ކޭމްޕް ކޮށްފަ އެވެ.
ޖޫނިއާ ކުޅުންތެރިންނަށް އަމާޒުކޮށްގެން ބާއްވާ އެންމެ ބޮޑު މުބާރާތުގެ ޑިޖިޓަލް ޕާޓްނަރަކަށް ދިރާގު ހަމަޖައްސައި އެއްބަސްވުމުގައި މިއަދު ވަނީ ސޮއިކޮށްފަ އެވެ. ދިރާގުގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ ބްރޭންޑް އަދި މާކެޓިން ކޮމިޔުނިކޭޝަންގެ ސީނިއާ މެނޭޖަރު މުހައްމަދު މިރުޝާން އެވެ. ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއެމް)ގެ ފަރާތުން ސޮއިކުރެއްވީ، އެ އެސޯސިއޭޝަންގެ ނައިބު ރައީސް އިބްރާހިމް ޝިއުރީ އެވެ.
މި އެއްބަސްވުމުގައި ސޮއިކުރެއްވުމަށް ފަހު ދިރާގުގެ ބްރޭންޑް އަދި މާކެޓިން ކޮމިޔުނިކޭޝަންގެ ސީނިއާ މެނޭޖަރު މުހައްމަދު މިރުޝާން ވިދާޅުވީ ރާއްޖޭގެ ޒުވާން އެތުލީޓުންގެ ކުރިއެރުމަށް މުހިންމު މުބާރާތެއްގެ ޑިޖިޓަލް ޕާޓްނަރެއްގެ ގޮތުގައި ބައިވެރިވެ، އެހީތެރިވެވުމަކީ އެ ކުންފުންޏަށް ލިބޭ ބޮޑު އުފަލަކާއި ހިތްހަމަޖެހުމެއް ކަމަށެވެ.
މީގެ އިތުރުން ރާއްޖޭގެ ކުޅިވަރާއި ޒުވާނުންގެ ކުރިއެރުމަށް އެ ކުންފުނީގެ ފަރާތުން އަބަދުވެސް އެހީތެރިކަަން ލިބޭނެކަން މިރުޝާން ފާހަގަކުރެއްވި އެވެ.
ޓީޓީ އެސޯސިއޭޝަނުގެ ނައިބު ރައީސް ޝިއުރީ ވިދާޅުވީ ރާއްޖޭގެ ޓީޓީގެ ކުރިއެރުމަށް ދީރާގުން އެހީވުމަކީ ބޮޑު އުފަލެއް ލިބުނު ކަމެއް ކަމަށެވެ. އަދި ވަކިން ހާއްސަކޮށް ޓީޓީ އެހެން ހަރުފަތަކަށް ގެންދިޔުމަށް އެސޯސިއޭޝަނުން ކުރަމުން އަންނަ މަސައްކަތުގައި ދިރާގުން ބައިވެރިވުމަކީ ބޮޑު އުފަލެއް ކަމަށް ޝިއުރީ ވިދާޅުވި އެވެ
ސަރަހައްދީ ޖޫނިއާ މުބާރާތުގެ މެޗުތައް މާދާމާ ފެށުމަށް ހަމަޖެހިފައިވަނީ 9 ޖަހާއިރު ގަ އެވެ. ފުރަތަމަ ކުޅޭނީ ކެޑޭޓް ކެޓަގަރީގެ ޓީމް އިވެންޓް މެޗެކެވެ. އޭގެ ފަހުން ޖޫނިއާ ޓީމްގެ މެޗުތައް ވެސް ކުރިއަށްދާނެ އެވެ. މި މެޗުތަކުގައި ގައުމީ ޓީމަށް ސަޕޯޓުކުރުމަށް ވީހާ ވެސް ގިނަ ސަޕޯޓަރުން ޒުވާނުުންގެ މަރުކަޒުގެ އިންޑޯ ހޯލަށް ދިޔުމަށް ގައުމީ ޓީމުން އިލްތިމާސްކުރެ އެވެ. މުބާރާތުގެ ޓީމު އިވެންޓްގެ މެޗުތަކަށް ފަހު މާދަމާ ރޭ މުބާރާތް ރަސްމީކޮށް ހުޅުވުމުގެ ރަސްމިއްޔާތު އޮންނާނެ އެވެ.
