ފުވައްމުލަކު ނެރު ކައިރިއަށް މިދިޔަ ހޯމަ ދުވަހު ފީނަން ފާބައިގެން އުޅެނިކޮށް ގެއްލުނު މުހައްމަދު "ސައިއްޓޭ" ސައީދު ހޯދުމުގެ މަސައްކަތް އެމްއެންޑީއެފުން މެދުކަނޑާލައިފި އެވެ.
ސައީދު ހޯދުމަށް އެމްއެންޑީއެފް އިން ފަށާފައިވާ ސާޗް އެންޑް ރެސްކިއު އޮޕަރޭޝަން މެދުކަނޑާލާފައިވާ ކަމަށް ސިފައިން ބުނި ނަމަވެސް މެދުކަނޑާލި ސަބަބެއް ނުބުނެ އެވެ. އާންމު ގޮތެއްގައި މިފަދަ ސާޗް އޮޕަރޭޝަންތައް ހިންގަނީ ވަކި މުއްދަތަކަށް އަދި ވަކި ސަރަހައްދުތަކެއް ބެލެންދެނެވެ.
ސިފައިން މީޑިއާތަކަށް ހިއްސާ ކުރި މެސެޖްގައި މިހާތަނަށް ކުރެވުނު މަސައްކަތްތަކުގެ ތަފްސީލް ދީފައިވެ އެވެ. އެ ގޮތުން މިދިޔަ ހަތް ދުވަހު ވައިގެ މަގުން 2،960 ސްކެއާ މޭލު، ކަނޑުގެ މަގުން 760 ސްކެއާ މޭލު، އަދި ކަނޑު އަޑިން 1000 މީޓަރުގެ ސަރަހައްދެއް ވަނީ ބަލައިފަ އެވެ.
މިދިޔަ ހަތް ދުވަހު ތެރޭ އެމްއެންޑީއެފްގެ ކޯސްޓްގާޑުން ވަނީ ކަނޑުގެ 68 މީޓަރު އަޑިން ޑައިވް ބެލްޓެއް ހޯދައިފަ އެވެ. އަދި ކަނޑުގެ 59 މީޓަރު އަޑިން ސައީދު މަސް ހިފަން ބޭނުން ކުރި ކަމަށް ބެލެވޭ ދަގަނޑުބުރިއެއް ވެސް ހޯދާފައިވެ އެވެ.
ވިއްސަކަށް އަހަރުގެ ޑައިވިން ތަޖުރިބާހުރި ސައީދު ފީނަން ފޭބީ ހޯމަ ދުވަހުގެ މެންދުރުފަހުގެ ވަގުތެއްގަ އެވެ.
ފީނަން ފޭބިއިރު އޭނާ ލައިގެން ހުރީ ކަޅު ކުލައިގެ ޑައިވިން ސޫޓަކާއި ކަޅުކުލައިގެ ފިންސަކާއި އަދި ކަޅުކުލައިގެ މާސްކެއް ކަމަށާއި އަދި އޭނާގެ އަތުގައި ރީނދުލާއި އޮރެންޖު ކުލައިގެ ބެލޫނެއް އޮތް ކަމަށް އެމްއެންޑީއެފުން ބުންޏެވެ.
