އެލޮން މަސްކް ބޭނުން ވަނީ 2028 ގެ ކުރިން ޓްވިޓާގެ އާމްދަނީ ފަސް ގުނަ އިތުރުކޮށް، 26.4 ބިލިއަން ޑޮލަރަށް މަތި ކުރަން ކަމަށް ނިއު ޔޯކް ޓައިމްސް ނޫހުން ބުނެފި އެވެ.
ދުނިޔޭގެ އެންމެ ބޮޑު މަހުޖަނު ވަނީ ޓްވިޓާގައި އިންވެސްޓް ކުރަން އެހެން މަހުޖަނުންނަށް ފުރުސަތު ހުޅުވާލާފަ އެވެ. އެކަމަށް ތައްޔާރު ކުރި ހުށަހެޅުމުގައި ވަނީ ގެންނަން ބޭނުންވާ ބަދަލުތައް ފާހަގަކޮށްފަ އެވެ.
މިދިޔަ އަހަރު ޓްވިޓާގެ އާމްދަނީއަކީ ފަސް ބިލިއަން ޑޮލަރެވެ. އެހެންކަމުން މަސްކް ބޭނުން ވަނީ ފަސް އަހަރުގެ ތެރޭގައި އާމްދަނީ ފަސް ގުނަ އިތުރު ކުރުމަށެވެ.
މަސްކްގެ ދަށުން ކުންފުނި ހިންގާ އިރު، އިޝްތިހާރުން ލިބޭ އާމްދަނީ 45 ޕަސެންޓަށް ކުޑަ ކުރާނެ އެވެ. އެއާ ހިލާފަށް 2020 ވަނަ އަހަރު ޓްވިޓާގެ އާމްދަނީގެ 90 ޕަސެންޓް ލިބުނީ އިޝްތިހާރުންނެވެ.
ހުށަހެޅުމުގައިވާ ގޮތުން 2028 ވަނަ އަހަރާ ހަމައަށް ދާ އިރު، އިޝްތިހާރުން ހޯދާނީ 12 ބިލިއަން ޑޮލަރެވެ. ސަބްސްކްރިޕްޝަންގެ ގޮތުގައި 10 ބިލިއަން ޑޮލަރު ހޯދަން ކަނޑައަޅާފައިވެ އެވެ.
އިލެކްޓްރިކް ކާރު އުފައްދާ ޓެސްލާގެ ވެރިޔާ މަސްކް އިތުރަށް ބޭނުން ވަނީ ޓްވިޓާގެ ކޭޝްފްލޯ 2025 ވަނަ އަހަރާ ހަމައަށް ދާ އިރު، 3.2 ބިލިއަން ޑޮލަރު އަދި 2028 ގައި 9.4 ބިލިއަން ޑޮލަރަށް މަތި ކުރުމަށެވެ.
ޖުމްލަ 44 ބިލިއަން ޑޮލަރަށް ޓްވިޓާ ވިއްކަން އެ ކުންފުނީގެ ބޯޑުން މަސްކްއާ އެކު އެއްބަސްވުމަކަށް އައީ އެޕްރީލް މަހު އެވެ. މަސްކް ބުނެފައި ވަނީ ޓްވިޓާއަށް އިންގިލާބީ ބަދަލުތަކެއް ގެންނާނެ ކަމަށެވެ.
އެގޮތުން "މޮޑަރޭޓް ކުރުން" މަދުކޮށް، ހިޔާލު ފާޅު ކުރުމުގެ މިނިވަން ކަމަށް އިތުރަށް ޖާގަ ދޭނެ ކަމަށް ބުނެފައިވެ އެވެ. އެއްބަސްވުމުގައި ސޮއިކުރުމަކީ މަސްކް ވާނީ ޓްވިޓާގެ ވަގުތީ ސީއީއޯއަށް ކަމަށް ބެލެވެ އެވެ.
